Psalms 22

Kalaisi'a fali'niya kavafe'mo ava gemo hu'niya gemae

Goti'nimogae Goti'nimogae, na kava higekae'mo nataleka u'nane. Naha mao, hu'na keya ae'na ge nehuva'monanafa na kava higekae'mo nataleka uka afagi'ale'mo mai'neka naha no'mane. O Goti'nimogae, hu'na, felugamo keya ae'na ge hu'nogekae'mo ge'nimo o'afi'nane. Hani'ilaga'e'mo keya ae'na ge hu'nogekae'mo naha o'mae'nanage'na mai'na falu nosuve. Kagaefe'mo ge hu'nova'monanafa kaote vekamo mai'nane. Kaote vekamo mai'nanage'apae'mo Isaleli vaya'mogimo kagikale'mo ali'a asaga hu'a nekatae. Laginago vaya'mogimo kagaefeke'mo apakesamo afi'a fatago hu'nagekae'mo hapa mae'nane. Kagaefeke'mo keya ae'a ge hu'nagekae'mo apakufamo alika katika apate'nane. Kagaefeke'mo apakesamo afi'nagekae'mo hapa mae'nanage'apae'mo apaipamo'mo kana osu'niye.

Hu'naya'monanafa nagaemo vayakana hu'na o'mai'nofa hagifagana hu'na mai'noge'apae'mo ina agufa vekamo mai'niye, hu'a hute'a apakame'ya ne'namiye. Muki vaya'mogimo nagete'apae'mo hu'a faipa hu'a ne'natae. Sagani hu'a natege keka hu'a natege hute'apae'mo, Ala kava ne'mo'a ha maesiyafe'mo agesamo afi'niyana na kava higeno'ae'mo ha no'mae. Ala kava ne'mo'a amuse huno ne'atesiya'mo'mo na kava higeno'ae'mo ha no'mae, hu'a nehae. Nehaya'monanafa kagaemo ita'nimo'mo alagepa huka ha mae'nanageno alino nate'niye. Nute mafa'nemo mai'nogekae'mo alagepa huka yagaika nate'nanage'na afa'a mai'nove. 10 Nagaemo ita'nimo'mo alino nate'niya afinateti'mo kagaefeke'mo nagesamo afi'na fatago hume hume e'nove. Ita'nimo'mo alino nate'niya afinateti'mo muki afina'ae'mo Goti'nimogamo maige maige huka mai'nane. 11 Nagufale'mo hanageke ya'mo afole ne'aige'apae'mo naha maesaya vaya'mo o'mai'nayanagi nataleka uka afagi'ale'mo o'maiyo. 12 Kame vaya'nimogi Masani kotega afela ve pulumaka anaga'mogi nehaya kava hu'a fai'a ku ai'a ne'natae. 13 Laiyoni anaga'mogi apaka tege'apae'mo kae kae nehaya kava hu'a nagaetegamo apavayamo aka nehae. 14 Ani'mo ali'a mopafi'mo lakitalageno lamino hano nehiya kava huno lokiya'nimo alagi ohane'niye. Muki nayamufa'nimo uno aeno hani'niya nayamufamo aino hatu mae'niye. Naipamo'mo ani hegekana hu'niye. 15 Hapamo leno hau nehiya kava huno lokiya'nimo hau hu'nigeno lokiya'nimo alagi ohane'niye. Ani kava huno navenafu'namo hau hu'nigeno navayafi'mo aeno kamae'niye. Natale'nanage'na faligefe'mo nehuve. 16 Afela kalamogi afumo hapaesayafe'mo fai'a ku ai'a ne'apataya kava hu'a hosu vaya'mogimo fai'a ku ai'a ne'natae. Nayapi'mo nili aige naiyafi'mo nili aige hu'nae. 17 Muki nayamufa'nimo afole ai'nige'na age'nove. Kame vaya'nimogimo nagete'apae'mo apamogaga ne'aiye. 18 Muki kukena'a'nimo ali'a fako hu'a alite'a yatala kukena'nilefe'mo yokalo lete'apae'mo aeno apakase'niya vekamo'mo ali'niye. 19 Ala kava nene, hu'na, afagi'ale'mo uka o'mai'neka naha ne'mana veka'nimogae, hu'na, malage huka eka naha mao. 20 Nagupi mafa'nemo lageso osisiyafe'mo naha maeteka afela kalagana agufa vaya'ai apayapati'mo nagufamo alika katika nato. 21 Alopa afela laiyonimo avayafati'mo nagufamo alika katika nato. Afela ve pulumaka anaga'mogimo o'nahaesayafe'mo nagufamo alika katika nato.

Keya ae'na ge nehugekae'mo nagele'mo ali'nane.
22 Nagana'nimogife'mo kagaemo naha mae'nana kavafe'mo nava gemo hu'na ae'na hakalo hu'na hapa paiguve. Ali'a anupa hu'a ne'maiya vaya'ai folaga'apifati'mo kagikale'mo ali'na asaga huguve. 23 Ala kava nefeke'mo koli hutetapa mono nehaya vaya'mogitapamo ala agi'amo amiyo. Yekopu nofi vaya'mogitapamo agi'ale'mo alitapa asaga hiyo. Isaleli nofi vaya'mogitapamo agaefeke'mo mono hiyo. 24 Hanageke ya'mo ne'aliya vaya'mo apataleno aino afe leno akame'ya no'apamifa keya ae'a ge nehageno'ae'mo ge'apimo afiteno hapa ne'mae. 25 Asole vaya'mo ali'a anupa hu'a ne'maiya folagapati'mo kagikale'mo ali'na asaga huguve. Kagaefe'mo mono nehaya vaya'ai apaulagale'mo kagaefe'mo ani kava huguve, hu'na kaha pai'nova kava'mo huguve. 26 Ala apaki'apimo o'ali'a yagu yaga hu'a ne'maiya vaya'mogi ne'ya'mo ne'a apamu hugae. Agaefe'mo kahauya hu'a agesayafe'mo ne'aya vaya'mogi Ala kava ne'mo agi'ale'mo ali'a asaga hugae. Muki afina'mo yu'ilaga vekatapimo alagepa huno maigiye.

27 Muki ma mopamo lole'e lole'e atupale'mo mai'naya vaya'mogimo Ala kava nefeke'mo apakesamo afite'a ai'a atagi ne'a agaetegamo egae. Muki alu nofi vaya alu nofi vaya'mogimo agaefeke'mo mono hugae. 28 Ala kava ne'mo kini vekamo mai'neno'ae'mo muki alu nofi vaya'aite'e alu nofi vaya'aite'e'mo yagaino ne'apate. 29 Ma mopafi'mo alagepa hu'a ne'maiya vaya'mogimo ne'ya'mo nete'a agaefe'mo mono hugae. Muki vaya'mogi apakai'apimo afa'a hapa o'mae'a faligefe hu'nisaya vaya'mogi apale'yamo fai'a ape hu'a maigae. 30 Afole aisaya vaya'mogimo ali'ya'amo aligae. Vaya'mogi ali'a o'apate'nayanage'a henaga'amo afole aisaya vaya'aife'mo Ala kava nefe'mo ava gemo huge lagufamo alino katino late'niye hu'a huge hu'a maigae.

Copyright information for `KYG