Psalms 107

Ala kava ne'mo'a muki vaya'aitegamo nehiya kavafe'mo ava gemae

Ala kava ne'mo alagepa vekamo mai'neno muki afina'amo hau huno apateme apateme uno hau huno apategaiya'mofe'mo agaefeke'mo hao ke heyo. Ala kava ne'mo'a kame vaya'apimogi apayapati'mo hatu maeno apate'niya vaya'mogimo, Ala kava ne'mo'a hatu maeno late'niye, hu'a hisaya gemo hane'niye. Agaemo yegemo haine ne'eya kotegati'mo apavalelino ege yegemo lamino nefaleya kotegati'mo apavalelino ege aluga aluga haopalegati'mo apavalelino ege huno apavalelino eno alino anupa huno apate'niye.

Mago vaya'mo ani'mo ohaneno ka'me kotega vaya'mo o'mai'naya kotegamo afa'a umenitata nehu'apae'mo maisaya taonie'mo kahauya hu'naya'monanafa o'age'nae. Afa'a umenitata nehageno'ae'mo apaka tege anife'mo hapauge nehigeno'ae'mo apakupi mafa'ne'age'mo apaunena ai'niye. Ani kava hu'a hanageke ya'mo ali'ne'apae'mo Ala kava nefeke'mo keya ae'a ge hu'nageno'ae'mo lusi hanageke ya'mo ali'naya kavapati'mo apavalelino e'niye. Agaemo u'a maisaya taonifi'mo visayafe'mo fatago kate'mo apavalelino u'niye. O, Vaya'mogi Ala kava ne'mo'a muki vaya'aitegamo alagepa kava'amo agete'a hapau ai'naya kavafe'mo hao ke heyo. Agaemo hapau'nige'a hapa'ye nehiya vaya'mo alino falu huno apatege apaka neteya vaya'mo alagepa ya'mo alino apamige huno ne'maiya'mofe'mae.

10 Mago vaya'amogimo Goti'apimo ge'amo ago amagi'a atalete'a anaga hogote vekamo'a hisaya kavafe'mo hu'niya gee'mo, afa gemo hu'niye, hu'a hute'a atale'naya'mofe'mo seli nofiteti'mo kino apate'nige'a hani hu'niya yapi'mo ulunapi'mo mai'ne'a falisaya kavapi'mo mai'nae. 12 Ani kava hu'naya'mofe'mo lokiya ali'ya'mo alino apami'nigeno'ae'mo lokiya'apimo alagi hano hu'niye. Apakaemo mopafi'mo asagau'a ai'nage'apae'mo mago hapa maesaya vaya'mo alagi o'mai'nae. 13 Ani kava hu'a hanageke ya'mo ali'a mai'ne'ae'mo Ala kava nefe'mo keya ae'a ge hu'nageno afiteno hanageke ya'mo ali'naya kava'apifati'mo apakufamo alino katino apate'niye. 14 Agaemo seli nofi'mo alino kapalu aeno ataleteno hani hu'niya yapi'mo ulunapi'mo mai'ne'a falisaya kavapati'mo apavalelino u'niye. 15 O, Vaya'mogi Ala kava ne'mo'a muki vaya'aitegamo alagepa kava'mo nehiya kava'amo agete'a hapau ai'naya kavafe'mo hao ke heyo. 16 Na kava hu'niya'mofe'mo hao ke hegae. Agaemo yafa lafi kegi'yale kate'mo aeni kitamo alino lo aeteno lokiya aenileti'mo ka akani male'naya aenimo alino lo ae male'niye.

17 Negi nagi vaya'mogimo Goti ge'amo ago amagi'a atalege hosu kava'mo huge hu'naya'mofe'mo kaita hapau'niye. 18 Muki alu ne'ya alu ne'yafe'mo ohapau'niya'mofe'mo faligefe'mo hu'a mai'nae. 19 Ani kava hu'a hanageke ya'mo ali'ne'apae'mo Ala kava nefeke'mo keya ae'a ge hu'nageno hanageke ya'mo ali'naya kava'apifati'mo apakufamo alino katino apate'niye. 20 Goti'a ge'amo alino ate'nigeno emine'niya ge'aleti'mo alino alagepa huno apate'niye. Agaemo falisaya agufa hanageke ya'mo ali'naya kavategati'mo apavalelino u'niye. 21 O, Vaya'mogimo Ala kava ne'mo'a muki vaya'aitegamo hu'niya alagepa kava'amo agete'a hapau ai'naya kava'ae'mo hao ke heyo. 22 Apakaemo Gotife'mo hao ke hesaya ofalinimo amagi'a amiyo. Amite'a ali'ya'alefe'mo apamogaga aite'apae'mo ae'a hakalo hiyo.

