Psalms 49

Hosu vaya'mo alagepa hu'a o'maisaya kavafe'mo ava gemae

Muki vaya'mogitapae, hu'na, afiyo. Muki ma mopafi mai'naya vaya'mogimo mani gemo afiyo. Ala apaki vayanagi apaki ohane'nisiya vayanagi kagemi yatapi'e vayanagi kagemi yatapimo ohane'niya vayanagi hutapa afiyo. Nagaemo naipafi'mo nagesa afifi hu'na nagesamo afite'na agegauve. Navayafati'mo alagepa gemo lapa paisugetapa afitetapae'mo agegae. Goti'a aeno kalafefa gefati'mo hisige'na afisuvafe'mo mai'ne'na afiguve. Nagaemo ani gemo alino fala ki male'niya gemo ae'na hakalo hu'na lapa paiguve.

Hosu vaya'mogimo fai'a ku ai'a nate'ne'a namagigefe'mo nehisage'nae'mo koli osuguve. Apakaemo, kagemi yatimo'a laha maegaiye, hu'a huge alopa kagemi yatimo ali'none, hu'a huge nehaya vaya'mogimo konaga'apimo falisaya kavategati'mo afa'a miya fai'a o'apategae. Konaga'apimogimo alagepa hu'a afa'a maisayafe'mo Goti'a miya amite'a miya fai'a o'apategae. Apakupi mafa'nemo miya faisaya monimo alopa monimo hane'niya'mofe'mae. Apakaemo kelifi'mo lami'a o'mai'a muki afina'mo afa'a maige maige hu'a maisayafe'mo afa'a miya faita apategaune, hu'a hugayana hai'a metalegae.

10 Apakaemo ago apake'nayana agete'a afi'naya vaya'mo ago nefaliya kava hu'a muki vaya'mogi o'afi'naya vaya'e negi vaya'e'mo fali'apae'mo kagemi ya'apimo atale'nage'apae'mo alu vaya'mogi ne'aliye. 11 Apakaemo apaipafi'mo, notimo muki afina'mo afa'a hanesigeno ne'mauna kotimo afa'a hanege hanege huno hanegaiye, hu'a apakesa ne'afiye. Mopa'apile'mo apaki'apimo ne'ataya'monanafa 12 ala apaki vaya'mo afu anaga'mo afa'a o'mai'a nefaliya agufa afugana hu'a mai'nae.

13 Apakaemo negi nagi apakesamo ne'afige'apae'mo mafa'ne'apimogimo lama gege'mo nehae, hu'a hute'a apakame nehae. 14 Sipisipimo fali'naya kava hu'a nefalige'a kanolufi'mo ki'a ne'apatae. Sipisipile'mo yagai'a ne'apataya kava huno falisaya kava'mo'a yagaino apategaiye. Lama ge vaya'mogimo kotilamisiyapi'mo yagai'a apategae. Kanolufi'mo ko'apimo hane'niyanageno alagepa apakufa'e konali ya'api'e'mo kasaligiyamonanafa 15 Goti'a kanolumo lokiya'afati'mo nagupi mafa'nemo miya faino nateteno navalegaiye.

16 Mago vekamo'a alopa kagemi ya'mo ali'nisige'apae'mo afamo anaga'amogi ala apakimo alisagetapae'mo koli osiyo. 17 Falisiya afina'mo kagemi ya'amo alinino o'ugiye. Muki konali ya'amo'a agae'e'mo magokepi lokaelino olamigiye. 18 Afa'a mai'neno'ae'mo agai'ae'mo alagepa huka mai'nananageka afa'a kamogaga aigane, huno nehiye. He, lapakaitapimo alagepa hutapa lapa maesage'apae'mo vaya'mogimo ala lapakitapimo lapamigae. 19 Ani vekamo'a aginago vaya'mo mai'naya kotegamo lamino hanipi'mo mai'neno'ae'mo ha le ya'mo o'agegaiye. 20 Ala apakimo alite'a alagepa hu'a agete'a o'afi'nisaya vaya'mo afumo nefaliya agufa afugana hu'a mai'nae.

Copyright information for `KYG