Psalms 53

Hosu vaya'ai kava'apie'mo ava ge hu'niya gemae

Negi nagi vaya'mogimo apaipafi'mo, Goti'a o'mai'niye, hu'a nehae. Afumo nefaligeno'ae'mo apakufamo nekasaliya kava hu'a hosu vaya'mo mai'nae. Goti'a avenatu'na'mo heno ne'apateya kava'mo nehae. Magoke vekamo'a alagepa kava'mo nehiya vekamo alagi o'mai'niye. Goti'a koku'napati'mo apakeno'ae'mo, Mago agete'a afi'naya vaya'mo mai'nafi mago vaya'mogi kahauya hu'a nagesayafe'mo nehafi huno apake'niye. Apake'niya'monanafa muki'amogimo alagepa ka'mo ago atale'a magoke aiyaya hu'a hosu vaya'mo mai'nae. Alagepa kava'mo nehaya vaya'mo alagi'ato o'mai'nae. Magoke'atomo alagi o'mai'niye. Goti'a huno'ae'mo, o'afi'ne'a hosu kava'mo nehaya vaya'mogimo negi nagi vaya'mo mai'nafi. Ne'ya'mo ali'a ne'naya kava hu'a vaya'nimo apamagi'a hano hu'a apatalete'a Gotife'mo nunumu nosae, huno hu'niye. Hemenimo aise'amo koli nehaya'monanafa henaga'amo lusi kava hu'a koli hugae. Goti'a hosu kava'mo nehaya vaya'mo apamagisige'a falisageno'ae'mo lokiya'apimo aino atagu faegaiye. Goti'a akame'ya apami'niyanage'a alagi asagau'a aigae. Nahau'niyanageno mago vekamo'a Saiyoni kotegati'mo eno Isaleli vaya'mo hapa maesige'a ae'a apakasegae. Goti'a hapa maesige'apae'mo Isaleli vaya'mo halate alagepa hu'a mai'ne'apae'mo lusi kava hu'a apamogaga aigae.

Copyright information for `KYG