Psalms 73

Esafi'a hosu kavafe'mo ha'ye hu'nigeno Goti'a alino api aino ate'niya gemae

Ina gemo alagi lama gemo hu'nae. Goti'a Isaleli vaya'mo yaveyave apaipa vaya'alegamo alagepa kava'mo huno hapa ne'mae. Yaveyave apaipa vaya'alegamo alagepa kava'mo nehiye. Alagepa kava'mo nehiya'monanafa nagaemo alagi ago hogo'amo asagau'na aisuva agufa kava'mo hu'nove. Alagi hogo'amo lole nagesamo afite'na ae'na halu vale lami'na asagau'na aisuva agufa kava'mo hu'nove. Apakovana himu'namu kava'mo hute'a hosu kava'mo nehaya vaya'mogi alagepa hu'a mai'nage'na apakete'nae'mo mai'naya agufa kava'mo hu'na maiguve, hu'na hute'nae'mo naha'ye hu'niye.

Faligefe'mo nehageno'ae'mo apakufamo'mo lokiya vaiteno apakafu nokiye. Muki vaya'mogimo hanageke ya'mo ne'aliya'monanafa no'aliye. Muki vaya'mogimo hosu ya'mo ne'aliya'monanafa no'aliye. Himu'namu kava'mo nehaya kava'apimo'a ha le konali ya'apigana huno hane'niye. Kame nehaya kava'apimo'a kukena'apigana huno hane'niye. Apafaya'e vaya'mo mai'nageno apakufamo ko nesiye. Hosu kava'apimo'a apaipafi'mo havai teteno aino vali nelamiye. Hu'a faipa hu'a apatege apaini hu'a apatege nehae. Himu'namu gemo hute'apae'mo alita afepi lapategaune, hu'a nehae. Koku'napi mai'niya Gotife'mo hu'a faipa hu'a ne'atae. Hosu ge'apimo'mo aino atagu faeno uneno hu'niye.

10 Ani kava'mo nehaya'mofe'mo Goti vaya'amogimo ai'a atagine'a manile'mo ne'ae. Apakaemo kapufi'mo ani'mo havai te'nige'a ali'a ne'nae. 11 Apakaemo, Haiya kava huno Goti'a afigiye, hu'a nehae. Anaga vekamo aeno apakase'niya vekamo'mo lage'nifiye, hu'a nehae. 12 Apako, hu'na, ani vaya'mogi Gotife'mo mono nosaya vaya'mogimo muki afina'mo mai'a falu hu'a mai'ne'apae'mo mago'e mago'e hu'a kagemi ya'mo afa'a ne'aliye. 13 Nagaemo naipafati'mo hosu kava'nimo ae'na kalo paete'na naya'mo sese hu'nova'monanafa ali'ya'nimo afole no'aiye. 14 Netepi'mo kaita nahauteno'ae'mo nahaulinuno uneti'niye. Muki nete'ae nete'ae'mo kayo'mo ne'namine. 15 Nagaemo, ani kavafe'mo ava gemo hu'na hapa paiguve, hu'na hu'novesinana mafa'nekalegamo hosu kava'mo hu'noge'a asagau'a ai'naesine. 16 Ani kava'mo aepa'amo agesuvafe'mo lusi kava huno alaga'mo nahae'niye. 17 Alaga'mo nahae'nige'na o'age'na maime maime ne'e'na Gotitegamo ne'u'nae'mo hano hisiya afina'mo age'nove.

18 Alagi lama gemo nehuve. Kagaemo alika halu ne'valeya kateke'mo apate'nane. Kagaemo alika yaga auka ne'apatalanage'apae'mo alagi u'a lami'a hano nehae. 19 Lusi hosu ya'mo alika ne'apaminage'apae'mo malage hu'a u'a lami'a hano nehae. Lusi kava hu'a apamo'ya ne'aiya kava'mo'a atafi kaegekana hu'a ali'a hano hu'a ne'apatalae. 20 Hani'ilagamo alagamuna agete'apae'mo apaupati'mo he netigeno'ae'mo ani alagamunamo ago apake nekaniya kava hu'a malage hu'a hano hugae. Ala kava nene, hu'na, ani kava'mo huka kaupati'mo he tika apaune'age'mo apaketekae'mo alagi okahaugiye.

21 Naipamo'mo kana hu'nigeno'ae'mo naipafati'mo atu nahae'niye. 22 Negi nagi kava'mo hute'na o'agege o'afige hute'na kaulagale'mo mai'ne'nae'mo afela afugana hu'na mai'nove. 23 Ani kavake'mo hu'na mai'nova'monanafa nagaemo muki afina'mo kagae'e'mo magokepi lokae'na mai'nogeka nayapi'mo natafauka mai'nane. 24 Hemenimo kagaemo gekaleti'mo alika ho huka nateteka henaga'amo ha le konali kote'mo navalelika haigane. 25 Koku'napi'mo mago naha maesiya vekamo o'mai'niya'monanafa kagaeke'mo mai'nane. Ma mopafi vekae'mo naha'ye nehiya vekamo mago o'mai'niya'monanafa kagaeke'mo mai'nane. 26 Nagufa'e naipa nagesa'e'mo hano hugiya'monanafa naipamo alika lokiya vaika nateteka muki afina'mo hetama'nimo kagaeke'mo mai'nane.

27 Kahaopale'mo e'a o'mai'a afagi'ale'mo mai'naya vaya'mo alagi lageso hugae. Kagaemo katale'a ne'vaya vaya'mo alika apago'ya laga nehana'monanafa 28 kahaopale'mo u'na maisuva kava'mo kanale kavane. Nagaemo muki nehana kavafe'mo ava gemo ae'na hakalo hu'na hapa paisuvafe'mo Ala kava ne'mo Goti'nimo'a alagepa huno naha maegaiye, hu'na hute'na mai'nove.

Copyright information for `KYG