Psalms 37

Ala kava nefe'mo agava ne'maiya vaya'mogimo ma mopamo alisaya kavafe hu'niya gemae

Hosu vaya'mogi nehaya kava'apie'mo lapakesa ala'amo afitetapa lapausoli osiyo. Hosu kava'mo nehaya vaya'aife'mo alagepa kava'mo hu'a ne'maiyanageta apakaekana huta maigesune, hutapa osiyo. Kahaumo malage huno leno falu neteya kava hu'a malage hu'a falu tegae. Aise yosamo ne'vaiya kava hu'a vaigae. Ala kava nefeke'mo lapakesamo afita fatago hutetapa alagepa kava'mo higeno'ao lapa maesigetapa ma mopafi'mo alagepa hutapa maigayanagi. Ala kava nefeke'mo amuse hutapa ategeno'ao lapaipafi'mo lapau'nisiya kava'mo alino lapamino. Lapakaemo lapakesamo afitapae'mo lagaetegamo na agufa kava'mo afole aisifi, hutapa lapakesa afisaya kava'mo alitapa Ala kava ne'mo amitetapa agaefeke'mo lapakesamo afita fatago higeno lapa maeno. Lapa maesigeno'ae'mo alagepa kavatapimo yegekana huno aeno ha legaiye. Ani kava huno fatago kavatapimo vaya'ai apaulagale'mo alino afole aino ategaiye. Ala kava ne'mo aulagale'mo afa'a mai'netapae'mo agava maige maige hutapa maiyo. Hosu kava'mo hute'a alagepa hu'a ne'maiya kavafe'mo lapakesa ala'amo afitetapa lapausoli osiyo.

Lapaipamo oletapa hosu kavategamo alagi lapayamukiki osiyo. Lapakaemo hosu kava'mo hisayafe'mo lapakesa ala'amo afitetapa ataletapa lapausoli osiyo. Hosu kava'mo nehaya vaya'mo kayo'mo alite'a faligaya'monanafa Ala kava nefe'mo agava ne'maiya vaya'mogimo ma mopamo aligae. 10 Aise afina'mo utesige'a hosu vaya'mo alagi lageso hisagetapae'mo mai'naya kotegamo utapa kahauya hutapa o'apakegae. 11 O'apakegaya'monanafa falu fala apaipa vaya'mogimo ma mopamo alite'a alagepa hu'a magokepi lokae'a mai'ne'a apamogaga ai'a maigae.

12 Hosu vaya'mogimo fatago vaya'aitegamo hosu kava'mo hisayafe'mo ina kava hugune, ma kava hugune, hu'a hute'a mai'ne'apae'mo hosu apaugosamo kali'ne'a maku make hu'a ne'apatae. 13 Ala kava ne'mo'a alino apago'ya lagauno apatalesiya afinafe'mo afa'a apakeno mai'niya'mofe'mo apakaefe'mo kigi huno ne'apate. 14 Hosu vaya'mogi hosu ya'mo ne'aliya vaya'e ina agufa vaya'e'mo afa'a apate'ne'a api kava'mo nehaya vaya'mo naipeleti'mo apaisayafe'mo asagige atileti'mo hapaesayafe'mo atimo alige hu'a ne'maiye. 15 Naipe'apimo'mo apakai'api apaipafi'mo aesigeno'ae'mo ati'apimo lo aegaiye.

16 Mago fatago vekamo'a aise kagemi ya'amo hane'niya ya'amo'mo muki hosu vaya'ai alopa kagemi ya'apimo ago aeno agaseno hane'niye. 17 Na kava higeno'ae'mo ago aeno ne'agase. Ala kava ne'mo'a hosu vaya'ai himamu'apimo alino hano huno atalegaiya'monanafa fatago vaya'aite'mo alagepa huno yagaino ne'apateya'mofe'mae. 18 Ala kava ne'mo'a fatago vaya'mo alagepa hu'a maigae, huno apake'niye. Hetama'apimo afa'a hanege hanege huno hanegaiye. 19 Hanageke ya'mo afole aisiya afina'mo hosu hanageke ya'mo o'alige kafu hisaya afina'mo kafu osuge hu'a alagepa hu'a maigae. 20 Maigaya'monanafa hosu vaya'mo faligae. Kahaumo ausegana hu'a maige halinagana hu'a maige hu'a ne'maiya'mofe'mo alagi lageso hugae.

