Psalms 36

Hosu vaya'mogimo hosu kava hu'a mai'naya'monanafa Ala kava ne'mo'a vaya'amo hapa ne'mae, huno hu'niya gemae

Goti'a hosu vaya'ai hosu kava'apie'mo apava gemo huno naha pai'niya gemo naipafi'mo hane'niyana apakaemo Goti'mo apakame'ya amite'a koli nosae. Ala vaya'mo mai'none, hu'a nehaya'mofe'mo Goti'a hosu kavatimo o'agege hosu kava'mo nehae, huno osuge nehiye, hu'a apakesamo ne'afiye. Hosu gemo huge aigofe gemo huge hu'a ne'maiye. Afite'a age'naya kava'e alagepa kava'api'e'mo atale'a afa'a ne'maiye. Hipa'apile'mo havae'a mai'ne'apae'mo hosu kava'mo hisayafeke'mo apakesamo ne'afiye. Muki nehaya kava'apimo hosu kava'age'mo hane'nige'apae'mo muki hosu kava'apie'mo, ha'ao, alagi o'nahaiye, hu'a nosae.

Ala kava nene, hu'na, olataleka lagaefe'mo kahau huka nelatana kavakamo'mo lusi yatala ya'mo koku'napi'mo nehaiya agufa yatala yakana huno hane'niye. Ani kava'mo huguve, huka nehana gekamo alagi amagika o'ataleka akame huka nehana kavakamo'mo ina kava huno hiyate'mo nehaiya agufa yakana huno hane'niye. Alagepa kavakamo'mo avegana huno lusi ya'mo hane'niye. Alagepa huka alika fako huka ne'apatana kavakamo'mo solovala ani'mo vasilonagana huno hane'niye. Ala kava nene, hu'na, vayatenagi afulenagi yagagafalenagi huka yagaika ne'apatanage'a afa'a ne'maiye.

O Gotiyo, hu'na, olataleka lagaefe'mo kahau kayamopafi'mo kahau'niya kavakamo'mo alagepa kanale kava'mo hane'niya'mofe'mo lahau'niye. Kahakumo aune'afi'mo uta fala kita ne'maune. Lusi ne'ya'mo nelaminageta alita ne'nonageno'ae'mo lamu nepae. Nelaminagetae'mo lamogaga aisunafe'mo alopa anipati'mo ani'mo ne'none. Maige maige huta maisuna kava'mo aepa vekamo mai'nane. Ha le yakamo'mo aeno ha nelegetae'mo ha le yakamo ageta alagepa huta ne'agone. 10 Kage'naya vaya'mo o'apataleka mago'e huka kahau kayamopafi'mo kahaino. Api kava'mo nehaya vaya'aitegamo alagepa kava'mo huvo. 11 Himu'namu'mo nehaya vaya'mo nagaetegamo o'mesayafe'mo esaya kate'mo ka'mo akani malo. Hosu vaya'mogimo ali'a nahafai'a o'natalesayafe'mo naha mao.

12 Ageyo, hu'na, Goti'a hosu vaya'mo apamagi'nige'a mopafi'mo asagau'a aite'a havae'a mai'nae. Halate he otigae.

Copyright information for `KYG