Psalms 118

Muki afina'mo hau huno ne'apateyanageno ani kava huno hau huno apategaiye, huno hu'niya gemae

Ala kava ne'mo alagepa vekamo mai'niya'mofe'mo agaefeke'mo hao ke heyo. Hau huno ne'apateyanageno muki afina'ae'mo hau huno apatege apatege huno maigiye. Isaleli vaya'mogitamo, Hau huno ne'apateyanageno muki afina'ae'mo hau huno apatege apatege huno maigiye, huta higetao. Eloni nofi vaya'amogitapamo, Hau huno ne'apateyanageno muki afina'ae'mo hau huno apatege apatege huno maigiye, hutapa hiyo. Muki vaya'amogitapamo agaefeke'mo koli hutetapa mono nehaya vaya'mogitapamo, Hau huno ne'apateyanageno muki afina'ae'mo hau huno apatege apatege huno maigiye, hutapa hiyo.

Lusi hanageke ya'mo ali'ne'nae'mo Ala kava nefeke'mo keya ae'na ge hu'nogeno'ae'mo ge'nimo afiteno hatu maeno nate'nige'na afa'a mai'nove. Ala kava ne'mo nagae vekamogeno naha maesiyafe'mo mai'niya'mofe'mo vaya'mogi nagaetegamo hisaya kavafe'mo koli osuguve. Ala kava ne'mo nagae vekamogeno naha maesiyafe'mo mai'niya'mofe'mo apake'novana kame vaya'nimo asagau'a aigae. Vaya'mogimo laha maesayafe'mo lagesamo afisunana kanale osugifa Ala kava nefeke'mo laha maegaiye, huta lagesamo afisunana kanale hugiye. Ala apaki alite'a ne'yagaiya vaya'mogi laha maesayafe'mo lagesamo afisunana kanale osugifa Ala kava nefeke'mo laha maegaiye, huta lagesamo afisunana kanale hugiye.

10 Muki alu nofi vaya alu nofi vaya'mo kame vaya'nimo mai'ne'a fai'a ku ai'a nate'nage'nae'mo Ala kava ne'mo himamu'aleti'mo alagi ali'na hano hu'na apatalegauve. 11 Muki haopalega mai'ne'a fai'a ku ai'a nate'nage'nae'mo Ala kava ne'mo himamu'aleti'mo alagi ali'na hano hu'na apatalegauve. 12 Kevegevegana hu'a fai'a ku ai'a nate'naya'monanafa aufe nofipi'mo malage huno atamo leno yu neheya kava hu'na Ala kava ne'mo himamu'aleti'mo alagi ali'na hano hu'na apatalegauve. 13 Kame'nimogae, hu'na, alika nago'ya faitalanage'na heleve hugefe hu'nogeno'ae'mo Ala kava ne'mo'a naha mae'niye. 14 Ala kava ne'mo'a lokiya vaino nate'nige'na yoke nehuve. Agaemo nagufamo ago alino katino nate'niye. 15 Afiyo, hu'na, alagepa vaya'mogimo seli no'apifati'mo apakufamo ago alino katino apate'niya kavafe'mo yoke hu'apae'mo, Ala kava ne'mo'a himamu'aleti'mo ani kava'mo hu'niye. 16 Himamu'aleti'mo aeta apakase'none, hu'a nehae. 17 Ofali'na afa'a mai'ne'nae'mo Ala kava ne'mo'a hu'niya kavafe'mo ava gemo ae'na hakalo hu'na hapa paiguve. 18 Ala kava ne'mo'a lusi kava huno namagi'niya'monanafa falisuvafe'mo afa'a o'natale'niye.

19 Alopa mono no'mo kitamo yakika natege'nao hai'na Ala kava nefe'mo hao ke heno. 20 Ala kava ne'mo'a kipa'amo hane'nige'a alagepa vaya'age'mo fale'a nehaiye. 21 Ge'nimo afiteka nagufamo alika katika nate'nana'mofe'mo kahao ke nehove.

22 Yafateti'mo no nekiya vaya'mogimo mago no nekiya yafafe'mo, afa yafane, hu'a hute'a ali'a yaga au'a atale'nageno'ae'mo Goti'a ani yafafe'mo, hogote yafa'mo no'mo fai'na atesuvafe'mo konale yafa'mo hane'niye, huno huteno alino asaga huno ate'niye. 23 Ala kava ne'mo'a ani kava'mo hu'nigetae'mo ageteta aeto agufa kanale kava hu'niye, huta lahau ai'none. 24 Ala kava ne'mo'a ani afina'mo hu male'niye. Ani afina'mo lamogaga aigetao. 25 Aukaya hutae'mo, O Ala kava nene, huta, lagufamo alika katika lato. O Ala kava nene, huta, laha maegeno'ao ali'yatimo'mo alagepa huno afole aino, huta aukaya nehune. 26 Goti'a Ala kava ne'mo agi'alefe'mo ne'eya vekamo fiku ha maeno amino. Lagaemo Ala kava ne'mo mono no'afati'mo Goti'a fiku lapa maeno lapamino, huta nehune. 27 Ala kava ne'mo Goti'a mai'niye. Agaemo ha le ya'amo alino lami'niye. Ofalini afumo alitapa hi'yalamute'mo male'netapa nofiteti'mo kitapa atafau maleyo. 28 Goti'nimogamo mai'nananage'na kahao ke hegauve. Goti'nimogamo mai'nananage'na ala kagikamo kamiguve.

29 Ala kava ne'mo alagepa vekamo mai'niya'mofe'mo agaefeke'mo hao ke heyo. Hau huno ne'apateyanageno muki afina'ae'mo hau huno apatege apatege huno maigiye.

Copyright information for `KYG