Psalms 139

Goti'a muki afina'mo nelage, huno hu'niya gemae

Ala kava nene, hu'na, alagi nageka alagepa huka nage'nane. Nagaemo itopale'mo ne'maufi he ti'na ne'maufi hu'na mai'nogekae'mo ne'nagane. Kagaemo afagitegamo mai'nekae'mo nagesa ne'afuva nagesamo ne'nagane. Umenitata huge havaege nehugekae'mo nageteka muki nehuva kava'nimo ago ne'nagane. Ge osu'nova'monanafa Ala kava nene, hu'na, henaga'amo hisuva ge'nimo ago age'nane. Yagaika ku aika nateteka nagaete'mo kaya'mo maleka ne'natane. Ago nage'nanana kagae kaipa kagesamo'mo nagae naipa nagesamo ago aeno agase'niyanage'na afa'a o'agegauve. Kagaetegati'mo fai'na kasalo paetale'na haiyategamo uguve. Mai'nanategamo u'na o'mai'na naote'mo maisuvafe'mo haiyategamo uguve. Koku'napi'mo hai'na maisuvana mai'nane. Nagaemo fali'naya vaya'mo u'a mai'naya kotegamo lami'na maiguvana mai'nane. Yegemo haineno'ae'mo hayomo ne'aeya ya'mo'a afagitega mopa atupale'mo malage huno ne'viya kava hu'na malage hu'na afagitega u'na maiguvana mai'nane. 10 Afagitega u'na mai'nisugekae'mo kayateti'mo navalelika egane. Ani kava huka lamaga kayateti'mo natafauka maigane. 11 Nagaemo, hani huka aika nati kao, hu'na hisuvana hani hu'niya yapi'mo ha le yakamo'a aeno ha le'nigeka ne'nagane. 12 Hani hu'nisiya yapi'mo u'na fala kisuvana nagegane. Yegemo'mo aeno ha neleya kava huno kagae kaulagale'mo hanipi'mo aeno ha nele. Hani nehiya kava'mo'mo kagae kaulagale'mo ha le yakana huno hane'niye. 13 Muki nahau nayamopafi'mo hane'niya ya'a'nimo kagaikamo alo hu'nanageno kagaika ya'mo hane'niye. Muki nagufafi'mo hane'niya ya'a'nimo alo huteka alika ita'nimo aipafi'mo magokepi male'nane. 14 Kagaemo alagepa huka alo huka nate'nana'mofe'mo koli hute'na kagikale'mo ali'na asaga nehuve. Nagaetegamo hu'nana kava'mo agete'nae'mo nahau ne'auve. Hu'nana kavafe'mo alagepa kava'mo hu'nane, hu'na hute'na ali'na namalagi'nove. 15 Ita'nimo aipafi'mo mai'nogeno'ae'mo nayamufa'nimo afole aiteno kosime kosime u'nigeka nage'nane. 16 Ita'nimo'mo aipafati'mo alino o'nate'niya afina'mo muki nagufafi'mo hane'niya ya'a'nimo ago age'nane. Ma mopafi'mo afole ai'na o'mai'nogekae'mo na magi afina'mo ma mopafi'mo maisapi huka mukufi'mo ago avo'mo kae male'nane. 17 Nagaefe'mo kagesamo ne'afina kavakamo'mo aeto agufa kanale ya'mo hane'nigeno ne'nahaiye. Nagaefe'mo kagesamo ne'afina kava'mo lusi asole kava'mo hane'niye. 18 Lekana paiguvana ani kahaepale'mo aise yafa'mo ago aeno agase'niya agufa ya'mo hane'niye. Naupati'mo he ti'nae'mo kagae'eke'mo mai'no'ae. 19 O Gotiyo, hu'na, hosu vaya'mo apamagisanafe'mo ne'nahaiye. Kaveta nehapaya vaya'mo natale'a visayafe'mo ne'nahaiye. 20 Apakaemo kagaefe'mo hosu gemo hute'a hu'a faipa hu'a nekatae. 21 O Ala kava nene, hu'na, Apaini hu'a nekataya vaya'aife'mo naini hu'na ne'apatove. Apakame'yamo nekamiya vaya'ai apaulagafi'mo navenatu'na he'na ne'apatove. 22 Nagaemo apakaefe'mo alagi o'nahau'nige'nae'mo, kame vaya'nie, hu'na nehuve. 23 O Gotiyo, hu'na, naipa nagesafi'mo alagepa huka alika fako huka nago. Naipa nagesafi'mo aulu haeka ago. 24 Naipafi'mo hosu kava'nimo hane'nifigi ageteka alagepa hu'na maige maige hu'na maisuva kate'mo navalelika uvo.

Copyright information for `KYG