Revelation of John 2

Efasasi taonifi'mo mai'naya siosi vaya'aife'mo hapa pai'niya gemae

Kagaemo Efasasi taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo seveni'a kanefi'mo lamaga nayapi'mo atafau'na ali'ne'na seveni'a goli yafateti'mo alo hu'naya hi'yalamute'mo lamumo male'naya hi'yalamu'mo folagapi'mo umenitata nehuva vekamo'namo lapa nepauve. Nehaya kavatapimo ago lapake'nove. Lapakaemo lokiya ali'ya'mo ne'alitapae'mo o'ataletapa atafauta alagi huta ne'maige'na lapake'nove. Lapakovana hosu vaya'aife'mo olapau'nigetapae'mo apa vaya'mo mai'none, hu'a hu'naya vaya'mo alita fako hutapa apatetetapae'mo aigofe gemo nehae, hutapa hu'nae. Nagi'nilefe'mo hanageke ya'mo ali'netapae'mo alaga olapae'nigetapa o'ataleta atafautapa alagi hutapa mai'naya'monanafa mago geleti'mo ali'na api ai'na lapatesuva gemo hane'niye. Hogotetapa nagaefe'mo lapau lapayamopafi'mo lapau'niya kava'mo ago ataletapa olapau'nigetapa lapayalo falo hutapa mai'nae. Lapakaemo muga anaga alagepa kavategati'mo ataleta asagautapa ai'nayanagi hogotetapa hu'naya kavafe'mo halate lapakesamo afita ho hiyo. Lapaipamo alita afe letetapae'mo hogotetapa hu'naya agufa kava'mo hiyo. Lapaipamo alita afe olesayana emi'ne'nae'mo aise hi'yalamutapile'mo lamumo ne'malaya hi'yalamutapimo alini'na uguve. Ani hosu kava'mo nehaya'monanafa mago alagepa kava'mo nehae. Nikolasi mono vaya'mogi nehaya kavafe'mo o'nahau'niya kava huno nolapaiye.

Apakesamo hane'nisiya vaya'mogi Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afiyo. Nagaemo kame hu'a ae'a ne'apakasaya vaya'aife'mo, Afa'a maisaya ya'mo alino ne'apamiya yosa alagamo Goti hoyamo agi'amo Palanaisi hoya folagapi'mo hane'niya yosa alagamo etapa afa'a lagita neyo, hu'na hapa paiguve, huno naha pai'niye.

Simena taonifi'mo mai'naya siosi vaya'aife'mo hapa pai'niya gemae

Kagaemo Simena taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo hogote vekamo mai'ne'na henaga vekamo mai'nove. Falite'na halate he ti'nova vekamo'na mani gemo lapa nepauve. Lapake'novana ali'yatapimogi kanamo ne'aliya kavatapigi kafu nehaya kavatapimogi hu'na ago lapake'nove. Kafu hu'naya'monanafa kagemi yatapimo hane'niya vaya'mo mai'nae. Hu'a faipa hu'a nelapataya vaya'mogimo, Yu vaya'mo mai'none, hu'a nehaya'monanafa Yu vaya'mo o'mai'nae. Yu mono kava'mo osu'a Satani mono kavake'mo nehage'na apake'nove. 10 Aise afina'mo utesigetapa kana ya'mo aligaya'mofe'mo koli osiyo. Afiyo, