Psalms 12

Goti'a yagaino latesigeta alagepa huta maigune, huno hu'niya gemae

Ala kava nene, hu'na, Hemenimo kagaefeke'mo mono nehaya vaya'mo o'mai'naya'mofe'mo laha mao. Ma mopafi vayapati'mo fatago vaya'mo ago fali'a hano hu'nae. Muki vaya'mogimo afa gege'mo hapa nepaiye. Aigofe geleti'mo hu'a hapaoke nehae.

Ala kava ne'mo'a aigofe gemo hute'a hu'a hapaoke nehaya vaya'mo kayo'mo apamigiye. Ala apakimo alisayafe'mo ge nehaya vaya'mo alagi alino hano huno apatalegaiye. Apakaemo, getileti'mo afa'a huta aeta apakasegaune. Lahau'niya gemo afa'a hugune. Ina la'mo yagaino nelate, hu'a nehae.

Ala kava ne'mo'a huno'ae'mo, apakaemo kagemi ya'apimo o'male'naya vaya'mo ali'a afepi ne'apatae. Kafu hute'a alagepa hu'a no'maiya vaya'mogimo ha ha nehaya'mofe'mo he ti'na hapa maegauve. Afa'a maisayafe'mo hapau'niyanage'na hapa maete'na ali'na alagepa hu'na apategauve, huno hu'niye.

Ala kava ne'mo ge'amo alagi lama ge'age'mo hane'niye. Vaya'mogimo siluva yafa'mo ali'a atafi'mo seveni afina'mo kaete kaete hu'a kae'nageno'ae'mo muki o'ani'ya fai'niya ya'amo leno hano huno atale'nigeno siluva yafa'age'mo alino afole ne'aiya kava huno Goti ge'amo alagi lama ge'age'mo hane'niye. Ala kava nene, hu'na, yagaika latesanageta alagepa huta maigune. Muki afina'mo laha maesanage'apae'mo hosu vaya'mogi olatafaugae.

Alagi hosu kava'mo nehaya vaya'mogimo ala apakimo ne'alige'apae'mo hosu vaya'mogimo muki haopalegamo umenitata nehae.

Copyright information for `KYG