23 Alopa solovala anipi'mo sipifi'mo ali'ya'mo ne'aliya vaya'mogimo 24 Ala kava ne'mo ali'ya'amo agege solovala anite'mo hu'niya kava'amo agete'a hapau ai'naya kava'mo agege hu'a ne'agae. 25 Agaemo yasi aliyo, huno nehigeno'ae'mo lusi kava huno yasimo ali'nigeno ani'mo'a aino holakau holakau huteno apavalelino haiteno lamiteno nehiye. 26 Sipifi mai'naya vaya'aite'mo lusi hanageke ya'mo afole ai'nige'a koku'napilagamo haite'a emi'e'a afepilagamo lamite'a hu'nageno'ae'mo apakupi mafa'nemo'mo ani hegekana hu'niye. 27 Alopa ani'mo nete'a negi nagi hute'a laku taka nehaya vayakana hu'a mai'nae. Alagepa huta maisunafe'mo na kava hisupi hu'a apakesamo o'afi'nae. 28 Ani kava hu'a hanageke ya'mo ali'ne'apae'mo Ala kava nefeke'mo keya ae'a ge hu'nageno'ae'mo hanageke ya'mo ali'naya kavapati'mo apakufamo alino katino apate'niye. 29 Agaemo yasie'mo afa'a maiyo, huno hu'nigeno'ae'mo ani'e'mo afa'a hane'na'ae. 30 Ani'mo afa'a hane'nige'a apamogaga ai'nae. Ani kava huno apavalelino uno solovala ani agi'nale'mo hane'niya taonifi'mo u'a ava'yi hute'a alagepa hu'a maisayafe'mo hu'niya taonifi'mo apate'niye. 31 O, Vaya'mogimo Ala kava ne'mo'a muki vaya'aitegamo hu'niya alagepa kava'amo agete'a hapau ai'naya kava'ae'mo hao ke heyo. 32 Apakaemo ali'a anupa hu'a maisayate'mo ala agi'amo amiyo. Apakaemo vayatama vaya'mogi ali'a anupa hu'a maisayate'mo agi'ale'mo ali'a asaga hu'a ateyo.

33 Ala kava ne'mo'a alopa ani'mo alino leneno ne'atale. Haine ne'eya meti ani'mo alagi alino hano huno ne'atale. 34 Vaya'mogimo hosu kava'mo hu'naya'mofe'mo mopafati'mo asole ne'ya'mo ne'aeya mopa'apimo alino hosu mopamo hamaleno ne'ate. 35 Nehiya'monanafa hau hu'niya mopamo alino lanitani mopamo hamaleno ne'ate. Ani'mo ohane'niya mopafati'mo ani'mo alo huno ate'nigeno haine ne'e. 36 Agaemo apaka neteya vaya'mo ani mopale'mo maisayafe'mo apavalelino uno ne'apate. Apakaemo maisaya taoni'apimo kisayafe'mo apavalelino uno ne'apate. 37 Apakaemo asole ne'ya'apimo alisayafe'mo avina ya'mo hakalege nofi alagamo faige hu'a mai'nae. 38 Ala kava ne'mo'a hapa ne'maege'apae'mo asole mafa'nemo ali'a ne'apatae. Pulumaka anaga'mo hapa ne'maege'apae'mo mago'e hu'a ai'a atagu nefae.

39 Kame vaya'apimogi kana ya'mo ali'a apamige hanageke ya'mo ali'a apamige hu'a ali'a apamisageno'ae'mo apaipamo'mo kana hisige'a alagepa hu'a o'maisaya afina'mo Ala kava ne'mo'a hapa maegaiye. 40 Agaemo kame vaya'apile'mo ne'yagaiya vaya'mo alino afepi apate'nige'a ka'mo ohane'niya ka'me kotegamo afa'a umenitata nehae. 41 Alino afepi'mo ne'ateya'monanafa kagemi ya'apimo o'male'naya vaya'mo alino asaga huno ana'ale'mo ne'atege'a hanageke ya'mo no'aliye. Hapa ne'maege'a afamo anaga'mo magokepi'mo lokae'a mai'naya sipisipi anagakana hu'a mai'nae. 42 Fatago vaya'mogimo ani kava'mo agete'apae'mo apamogaga ne'aiya'monanafa hosu vaya'mo apavayale'mo alino akani male'nige'a apake no'aiye.

43 Muki afite'a age'naya vaya'mogimo ani kavafe'mo apakesa afifi hu'a maigae. Apakaemo Ala kava ne'mo'a vaya'ae'mo hau ayamopafi'mo hau'niya kava'amo age'a aeto hugae.

Copyright information for `KYG