Revelation of John 14

Miya faino hatu maeno apate'niya vaya'mogimo yokemo hu'naya gemae

Halate agovana, ageyo, huno, aikeli sipisipimo Saiyoni avele'mo he tino mai'nige'apae'mo vani hataleti foti fo tauseni'a vaya'ai hapanile'mo agai'a agi'e afo'amo agi'e'mo avo'mo kae male'niya vaya'mo agae'e'mo magokepi lokae'a he ti'a mai'nage'na apake'nove. Apakete'nae'mo afuvana koku'napati'mo apakemo ai'naya gemo'mo alopa ani ha'yamo'mo age ne'aigekana hu'a alopa gefati'mo hakalu hakalu hugekana agufa apakemo ai'nage'na afi'nove. Apakemo ai'naya apakemo'mo vaya'mogimo gitamo amagi'nageno age ne'aigekana hu'a apake ai'nae. Vani hataleti foti fo tauseni'a vaya'mogimo yagaino ne'apateya vekamo sia aulagalenagi lole'e lole'e vaya'ai apaulagalenagi vayatama vaya'ai apaulagalenagi hu'a he ti'a mai'ne'apae'mo saufa yokemo hu'nae. Apakaemo ma mopafi vayapati'mo miya faino hatu maeno apate'niya vaya'amogige'mo afi'naya yokemo hu'nae. Apakaemo a'ne'e'mo magokepi lokae'a havaete'a apakufamo ali'a hosu hu'a o'ate'naya vaya'mo yaveyave apaipa vaya'age'mo mai'nae. Apakaemo aikeli sipisipimo haiyategamo ne'vifi akame hu'a ne'vae. Agaemo ma mopafi vayapati'mo miya faino hatu maeno apate'niye. Yu vaya'mogimo hoyafati'mo hogoteno le'niya ne'ya'mo Goti'a ali'a ami'nageno Goti'a agai'a ne'ya'mo hane'niya kava hu'a apakaemo Goti'e aikeli sipisipi veka'e'mo vaya'animo mai'nae. Aigofe gemo nosaya vaya'mo mai'nayanage'a vai'mo afa'a o'apamigae.

Lole'e mago'e enisole vaya'mogimo ge hu'naya gemae

Halate agovana mago enisole vekamo'a alagepa faigoko gemo hanege hanege huno hanesiya gemo alu kotega alu kotegamo mai'naya vayanagi muki nofi vayanagi muki alu apake alu apakemo ne'aiya vayanagi muki alu apakufa'e alu apakufa'e vayanagi huno aeno hakalo huno hapa paisiyafe'mo koku'na'mo folagate'mo halelino u'niye. Halelino ne'uno'ae'mo alopa gefati'mo ge huno'ae'mo, Goti'a agoti huno apatesiya afina'mo ago afole ai'niya'mofe'mo Gotife'mo koli hutetapa agi'ale'mo alitapa asaga hutapa ateyo. Koku'nanagi ma mopagi solovala aninagi ma mopafi'mo uno nelamiya ani'mogi huno alo hu'niya vekaeke'mo mono hiyo, huno hu'niye. Huteno ne'vigeno'ae'mo anile mago napa tu enisole vekamo akame huno eno, Alopa taonimo Mamiloni kotegamo atamo leno asagalino hano hu'niye, he, leno asagalino hano hu'niye. Ani taonimo'a kumai kava'amo'mo lokiya ani'mo nofi alagafati anikana huno hane'nigeno muki vaya'mo alino apamiteno'ae'mo neyo, huno hu'niye, huno hu'niye.

