Revelation of John 11

Lole vekala'moganimo ava gemo neha'a vekala'anife'mo anava gemo hu'niya gemae

Mago hopa kayokana agufa kayo'mo lekana paisuvafe'mo alino namiteno'ae'mo, He tikuka Goti aote mono note'e ofalinimo ne'malaya hi'yalamute'e'mo alika maleka agege agege huka lekana paitekae'mo aote mono nopi'mo mono nehaya vaya'mo lekana paiyo. Lekana paigana'monanafa hogote kegi'yamo malagamo hane'niya mopale'mo kayoteti'mo lekana opaiyo. Ani mopamo malaga vaya'mo alino apami'niyanage'a aote taonifi'mo foti tu'a kaile'mo umenitata hu'a ali'a hosu hu'a ategae. Nagaemo lole vekala'moganimo nava gemo hisa'afe'mo himamu'nimo ali'na anami'nisuge'ana nagaetegati gemo alini u'ana vani tauseni tu hataleti sigisiti'a afina'mo ani kava'mo hu'ana foti tu'a kaile'mo ae'ana hakalo hu'ana hapa paiga'ae. Ma mopafi vaya'mogimo hosu kava'mo nehaya'mofe'mo hosu kukenamo laisi kukana agufa kukenamo ali'ana vaiga'ae, huno naha pai'niye.

Ani lole vekala'moganimo lole alifi yosalakana hu'ana mai'ne'ana lole lamula'mo ne'malaya hi'yalamutalakana hu'ana mai'na'ae. Ma mopafi'mo mai'naya vaya'aite'mo yagaino ne'apateya Goti aulagale'mo he ti'ana mai'na'ae. Mago vaya'mogimo kame hu'a anategefe'mo nehisageno'ae'mo anavayafati'mo atamo'mo leno apasaga ligiye. Ani kava hu'a kame hu'a anategefe'mo nehisaya vaya'e'mo faligae. Ani lole vekala'moganimo Goti ge'amo ae'ana hakalo hu'ana hapa nepai'a afina'mo himamu'anileti'mo koku'na'mo atafau'ana atesa'ageno ko'mo o'aigiye. Anakaemo anite'mo yagai'ne'ana kolakana ani'mo ali'ana hamale'ana atega'ae. Hanau'nisige'anae'mo ma mopafi vaya'mo muki alu kayo alu kayoteti'mo afa'a apamagite apamagite hu'ana apamagiga'ae.

Goti'a anami'niya gemo ae'ana hakalo hu'ana hapa pai'ana hano nehisa'ageno'ae'mo afela afumo ive kelifati'mo hainesiya afumo'mo kame huno aeno anakaseno kamiti hanaegaiye. Anakufa'amo alopa taonimo aune'amo agi'amo Sotomi kotegamo hane'nifi Isipi kotegamo hane'nifi huno hane'niya taonifi'mo Ala kava ne'animo malipu yosale'mo nili ai'naya taonimo kate'mo hanegaiye. Fali'nisa'age'apae'mo muki alu apakufa'e alu apakufa'e vayanagi muki nofi vayanagi alu apake alu apakemo ne'aiya vayanagi alu kotega alu kotegamo mai'naya vaya'mogimogi hu'a lole'e mago'e afina'e mago atupa afina'e'mo anakufa'ale'mo aulu hae'a anakete'apae'mo kitapa o'anateyo, hu'a hugae. 10 Muki ma mopafi vaya'mo lole vekala'moganimo apakafu ki ya'mo ali'ana apami'na'a vekala'mo fali'na'a'mofe'mo amuse hu'a anatete'apae'mo apamogaga aite'a mago ya'mo fiku hapa mae'a apami'nage'apae'mo ali'a apami'nae.

11 Lole'e mago'e afinanagi mago atupa afinanagi huno utegeno Goti'a fu huteno halate afa'a maisa'a ya'mo alino anami'nige'ana he ti'ana afa'a mai'na'age'a anakete'apae'mo lusi kava huno apamo'ya ai'niye. 12 Koku'napati'mo alopa gefati'mo ge huno'ae'mo, manile'mo haite'ao, huno hu'nige'ana afite'anae'mo hai'ana hiyapi'mo falete'ana koku'napi'mo hai'na'age'apae'mo kame vaya'animogimo anake'nae.

13 Anake'nageno'ae'mo lusi imima'mo ali'nigeno'ae'mo naya lole'a taonifati'mo magoke taonimo magokayaga atupalega asagauno ai'nige'apae'mo seveni tauseni'a vaya'mo fali'nae. Fali'nage'apae'mo afa'a mai'naya vaya'mogimo lusi kava huno apamo'ya ai'nige'a koku'napi Goti agi'ale'mo ali'a asaga hu'a ate'nae.

14 Napa tu aiye aiye kava'mo hano hutegeno napa tali aiye aiye kava'mo malage huno afole aigiye.

Napa seveni enisole vekamo'a pikulimo hu'niya gemae

15 Napa seveni enisole vekamo'a pikuli hu'nige'apae'mo koku'napati'mo alopa gefati'mo ge hu'apae'mo, Hemenimo ma mopafi vaya'aite'mo yagai'a ne'apataya vaya'ai apaimu'yale'mo Ala kava neti'e lekana paino ate'niya vekamo Kalaisi ne'a'e'mo maiga'ae. Agaemo yagaino apateno hano osuno yagaino apateme apateme ugiye, hu'a hu'nage'apae'mo 16 tueti fo'a vayatama vaya'mo Goti aulagale'mo mai'ne'a yagai'a ne'apataya vaya'mogi sia'apile'mo fai mai'naya vayatama vaya'mo asagau ai'a apago'ya fai'ne'apae'mo apaugosalegati'mo mopale'mo ai'a ati kae'ne'a Gotife'mo mono hu'nae. 17 Mono hu'apae'mo,

Ala kava ne'mo Gotigae, kayamufa'age vekamo mai'nane. Hogoteka mai'neka hemeni'e'mo ne'mainanageka henaga'amo maisana vekamo mai'nane. Kagaemo mago'e himamukaleti'mo aepa faika yagaika apate'nana'mofe'mo kahao ke nehone.
18 Kaipamo leka ne'apatana kavakamo afole yate'mo afole aisigekae'mo fali'naya vaya'mo agoti huka apatesana afina'mo afole ne'aiya'mofe'mo malaga vaya'mogimo lusi kava hu'a apaipamo le'a kate'nae. Kagaemo ali'yakamo ne'aliya vaya'mogimo kagaetegati gemo alini e'a ae'a hakalo hu'a hapa nepaiya vayanagi muki apaote vayakagi muki vaya'mogi kagaefe'mo koli nehaya vayanagi ala apaki'apimo o'ali'nisaya vayanagi ala apaki vayanagi huka miya'apimo apamisana afina'mo ago afole ai'niye. Ma mopafi vaya'mo ali'a hosu hu'a ne'apataya vaya'aina alika hosu huka apatesana afina'mo ago afole ai'niye,
hu'a hu'nae.

19 Goti aote mono no'amo koku'napi'mo hane'niya no'mo yaki'nige'a age'nayana ani mono nopi'mo kotalake gemo yafate'mo avo'mo kae male'niya ke'aepa gemo kesifi'mo hane'nige'a age'nae. Hafosa lami'nigeno alino alave alave huteno hakalu hakalu hu'nigeno imima'mo ali'nigeno lusi ko mopa ko'mo ai'niye.

Copyright information for `KYG