21 Hosu vaya'mogimo fiku alite'apae'mo anona'apilefe'mo no'apamiya'monanafa fatago vaya'mogimo hapau hu'a apatete'a fiku ne'apamiye. 22 Ala kava ne'mo'a fiku hapa ne'maeya vaya'mogimo ma mopamo alitesageno'ae'mo huno faipa huno ne'apateya vaya'mo alagi lageso hugae.

23 Ala kava ne'mo'a alagepa vaya'mogi hisaya kava'mo aepa vekamo mai'neno'ae'mo ani kava'mo ago hu male'niye. Ani kava huno nehaya kava'apimo ageteno'ae'mo amuse huno ne'apate. 24 Apakaemo asagau'a ne'aigeno'ae'mo Ala kava ne'mo'a apayate'mo alino he tino ne'apateya'mofe'mo alagi asagau'a o'aigae.

25 Nagaemo yatala afina'mo maime maime e'na hemenimo ago kosuna lova'monanafa Ala kava ne'mo'a fatago vaya'amo apataleno u'niya kava'amo o'agege mafa'ne'apimogi ne'yafe'mo aukaya hu'naya kava'mo o'agege hu'na o'age'nove. 26 Fatago vaya'mogimo muki afina'mo hapau hu'a apatete'a mago'e ya'mo ali'a apamite'a anona'apilefe'mo ne'apamiye. Ala kava ne'mo'a mafa'ne'apimo fiku hapa maeno ne'apamiye.

27 Hosu kava'mo ataletetapa alagepa kavake'mo hiyo maige maige hutapa alagi maigayanagi. 28 Ala kava ne'mo'a alagepa kavafeke'mo hau'niyanageno aote vaya'amo alagi apataleno o'ugiye. Yagaino apatenage'a hano osu'a maige maige hu'a maigaya'monanafa hosu vaya'ai mafa'ne'apimo alino hapa faino apatalegaiye. 29 Fatago vaya'mo mago mopamo apamisige'a alite'a ani mopale'mo maige maige hu'a alagi maigae.

30 Fatago vaya'mogimo agete'a afi'naya gemo huge gefi'mo alagepa hu'a ali'a fako hu'a afite'a ge huge hu'a ne'maiye. 31 Goti ke'aepa ge'amo apaipafi'mo hane'niyanage'a afa'a ae'a halu o'valegae. 32 Hosu vaya'mogimo fatago vaya'mo apamagisayafe'mo aulu hapae'a ne'apakae. 33 Ala kava ne'mo'a hosu vaya'ai apayapi'mo apavaleno o'apamino hapa maesige'a hosu vaya'mogimo agoti hu'a apatete'apae'mo hosu vayane, hu'a osugae.

34 Ala kava nefeke'mo agava mai'netapa ge'amo afigeno'ao lapakitapile'mo alino asaga huno lapateteno mopamo hakino lapamino. Agaemo hosu vaya'mo alino hapa faitalesige'a visagetapa apakegae. 35 Agovana hosu vekamo'a lokiya vaino yagaino apateno mai'neno'ae'mo mago yatala yosagana huno haino apakaseno mai'niye. 36 Mai'niya'monanafa henaga'amo u'na agovana o'mai'nige'na age'nove. Kahauya hu'novana o'age'nove. 37 Lapakaemo alagepa vaya'mo aulu hapaetapa apaketetapae'mo fatago vaya'mo apaketapa maiyo. Kana'apimo hano hisige'apae'mo alagepa hu'a maigaya'monanafa 38 gemo amagi'a ne'atalaya vaya'mo alagi alino hano huno apatalegaiye.

39 Ala kava ne'mo'a fatago vaya'ai apakufamo alino katino ne'apateya kava'amo aepa vekamo mai'niye. Hanageke ya'mo afole ne'aiya afina'mo himamu'aleti'mo hapa ne'mae. 40 Apakaemo Ala kava nefeke'mo apakesamo afi'a fatago nehaya'mofe'mo hatu maeno apateteno hosu vaya'ai apayapati'mo apavalelineno apakufamo alino katino ne'apate.

Copyright information for `KYG