Psalms 122

Mono notegamo ugefe nehaiya vaya'mo kate'mo nehai'apae'mo nehaya yokemae

Apakaemo, Ala kava ne'mo no'afi'mo haigetao, hu'a naha pai'nage'nae'mo namogaga ai'nove. Uta ava'yi huteta haita mai'netae'mo, O Yulusalemuo, huta, lagaemo eta kagae yafa lafi kegi'yafi'mo he tita mai'none, huta nehune.

Yulusalemu taonimo ki'nageno magokepi'mo lokaeno alagepa huno hane'niye. Muki nofi vaya'mo hai'a nefalae. Ala kava ne'mo nofi vaya'amogimo Ala kava nefeke'mo hao ke hesayafe'mo Isaleli vaya'aife'mo Goti ge'amo afisayategamo haite haite hu'a nehaiye. Ani taonifi'mo Nevini nofi vayapati kini vaya'mogimo fai mai'ne'a ali'a fako hu'a ne'apataya sia'apimo hane'niye.

Yulusalemu vaya'mo alagepa hu'a mai'a falu hu'a maisayafe'mo nunumu hutapa apateyo. Yulusalemu taonie'mo hapau'nisiya vaya'mogimo alagepa hu'a maiyo. Yafa lafi kegi'yafi'mo alagepa hu'a magokepi lokae'a maiyo. Kini vaya'mogi no'apifi no'apifi'mo alagepa hu'a maiyo. Konaga'nimogi'e nafalu'nimogi'e'mo alagepa hu'a maisayafe'mo hu'nae'mo, yafa lafi kegiyafi'mo alagepa hu'a magokepi lokae'a maiyo, hu'na nunumu hu'na ne'apatove. Ala kava ne'mo Gotitimo no'ae'mo nagesa afi'nae'mo agae taonimo alagepa huno hanesiyafe'mo nayamukiki huguve.

Copyright information for `KYG