Psalms 45

Ala kava ne'mo'a a'mo ali'niya kavafe'mo ava gemae

Alagepa gemo'mo naipafi'mo havai teteno aino vali nelamige'nae'mo kini vekaeke'mo ava gemo nehuve. Alagepa huno avo'mo nekaeya vekamo'a avo'mo kaesiyafe'mo avo kayo'mo aliteno alo huno ne'maiya kava hu'na navayafati'mo gemo hisuvafe'mo alo hu'na mai'nove.

Kagaemo aeto agufa kumani vekamo mai'neka muki vaya'mo alagi aeka apakaseka mai'nane. Goti'a fiku hapa maeno ne'apamiya gemo kavayafi'mo alino male'nigeka ani gemo nehane. Goti'a muki afina'mo kaha mae'niya'mofe'mae. Lokiya vekae, hu'na, kagaemo ha le konali yaka'e ala kagikale'efe'mo hapau aite'a amuse hu'a nekataya vekamo mai'nananagi naipekamo alika ano'afi'mo mapalukafi'mo falu kaeteka uka kame huvo. Kagaemo ala kagikamo alika apavelitekae'mo lama gekamogi yagu yaga kavakamogi fatago kavakamogi huka ha maeka alika afole aika ato. Alika afole aika atesanafe'mo hosile'mo fai mai'neka uka kame huka aeka apakaso. Lokiyakaleti'mo kame huteka hapau aisaya agufa kava'mo hugane. Kevekamo lusi kava huno ako'ya hu'niya kevemo hane'niyanageka kame vayakamogi apaipafi'mo nehapanage'apae'mo kaiyafi'mo asagau'a ne'aiye.

O Gotiyo, huno, muki afina'mo yagaika apatege apatege huka yagaika apategane. Fatago kava'mo huka vayakale'mo alagepa huka yagaika ne'apatane. Kagaemo alagepa kavafe'mo lusi kava huno kahau'nigeno hosu kavafe'mo alagi okahau'niye. Ani kava nehana'mofe'mo Goti'a Gotikamo'mo uvelimo faleno kateteno'ae'mo lekana paino kate'niyanageka alagepa huka kamogaga aika maisanafe'mo mago'e huno kami'nigeka kafalukamogimo aeka apakaseka alagepa huka mai'nane, huno ha pai'niye. Alagepa atumo ne'aiya ya'mo agi'amo meyagi alosigi kasiyagi huno hane'neno kukenakalegati'mo alagepa atumo ne'aiye. Alagepa no'mo kini vekamo nopi'mo konali ali'a ate'naya nopi'mo yokemo hu'nagekae'mo kamogaga aiteka emike'nane. Ala apaki a'nekamogi'e'mo kini vaya'ai a'mafa'ne'apimo mai'nae. Akamo'mo hogote goli yafateti'mo alo hu'naya konalimo aliteno lamaga kahaopale'mo he tino mai'niye.

10 Kini vekale'mo maisana a'mafa'nemogae, hu'na, kagesa afifi huteka kaipamo namiyo. Vayakae'mo kagesamo o'afige afokamo vaya'aife'mo kagesamo o'afige huteka kage kanika apatalegeno'ao kini vekamo'a, aeto agufa kumani a'nimo mai'nane, huno huteno amuse huno kateno. Ala kava nekamo mai'niya'mofe'mo agaefeke'mo mono huteka aiyafi'mo mai'neka ge'amo afiyo. 12 Taiya taonifi'mo mai'naya vaya'mo malaga vaya'mogimo fiku kaha mae'a kamigae. Kagemi ya'api'e vaya'mogimo hapa maesanafe'mo kagaetegamo ugae.

13 Kini vekamo a'mafa'ne'amo'mo agupi'mo aeto agufa alagepa kanale ya'mo hane'nigeno goli nofiteti'mo alo hu'naya kukenamo alino vai'niye. 14 Konali kukenamo le'niya kukena alino vaitesige'apae'mo kini vekalegamo avaleli'a ugae. Afalu'amogimo ve'e'mo magokepi lokae'a ohavae'naya a'mafa'ne anaga'mogi akame hu'a ne'vayanage'a kagaetegamo apavaleli'a ugae. 15 U'apae'mo apamogaga aite'a kini vekamo no'afi'mo apavaleli'a haigae.

16 Kagaemo asole mafa'nemo alika apatesanage'a kaginago vaya'ai apaimu'yale'mo maigae. Kagaemo muki ma mopafi vaya'aite'mo yagai'a apatesaya vaya'mo lekana paika apategane. 17 Nagaemo ala kagikamo kamisuge'a henaga'amo afole aisaya vaya'mogimo kagaefe'mo apake okani'a ala kagikamo kamigae. Muki vaya'mogimo kagikale'mo muki afina'mo ali'a asaga huge huge hu'a maigae.

Copyright information for `KYG