Psalms 145

Goti'a alagepa kava'mo nehiye, huno hu'niya gemae

Goti'nimogamo kini ne'nimogae, hu'na, kagaefeke'mo ala vekamo mai'nane, hu'na huguve. Muki afina'mo kahao ke hege hege hu'na kahao ke hegauve. Muki afina'ae afina'ae'mo kahao ke hegauve. Muki afina'mo kagikale'mo ali'na asaga huge huge hu'na maiguve. Ala kava ne'mo ala ne'mo mai'niya'mofe'mo agi'ale'mo ali'a asaga hu'a atesaya vekamo mai'niye. Ala agi'amo hane'niya'mofe'mo ageta aeto osugune. Ita'api afo'apimogimo hu'nana kavafe'mo, lusi alagepa kava'mo hu'niye, hu'a ali'a apatesaya mafa'ne'apie'mo kava gemo hu'a hapa paitesage'apae'mo apakaemo henaga'amo ali'a apatesaya mafa'ne'apie'mo kava gemo hu'a hapa paite hapa paite huli'a ugae. Apakaemo kagaefe'mo hu'apae'mo, ha le konali ya'agi ala agi'agi huno hane'niya vekamo mai'niye, hu'a hisage'nae'mo nagae'e'mo aeto agufa kanale kavakae'mo nagesa afifi hu'na maiguve. Vaya'mogi lokiya kava'mo nehana kavakae'mo kava gemo hisage'nae'mo nagae'e'mo, ala vekamo mai'niye, hu'na huguve. Apakaemo kanale alagepa kava'mo nehana kavafe'mo kava gemo hu'a hapa paige fatago kavakae'mo yokemo huge hu'a maigae. Ala kava ne'mo'a fiku laha maeno lamige hau huno latege malage huno aipamo leno olatege hau ayamopafi'mo hauge huno ne'maiye. Agaemo muki vaya'aitegamo alagepa kava'mo huteno muki alo hu male'niya yatega'e'mo hau huno ne'apate. 10 O Ala kava nene, hu'na, muki alo hu'nana vaya'mogi'e ya'mogi'e'mo kagikale'mo ali'a asaga hugae. Muki vayakamogimo kahao ke hegae. 11 Apakaemo muki vaya'mogimo lokiya kava'mo nehana kavaka'e ha le konali yakaleti'mo ne'yagaina kavakale'efe'mo ava gemo afisayafe'mo ne'yagaina kavafe'mo, lokiya himamu'aleti'mo ani kava'mo nehiye, hu'a hugae. 13 Muki afina'mo yagaige yagaige huka yagaigane. Ala kava ne'mo'a, ma kava'mo huguve, huno hu'niya gemo akame huno ani kava'mo nehiye. Muki kava'amo alagepa kava'age'mo hane'niye. 14 Agaemo hanageke ya'mo ne'aliya vaya'mo hapa maege asagau'a ai'naya vaya'mo alino he tino apatege huno ne'maiye. 15 Muki afa'a ne'maiya ya'mogi'e vaya'mogi'e'mo apaka neteya afina'mo kagaefe'mo apakesamo ne'afigekae'mo ne'ya'mo ne'apamine. 16 Hapau'nigekae'mo ne'apamine. 17 Ala kava ne'mo'a muki afina'mo ani kava nehuno'ae'mo fatago kava'mo huge yagu yaga kava'mo huge nehiye. 18 Ala kava ne'mo'a agaefe'mo apaipafati'mo keya ae'a ge nehaya vaya'ai hapaopale'mo eno ne'maiye. 19 Agaefe'mo koli hu'ne'a mono nehaya vaya'aitegamo hapau'nisiya kava'mo afa'a hugiye. Keya ae'a ge nehageno'ae'mo apakufamo alino katino ne'apate. 20 Ala kava ne'mo'a agaefe'mo hapau apayamofi'mo hapau'niya vaya'aite'mo yagaino ne'apatege'a afa'a ne'maiye. Afa'a ne'maiya'monanafa muki hosu vaya'mo alino apago'ya lagauno apatalegaiye. 21 Muki afina'mo Ala kava ne'mo agi'ale'mo ali'na asaga hu'na ategauve. Muki afina'mo muki afa'a ne'maiya ya'mogi'e vaya'mogi'e'mo aote agi'ale'mo ali'a asaga hiyo.

Copyright information for `KYG