Psalms 69

Ala kava ne'mo'a kana ya'mo ali'niya gemae

O Gotiyo, hu'na, ani'mo'a lugo'nifi'mo haine'niya'mofe'mo nagufamo alika katika nato. Naiyamo ae'na maisuva ya'mo ohane'nige'na hapafike'mo ae'na lapane'nove. Ani'mo heteno aeno nati kae'niye. Keya ae'na ge huge huge hu'na mai'nogeno'ae'mo lusi kava huno alaga'mo nahae'niye. Lugo'nile'mo hau hu'nige'na Goti'nimofe'mo agava mai'nogeno naulagafati'mo nagafu nekiye.

Nayoka'mo lusi asole ya'mo hane'niya kava hu'a kame vaya'nimo mago'e hu'a mai'nae. Apakaetegamo mago agufa hosu kava'mo osu'nova'monanafa fiku apaini hu'a ne'natae. Afa'a fiku nahaesayafe'mo hu'a mai'naya vaya'mo lokiya vaya'mo mai'nae. Mago ya'apimo kumaya o'ali'nova'monanafa anona'nilefe'mo afa'a amiguve. O Gotiyo, hu'na, negi kava'mo hu'na kava'nimo ago age'nane. Hosu kava'nimo kaulagale'mo fala oki'nigeka ago age'nane. O Gotiyo, hu'na asole ami vaya'aite'mo yagaika ne'apatana Ala kava nene, hu'na, fiku yanage'na hosu kava'mo hisuvana kagaefe'mo kagava ne'maiya vaya'mogimo apavagage hugiye. O Isaleli vaya'mogita Gotitimogae, hu'na, fiku yanage'na hosu kava'mo hisuvana kagaemo kagesayafe'mo kahauya nehaya vaya'mogimo hosu apaki'apimo aligae. Kagaetefe'mo hu'a faipa hu'a nate'nageno navagage hu'niye. Nagana'nimogimo o'apake'naya vaya'aitegamo nehaya agufa kava'mo nagaetegamo nehae. Ita'nimo mafa'ne anaga'amogimo alu kotega vaya'aife'mo apakesamo no'afiya kava hu'a nagaefe'mo apakesamo no'afiye. Kagaemo nokamo alagepa huno hanesiyafe'mo nayamukiki nehuva'mofe'mo no'nagae. Hu'a faipa hu'a nekataya gemo'mo nagaete'mo asagauno ai'niye.

10 Avi'ya huge nagufamo ali'na afepi atesuvafe'mo ne'ya'mo mo sige hu'na mai'noge'apae'mo hu'a faipa hu'a nate'nae. 11 Hosu kogu kukenamo ali'na vai'noge'apae'mo muki vaya'mogi kigi yokalo gemo hu'a nate'nae. 12 Kate'mo ali'a anupa hu'a mai'naya vaya'mogi hu'a faipa hu'a ne'natae. Alopa ani'mo nete'a negi nagi gemo nehaya vaya'mogi nagaefe'mo yoke nehae.

13 Nehaya'monanafa nagaemo kagaefeke'mo nunumu nehuve. O Ala kava nene, O Gotiyo, hu'na, kahau'nisiya afina'mo kahau huka nateteka ge'nimo afa'a afitekae'mo lama gekaleti'mo nagufamo alika katika nato. 14 Hapafi'mo ae'na olapanesuvafe'mo hapafati'mo nagufamo alika katika nato. Apaini hu'a ne'nataya vaya'ai apayapati'mo hapa faleka nato. Ani'mo neheya yapati'mo nagufamo alika katika nato. 15 Ani'mo neheya ani'mo'a aeno nati kaesifi alopa anipi'mo ae'na lapanesufi yatala kelifi'mo avayamo aino akanino natesifi hisige'na maisuvafe'mo o'nato.

