Psalms 89

Kotalake hu male'niya ge'ae'mo ava gemae

O, Ala kava nene, hu'na, nagaemo kahau huka ne'apatana kava'ale'e kava'ale'efe'mo muki afina'mo yokege'mo huge huge hu'na maiguve. Kagaemo gekamo alagi akame nehana kavakae'mo hemenimo mai'naya vaya'e ali'a apateme apateme visaya vaya'efe'mo navayafati'mo hapa paiguve. Nagaemo, kagaemo no'mo kigekana huka muki afina'mo afa'a hanesiyafe'mo kahau huka apatege apatege huka maigane, hu'na hapa pai'nove. Kagaemo gekamo alagi akame nehana kavakamo'mo koku'napi'mo no'mo faika ategekana huka male'nane.

Goti'a, Nagaemo mago vekamo lekana pai'na atete'na agae'e'mo kotalake ge'nimo magokepi'mo hu male'nove. Ali'ya'nimo ne'aliya vekamo Nevinife'mo, kagae nofi vaya'mogi muki afina'mo lokiya vai'a maigae. Kini vekamo mai'neka yagaika ne'apatana kava hu'a kini vaya'mo mai'ne'a yagai'a apatete apatete hume hume u'a maigae, hu'na ha pai'nove.

O, Ala kava nene, hu'na, koku'napi'mo mai'naya vaya'mogi nehana kavakamo agete'apae'mo hapau aite'a ala kagikamo kamigae. Apaote vaya'mo ali'a anupa hu'a mai'ne'apae'mo gekamo akame nehana kavakalefe'mo alagepa kava'age'mo nehiye, hu'a hugae. Koku'napi'mo mai'naya vayapati'mo ina la'mo Ala kava nekana huno mai'niye. Lokiya vayapati'mo mago vekamo'a Ala kava nekana huno o'mai'niye. Apaote vaya'mo ali'a anupa hu'a mai'nayategamo Gotifeke'mo lusi kava hu'a koli hu'nae. Goti'e'mo magokepi lokae'a mai'naya vaya'mogi agaefe'mo koli hu'nae. O Gotiyo, muki vaya'aite'mo yagaika ne'apatana Gotigae, hu'na, Lokiyaka'e vekamo mai'nanageno ina la'mo kagaekana huno mai'niye. Gekamo alagi akame nehana kavakamo'mo faino ku aino nekate. Solovala ani'mo'a aino holakau holakau nehigekae'mo yagaika ne'atane. Solovala ani'mo'a aepa faino aino holakau hugefe nehigekae'mo afa'a hano huka nehanageno'ae'mo afa'a nehane. 10 Kagaemo Isipi kotega mai'naya vaya'ai himamu'apimo ago alika hano huka atale'nane. Lokiya kayateti'mo kame vayakamo apamagi'nanage'a atagu fae'a u'e'a hu'a mai'nae.

11 Koku'na'e ma mopa'e'mo kagaika ya'mo hane'niye. Ma mopa'e muki ma mopafi'mo mai'naya vaya'e ya'e'mo alo hu'nane. 12 Aluga aluga haopalega'e'mo alo hu'nane. Alopa avemo Tamo ave'mo'e Hemoni avemo alopa avemo'e'mo kagikalefe'mo anamogaga ne'ai'ae. 13 Himamukaleti'mo ali'ya'mo ne'aline. Kaya'mo lokiya kaya'mo hane'niye. Lamaga kayateti'mo aeka apakase'nane. 14 Kini vekamo mai'neka fatago kava'mo huka alagepa huka alika fako huka apateteka yagaika ne'apatane. Kahau huka apatege lama ge'age'mo huge huka mai'nane. 15 Afite'apae'mo apamogaga ne'aiya gemo afi'a aeto hu'naya vaya'mo Goti aulagale'mo alagepa hu'a mai'nayanage'a afa'a apamogaga aigae. Kaugosafati'mo aeno ha neleya yategamo umenitata hugae. 16 Apakaemo kagikalefe'mo muki afina'mo apamogaga ne'aiye. Apakaemo fatago kavakaleti'mo ala apaki'apimo ne'aliye. 17 Ha le konali himamu'apimo kagaetegati'mo ali'nae. Kagaemo fiku laha maeka lami'nanageta aeta apakase'none. 18 Ala kava ne'mo halegutigana huno mai'niye. Isaleli'a aote vekamo kini vekatimo mai'niye.

19 Aote vekakamo'a alagamuna agegekana huno age'nigekae'mo ina ge huka ha pai'nane. Nagaemo himamu'a'e vekamo lokiya vai'na ate'nove. Nagaemo mago vekamo vayapati'mo lekana pai'na atete'na ali'na asaga hu'na ate'nove. 20 Nagaemo ali'ya'nimo alisiya vekamo Nevini'mo kahauya hu'na agete'nae'mo aote uvelileti'mo fale'na ate'nove. 21 Muki afina'mo himamu'nimo agaete'mo malete'nae'mo lokiya vai'na ategauve. 22 Kame veka'amo'mo anona'alefe'mo asole ya'mo o'alisigeno hosu vekamo'a kana ya'mo alino o'amigiye. 23 Nagaemo kame vaya'amo apamagisuge'a aulagale'mo asagau'a aigae. Nagaemo apaini hu'a ne'ataya vaya'mo kaita'mo apamiguve.

