Psalms 8

Vemo mafa'ne'aife'mo ava gemae

Ala kava nene, Ala kava netimogae, hu'na, ma mopafi muki haopalegati'mo ala kagikamo ali'nane. Ha le konali yakamo'a koku'nate hane'niya ya'e vaya'e'mo ago aeno apakase'niye. Kagaemo muki aise mafa'ne anaga'e nute mafa'ne anaga'e'mo lokiya vaika apate'nanage'apae'mo kagikale'mo ali'a asaga nehage'apae'mo kamekamogi'e gekamo amagi'a ne'atalaya vaya'mogi'e'mo ge osu'a afa'a maigae.

Nagaemo koku'nate ya'mo kayateti'mo alo hu'nana ya'mo kai'e muki kanefi'e'mo alo huka male'nana yafe'mo nagesamo ne'afi'nae'mo, ma mopafi vaya'mo ina agufa vayanagi na kava higeka apakaefe'mo kagesamo ne'afine. Na kava higeka vemo mafa'nemo ha ne'mane. Kagaemo vemo mafa'nemo alika atege enisole vaya'mo alika apatege hu'nanage'apae'mo enisole vaya'mogimo aise afina'mo ae'a agase'a mai'nae. Enisole vaya'ai apaiyafi'mo alika ateteka ha le konali ya'a'e ala agi'a'e'mo alika ami'nane. Kagaemo, alo hu'nova yate'mo yagaika apato, huka hapa paiteka muki ya'e vaya'e'mo alika aiyafi'mo apate'nane. Muki sipisipigi pulumakagi afela afugi koku'nate namagi anipi noyamegi solovalapi'mo umenitata nehaya yanagi huka alika aiyafi'mo apate'nane. Ala kava nene, Ala kava netimogae, hu'na, ma mopafi muki haopalegati'mo ala kagikamo ali'nane.

Copyright information for `KYG