Revelation of John 16

Goti'a aipamo leno ne'apateya kava'amo age'niya gemae

Hutege'nae'mo afuvana aote mono nopati'mo alopa gefati'mo seveni'a enisole vaya'aife'mo, Goti'a aipamo leno ne'apateya kayo'mo seveni'a yuvapafi'mo hane'niyanagi alinitutapa ma mopafi'mo aitapa lakiyo, huno hapa pai'nige'na afi'nove.

Hogote enisole vekamo'a yuvapa'amo alinino uno ma mopafi'mo aino laki'niye. Laki'nigeno afela afumo alagena ya'amo alite'a afela afumo aune'ae'mo mono hu'a mai'naya vaya'ai apakufale'mo lusi apamu'mo apale'nigeno apakafu ki'niye.

Napa tu enisole vekamo'a yuvapa'amo alinino uno solovala anipi'mo aino laki'nigeno fali'niya vekamo agufafati'mo kolakana agufa kola ani'mo alino hamale'nige'apae'mo muki anipi'mo mai'naya ya'mo fali'nae.

Napa tali enisole vekamo'a yuvapa'amo alinino uno alopa ani'mo nelamiya anipi'e aise ani'mo nelamiya anipi'e'mo aino laki'nigeno kola ani'mo alino hamale'niye. Anite'mo ne'yagaiya enisole vekamo'a huno'ae'mo,

O Ala kava nene, huno, Kagaemo fatago vekamo mai'nane. Hogoteka mai'neka hemeni'e'mo ne'mainanageka henaga'a'e'mo afa'a maisana vekamo mai'nane. Kagaemo kava'apimo alika fako huka ne'apatekae'mo fatago kava'mo nehane.
Apakaemo apaote vayakamo kamiti apamagi'nageno kola'apimo asagauno ai'niya'mofe'mo hosu kava'apimo anona'apilefe'mo kola'mo nesayafe'mo alika apami'nane. Kola'mo nesaya vaya'mo mai'naya'mofe'mae,
huno hu'nige'na afi'nove.
Hutege'na afuvana ofalinimo ne'malaya hi'yalamuteti'mo huno'ae'mo, He, Ala kava ne'mo Gotigae. Kayamufa vekamae. Alagepa huka alika fako huka apatetekae'mo fatago kavakamo nehane, huno hu'nige'na afi'nove.

Hutegeno napa fo enisole vekamo'a yuvapa'amo alinino uno yegele'mo aino laki'nigeno'ae'mo Goti'a yegemo leno apasagalisiya himamu'amo alino ami'nigeno yegemo'mo leno apasagali'niye. Yegemo'mo leno apasagali'nige'apae'mo ma mopafi vaya'mogimo Goti'a ani kayo'mo aepa vekamo agi'ale'mo hu'a faipa hu'a ate'nae. Apaipamo ali'a afe ole'naya'mofe'mo agi'ale'mo ali'a asaga hu'a o'ate'nae.

10 Napa faefu enisole vekamo'a yuvapa'amo alinino uno afela afumo mai'neno yagaino ne'apateya sia'ale'mo aino laki'nigeno muki haopa'alagamo afela afumo'a yagaino ne'apateya haopalagamo hani hu'nigeno lusi kava huno apakafu ki'nige'apae'mo apavenafu'nafi'mo apaveteti'mo hani'a alagi hute'a mai'nae. 11 Hu'nageno'ae'mo lusi apamu'mo apale'nigeno apakafu ki'niya'mofe'mo koku'napi ne'maiya Goti agi'ale'mo hu'a faipa hu'a ate'naya'monanafa apaipamo ali'a afe lete'a hosu kava'apimo o'atale'nae.

12 Napa sigisi enisole vekamo'a yuvapa'amo alinino uno alopa ani'mo uno nelamiya ani'mo agi'amo Yufaletisi anipi'mo aino laki'nigeno yegemo haine ne'eya kotegamo yagai'a ne'apataya kini vaya'mo esaya ka'mo valino apatesiyafe'mo ani'mo lane'niye. 13 Hutege'na agovana mago hosu aune vekamo alopa nagalo'yavemo avayafati'mo emi'nege mago alu hosu aune vekamo afela afumo avayafati'mo emi'nege mago hosu aune vekamo aigofe aune vekamo avayafati'mo emi'nege hu'a emi'e'a mai'nae. Ani lole'e mago'e hosu apaune vaya'mo esokana hu'a mai'nage'na apake'nove. 14 Apakaemo hosu apaune vaya'mo mai'ne'apae'mo aeto kava'mo no'agaya agufa aune kava'mo hu'nae. Apakaemo muki yagai'a ne'apataya kini vaya'aite'e vaya'aite'e'mo u e'a hu'a ala afina'mo muki lokiya'age Goti'a lekana pai male'niya afina'mo kame hisayafe'mo ali'a anupa hu'a apate'nae.

15 Yesu'a, Afiyo, kumaya'mo ne'aliya vaya'mo ne'aya kava hu'na emi'nesuge'apae'mo hapau aigae. Apakufalaga'age'mo mai'nisageno apavagage osisiyafe'mo apau okale'a kukena'apimo alagepa hu'a hu malete'a yagai'a ne'maisaya vaya'mogi Goti aulagale'mo alagepa hu'a mai'nayanage'a afa'a apamogaga aigae, huno hu'niye. 16 Hutege'apae'mo hosu apaune vaya'mogimo kini vaya'mo mago mopamo agi'amo Himulu gefati'mo Amaketoni kotegamo ali'a anupa hu'a apate'nae.

17 Napa seveni enisole vekamo'a yuvapa'amo alinino uno hiya koku'napi'mo aino laki'nigeno'ae'mo mago vekamo aote mono nopati'mo yagaino ne'apateya vekamo sia'aleti'mo alopa gefati'mo, muki kava'mo alagi hano hu'niye, huno hu'niye. 18 Huno hutegeno hafosamo haigefe hu'nigeno'ae'mo alino alave alave huteno alopa agemo aiteno hakalu hakalu hu'nigeno lusi imima'mo ali'niye. Ani lusi imima'mo vaya'mo ma mopafi'mo mai'nageno'ae'mo ne'aliya agufa imima'mo o'ali'nifa aeno agase'niya agufa imima'mo ali'niye. 19 Lusi imima'mo aliteno alopa taonifi mopamo alino aino akaka vae'nigeno alino fako huno lole'e mago'e atupamo hamaleno ate'niye. Muki alu kotega alu kotegamo hane'niya taonimo asagauno ai'niye. Goti'a alopa taonimo Mamiloni taonie'mo age okanino agesamo afiteno nofi alagafati ani'mo kapufi'mo havai te'niya ani'mo alino ami'niya kava huno aipamo leno apateteno lusi kayo'mo apami'niye. 20 Muki ani ago'nanena'amo aune he'nigeno muki ave'e'mo aune heno uno lageso husiyategamo u'niye. 21 Koku'napati'mo lusi ko mopa ko'mo ma mopafi vaya'aitegamo ai'niye. Magoke magoke ko mopa ko'mo kana hu'niya ya'amo lole laisi kukana huno kana'amo hane'niye. Goti'a lusi ko mopa ko kayoteti'mo apamagi'niya'mofe'mo Goti agi'ale'mo hu'a faipa hu'a ate'nae.

Copyright information for `KYG