Psalms 50

Goti'a agoti huno apatesiya kavafe'mo ava gemae

Goti'a Ala kava ne'mo lokiya'age vekamo'a ge hu'niye. Agaemo yegemo haine ne'eya kotegamo mai'naya vaya'e yegemo lamino nefaleya kotegamo mai'naya vaya'efe'mo keya aeno ge hu'niye. Muki ma mopafi vaya'aife'mo keya aeno ge hu'niye. Goti'a Saiyoni taonimo hogote konali taonifati'mo aeno ha legaiye. Gotitimo'a emineno'ae'mo ge osuno afa'a o'maigiye. Atamo lelino uno hogotetesigeno eminegaiye. Lusi yasimo alige ko aige hulino haopa'ale'mo egaiye.

Agaemo vaya'age'mo alino fako huno apatesiyafe'mo koku'napi vaya'e ma mopafi vaya'efe'mo ge hugiye. Ina ge huno hapa paigiye. Lapakaemo utapa naote vaya'nimo nagaete'mo apavaleta alita anupa hutapa apateyo. Sipisipimo amagi'a ofalinimo nami'naya kavateti'mo nagae'e'mo kotalakemo hu male'naya vaya'nimo apavaleta alita anupa hutapa apateyo. Koku'napi'mo mai'naya vaya'mogi, alagi fatago vekamo mai'niye. Agai'age'mo alino fako huno apategaiye, hu'a hugae.

O vaya'nimogitapae, hu'na, afiyo. Nagaemo gemo hugesuve. O Isaleli vaya'mogitapae, hu'na, Nagaemo agoti hu'na lapategauve. Nagai'nige'mo alagi Goti'namo mai'nove. Gotitapimo'namo mai'nove. Lapakaemo muki afina'mo naulagale'mo afumo amagitapa ofalinimo namige atafi'mo kaege nehaya kavatapilefe'mo agoti hu'na olapategauve. Nagaemo notapifi'mo mai'naya pulumakamo apavaleli'na o'uguve. Kegi'yafati'mo memetapimo apavaleli'na o'uguve. 10 Ha'ao, muki yahaofilaga mai'naya afumo nagai'ni afumo maige tauseni'a avele'mo mai'naya pulumakamo nagai'ni pulumakamo maige hu'a mai'naya'mofe'mae. 11 Muki ave'alegamo mai'naya nama anaga'e muki kotega mai'naya afela afu anaga'e'mo nagai'ni ya'mo mai'nae.

12 Ma mopa'e muki ma mopafi vaya'e ya'e'mo nagai'ni ya'mo hane'niya'mofe'mo naga tesige'nae'mo lapa opaiguve. 13 Nagaemo pulumakamo ame'amo nesufiye. Mememo kola'amo nesufiye. 14 Gotifeke'mo hao ke hesaya agufa ofalinimo alitapa amiyo. Lapakaemo ani kava'mo hugune, hutapa ha pai'naya gemo akame hutapa ani agufa ofalinimo alita hogote vekamo anaga vekamo amiyo. 15 Hanageke ya'mo alisaya afina'mo nagaefeke'mo ge hige'nao alagepa hu'na lapa maesugetapa ala nagi'nimo namigae.

16 Goti'a ani gemo hu'niya'monanafa hosu vaya'aife'mo, Na kava higetapae'mo avo'mo kae male'naya ke'aepa ge'nimo aeta hakalo hutapa hapa pai'nae. Na kava higetapae'mo kotalake ge'nimo nehae. 17 Lapakaemo ali'na lapaya malesuvafe'mo alagi olapau'niye. Ge'nimo alita lapakamelagamo yaga autapa ne'atalae. 18 Lapakaemo kumaya ne'aliya vaya'mo apaketetapae'mo magoke lapaipa lapakesamo ali'nae. Kumai kava'mo nehaya vaya'ai apafalu'apimogitapamo mai'nae. 19 Muki afina'mo hosu gemo huge aigofe gemo huge hutapa mai'nae. 20 Itopale'mo mai'netapae'mo konagatapimogife'mo apakamelaga gemo nehae. Lapakaemo itatapimogi mafa'ne'apie'mo hutapa faipa hutapa ne'apatae. 21 Ani agufa kava'mo hu'nage'nae'mo ge osu'na afa'a mai'nove. Lapakaemo nagaefe'mo, lagaekana huno mai'niye, hutapa lapakesamo afi'naya'monanafa hosu kava'mo hu'nae, hu'na lapa paiguve. Nagaemo hosu kavatapimo lapaulagale'mo ali'na kale kae'na lapave liguve.

22 Gotife'mo lapake kani'nisiya vaya'mogitapae, hu'na, ge'nie'mo lapakesa afifi hutapa maiyo. Fiku yanage'na lapae'na katali katalu hisuge'apae'mo lapa maesaya vaya'mo o'maigae. 23 Nagaefe'mo, alagepa kava'mo hu'niye, hu'a nehaya vaya'mogimo ala nagi'nimo ne'namiye. Nehaya kava'apilefe'mo apakesa afifi hu'a mai'nisaya vaya'mo Goti'a apakufamo alino katino ne'apateya kava'amo ali'na apave liguve.

Copyright information for `KYG