16 O Ala kava nene, hu'na, kahau kayamopafi'mo nekahaiya kavakamo alagepa kava'mo hane'niya'mofe'mo ge'nimo afiyo. Mago'e huka kahau huka ne'apatana kavakalefe'mo nagaetegamo aika afe leka eno. 17 Hanageke ya'mo ali'nova'mofe'mo ali'yakamo ne'aluva vekamo'namo kaugosafi'mo okagesuvafe'mo aika ati okao. Malage huka ge'nimo afiyo. 18 Nahaopale'mo eka miya faika hatu maeka nato. Kame vaya'nimogi apayapati'mo hatu maeka nato. 19 Ago apake'nanage'apae'mo hu'a faipa hu'a natege navagage ya'mo ali'a namige nagi'nile'mo ali'a afepi atege nehageka apake'nane. Kame vaya'nimo kaulagale'mo mai'nae. 20 Hu'a faipa hu'a nate'nage'na lusi kana ya'mo ali'nogeno kanamo nahau'niye. Hau huno natesiya vekamo agesuvafe'mo kahauya hu'nova'monanafa magoke vekamo alagi o'mai'niye. Mago vaya'mogi naipamo ali'a lokiya vai'a natesage'na naipamo'mo falu hisiyafe'mo nagesamo afi'nova'monanafa alagi o'mai'nae. 21 Nesuvafe'mo atu neheya fipikana agufa ya'mo ali'a nami'nae. Anife'mo nahau'nige'apae'mo atu neheya ani'mo ali'a nami'nae.

22 Hapa o'maegeno'ao hosu kava'apimo anona'apilefe'mo magokepi'mo alopa ne'ya'mo ne'nesageno'ae'mo apane'mu aegekana huno aeno. Alagepa hu'a ne'maiya kava'apimo'a ane'aifi'mo hegekana huno haneno. 23 Mago'e hu'a o'agesayafe'mo apaulagafati'mo hani'age'mo hino. Lusi kana ya'mo alika apamige'apao alite'a muki afina'mo ape hulitata hu'a maiyo. 24 Kaipamo neleya kavakamo apakaete'mo ani'mo lakigekana huka alika apamiyo. Kaipamo leka apate'neka apatafauvo. 25 Ko'apimo no atufa'age'mo hanegaiye. Fiku yanage'a mago alu vaya'mogi seli no'apifi'mo maigae. 26 Na kava nehaya'mofe'mae. Apakaemo amagi'nana vekae'mo apaini hu'a ne'atae. Apakaemo hapae'nana vaya'aife'mo hu'a faipa hu'a apatete'a kana ya'mo ali'a ne'apamiye. 27 Alu hosu kava alu hosu kava'apilefe'mo agoti huka apato. Apakaemo fatago kavakamo o'alisageka naulagale'mo fatago vaya'mo mai'nae, huka hapa opaiyo. 28 Maige maige hu'a maisaya vaya'ai apaki'apimo hane'niya mukufati'mo apaki'apimo aeka kalo paeka atalo. Fatago vaya'ai apaki'apimo hane'niya mukufi'mo apaki'apimo avo'mo kaeka o'malo.

29 Hu'a mai'naya'monanafa nagaemo muki ya'nimo ohane'niya vekamo mai'ne'na kana ya'mo ali'nove. O Gotiyo, hu'na, nagufamo alika katika nateteka alika asaga huka nato. 30 Nagaemo yoke hu'na Goti'mo ala agi'amo amiguve. Hao ke he'nae'mo agi'ale'mo ali'na asaga hu'na ategauve. 31 Ala kava ne'mo'a ani hisuva kavafe'mo lusi kava huno amuse hugiye. Pulumakamo he'na amisugeno'ae'mo amuse osugiye. 32 Ala vaya'mo mai'none, hu'a apakesamo no'afiya vaya'mogi ani kava'mo agete'apae'mo apamogaga aigae. Lapakaemo Goti'mo agesayafe'mo kahauya nehaya vaya'mogitapamo lapaipamo alagepa huno hanesigetapa maige maige hutapa maigae. 33 Ala kava ne'mo'a muki ya'apimo ohane'niya vaya'ai ge'apimo ne'afiye. Agaemo agai'a vaya'amo kalavusifi'mo mai'naya vaya'mogife'mo afa vaya'mo mai'nae, huno agesamo no'afifa apakaefe'mo alagepa huno agesamo ne'afiye.

34 Koku'na'mo'agi ma mopamo'agi solovala ani'mo'agi muki noyamemogimogi solovala anipi'mo mai'naya ya'mogimogi hu'a ala agi'amo amiyo. 35 Na agufa kavatefe'mo ala agi'amo amigae. Goti'a Saiyoni kotega vaya'amogi apakufamo ali'a kati'a apategae. Apakaemo Yuta kotega taoni'afi taoni'afi'mo mai'ne'a ani hetama'apimo alisayafe'mo Goti'a taoni'a'e taoni'a'e'mo kigiye. 36 Ali'yakamo ne'aliya vaya'ai apakinago vaya'mogi ani mopamo alisage'a Gotife'mo hapau'nisiya vaya'mogimo ani mopale'mo maige maige hu'a alagi maigae.

Copyright information for `KYG