24 Apamiguva'monanafa agaefe'mo ani kava'mo huguve, hu'na ha pai'nova ge'nimo alagi akame hu'na nahau hu'na ategauve. Nagi'nilefe'mo agi'ale'mo ali'na asaga hu'na ategauve. 25 Nagaemo alopa mopale'mo yagaisiyafe'mo lokiya vai'na ate'nisugeno mago aya'mo solovala anite'mo maleteno mago aya'mo anilafate'mo malegaiye. 26 Agaemo alopa gefati'mo nagaefe'mo keya aeno ge huno'ae'mo, Kagaemo afo'nimogamo mai'nane. Goti'nimogae, huno, nagufamo alika katika natesana yafa'nimo mai'nane, huno naha paigiye. 27 Yege mafa'ne'nimo mai'niye, hu'na hu malegauve. Agaemo muki ma mopafi'mo mai'naya kini vaya'mo ago aeno apakaseno hogote kini vekamo maigiye. 28 Nagaemo muki afina'mo nahau hu'na atege atege hu'na maiguve. Agae'e'mo kotalake ge'nimo hu male'nova ge'nimo'a afa'a hanege hanege huno hanegaiye. 29 Agae nofi vaya'amo afa'a maige maige hu'a maigae. Koku'na'mo'a hanege hanege huno hanesiya kava huno muki afina'mo kini vekamo mai'neno yagaino apategaiye. 30 Mafa'ne'amogimo ke'aepa ge'nimo atale'a ali'na fako hu male'nova ge'nimo akame osuge 31 avo'mo kae male'naya ge'nimo amagi'a atalege hiyo, hu'na hapa pai'nova gemo akame osuge hu'a mai'nisaya'mo'mo 32 nagaemo hosu kava'apilefe'mo kayo'mo apamite'na kayoteti'mo apamagisugeno apamu'mo apalegaiye. 33 Kayo'mo apamiguva'monanafa alagi ali'na hafai'na o'atale'na agaefe'mo nahau nayamopafi'mo nahau'nisige'na ha maegauve, hu'na hu'nova ge'nimo amagi'na o'atale'na alagi akame huguve. 34 Kotalake ge'nimo amagi'na o'atale'na navayafati'mo hu male'nova ge'nile'mo alu gemo halate osuguve. 35 Nagaemo magoke afina'mo naote kava'nilefe'mo hu'nae'mo, Nevinife'mo aigofe gemo alagi osuguve, hu'na nago'yamo ago atalete'na ha pai'nove. 36 Agae nofi vaya'amo alagi hano osu'a afa'a maige maige hu'a maigae. Yegemo'mo naulagale'mo lege lege huno ne'maiya kava huno muki afina'mo kini vekamo mai'neno yagaino apategaiye. 37 Kaimo'mo hanege hanege huno nehaneya kava huno fai mai'neno yagaino ne'apateya siale'mo muki afina'mo fai mai'neno yagaino apategaiye. Koku'napati'mo kaimo'mo, Goti'a mai'niye, huno lama gemo nehiye, huno nehiya kaigana huno mai'neno yagaino apategaiye.

38 Kagaemo ani gemo hu'nana'monanafa kagaemo ago alika yaga auka ataleteka kakame'yamo ami'nane. Kagaemo uvelimo faleka ate'nana vekae'mo kaipamo leka ate'nane. 39 Kagaemo ali'yakamo ne'aliya veka'e'mo kotalake gemo hu male'nana gemo ago alika hano huka atale'nane. 40 Kagaemo kegi'ya'amo ago aeka halagape vai'nane. Halagape o'vaisaya agufa lokiya noko'mo heka halagape vai'nane. 41 Muki u e'a nehaya vaya'mogimo kagemi ya'amo kumaya'mo ne'aliye. Haopale'mo mai'naya vaya'mogimo hu'a faipa hu'a ne'atae. 42 Kagaemo kame vaya'amo hapa mae'nanage'a kame hu'a ae'a agase'nae. Hapa mae'nanage'a apamogaga ai'nae. 43 Kagaemo ati vaya'amo lokiya vaika o'apate'nanage'a kame hu'a ae'a o'apakase'nae. Kagaemo afa'a atale'nanageno kame vaya'a'e'mo kame huno aeno o'apakase'niye. 44 Kagaemo ha le konali ya'amo alika hano huka atale'nane. Yagaino apatesiya himamu'amo ago alika hano huka atale'nane. 45 Kagaemo atale'nanageno malage huno ago kosuna le'niye. Lokiya'amo ohane'nigeno avagage kava'amo'mo aeno ati kae'niye.

46 Ala kava nene, hu'na, na magi afina'mo fala kika maigane. Muki afina'mo fala kika maigapiye. Atagana huno kaipamo lesifiye. 47 Maisuva afina'mo aise afina'mo hane'niya'mofemo kage okanika kagesamo afiyo. Fiku maisayafe'mo muki vaya'mo alo huka apate'napiye. 48 Haiya vekamo'a ofalino afa'a maige maige huno maigiye. Kanolufi'mo o'maino faino kasalo paegaifiye.

49 Ala kava nene, hu'na, Hogoteka Nevinife'mo kahau kayamopafi'mo kahau'nigeka alagepa huka ha mae'nane. Na kava higeka hemenimo ani kava'mo nosane. Kagaemo Nevinife'mo ani kava'mo huguve, huka huteka kago'yamo atale'nane. 50 Ala kava nene, hu'na, ali'yakamo ne'aliya vayakae'mo hu'a faipa hu'a ne'apataya kavafe'mo kage okanika kagesamo afiyo. Muki asole vaya'mogimo hu'a faipa hu'a nelatage'nae'mo naipamo'mo lusi kava huno kana nehiye. 51 O Ala kava nene, hu'na, kame vayakamogi hu'a faipa hu'a late'nae. Apakaemo uvelimo faleka ate'nana vekamo'a nehiya kavafe'mo hu'a faipa hu'a ate'nae.

52 Ala kava ne'mo alagepa huno maino. He, Lama ge. Lama ge.

Copyright information for `KYG