Inagi anile'mo napa tali enisole vekamo'a anakae anakame huno eno alopa gefati'mo ge huno'ae'mo, Goti'a muki vaya'mogimo afela afulefe'mo mono huge aune'ae'mo mono huge nehu'apae'mo hapanile'mofi apayate'mofi hu'a alagena ya'amo ali'a mai'naya vaya'aife'mo Goti'a aipamo leno ne'apate. Goti'a aipamo leno ne'apateya kava'amo'mo mago lokiya anikana huno hane'niyanageno alino apamisige'a negae. Goti'a anilafa'mo alino nofi alagafati anipi'mo olaki'nifa lokiya ani'age'mo aipamo leno ne'apateya ani'age'mo agai'a kapufi'mo alino laki male'niyanageno alino apamisige'a negae. Apakaemo apaote enisole vaya'ai apaulagale'e aikeli sipisipimo aulagale'e'mo mai'ne'a yafapi'mo neleya atafi'mo maisageno lusi kava huno apakafu kigiye. 11 Atafi'mo maisageno apakafu nekisigeno'ae'mo halina'amo aino hano osuno aige aige huno maigiye. Afela afulefe'mo mono huge aune yafe'mo mono huge agi'alefe'mo alagena ya'amo alige hu'a mai'nisaya vaya'mogimo feluga'e hani'ilaga'e'mo mai'a falu osu'a apakafu kige kige hu'a maigae, huno hu'niye.

12 Huno hu'niya'mofe'mo apaote vaya'mogi Goti ke'aepa ge'amo akame hute'a Yesu'mo o'atale'a agaefe'mo apakesa afi'a fatago nehaya vaya'mogimo o'atale'a lokiya vai'a maiyo.

13 Inagi afuvana mago vekamo'a koku'napati'mo ge huno'ae'mo, Avo'mo kao. Ani afinateti'mo Ala kava nepi'mo mai'ne'a falisaya vaya'mogimo Goti aulagale'mo alagepa hu'a mai'nayanage'a afa'a apamogaga aigae, huno hu'nigeno Goti Auneme'amo'mo huno'ae'mo, he, falite'apae'mo alagepa kava'mo hu'naya anona'apimo alini'a ugaya'mofe'mo lokiya ali'ya'apimo atale'a mai'a falu hugae, huno hu'niye.

Ma mopafi'mo ne'ya'mo ago le'nigeno'ae'mo hatagauno ali'niya gemae

14 Hutege'na agovana yaveyave hiya'mo hane'nigeno vemo mafa'nemo ani hiyate'mo fai mai'nigeno agenopale kakolitamo ae'a apakase'naya vaya'mogi ali'a ne'malaya agufa kakolitamo hane'nigeno ayapi'mo ave nege nege naipemo aino fagagifa naipemo ali'nige'na age'nove. 15 Age'nogeno'ae'mo mago alu enisole vekamo'a aote mono nopati'mo eno hiyate'mo fai mai'niya vekae'mo alopa gefati'mo, Ma mopafi ne'ya'mo afu le'nigeno'ae'mo ne'ya'mo alisana afina'mo ago afole ai'niyanagi naipekamo alinikuka hataga huka aliyo, huno ha pai'niye. 16 Ha pai'nigeno'ae'mo hiyate'mo fai mai'niya vekamo lamino ma mopafi ne'ya'mo hataga hulino uneno huteno'ae'mo ma mopafi ne'ya'mo ali'niye.

17 Mago alu enisole vekamo koku'napi aote mono nopati'mo agae'e'mo eno aino fagagifa naipemo ali'niye. 18 Mago alu enisole vekamo ofalinimo ne'malaya hi'yalamute'mo hane'niya atale'mo ne'yagaiya vekamo'a eno aino fagagifa naipemo ali'niya enisole vekae'mo alopa gefati'mo, Nofi alagamo ago afu le'niyanagi ave nege nege naipemo aino fagagifa naipekamo alinikuka ma mopafi nofi alagamo hataga huka aliyo, huno ha pai'niye. 19 Enisole vekamo'a aino fagagifa naipe'aleti'mo ma mopafi nofi alagamo hataga hulino uneno huteno nofi alagamo aliteno alopa yafa yuvapafi'mo alino yaga auno male'niye. Goti'a aipamo leno apate'niyanageno'ae'mo ali'ya'amo ne'aliya vekamo'a aiyaleti'mo aeno lata paisiyafe'mo yuvapafi'mo alino male'niye. 20 Taoni malagamo alopa yuvapafi'mo aiyaleti'mo aeno latapai'nigeno kola ani'mo nelamiya anikana huno lami'niye. Lami'niya kola'mo'a hosi afumo avayafi nofite'mo haineno magoke aiyaya huno hane'nigeno tali hataleti kilomita yatala yakana huno hane'niye.

Copyright information for `KYG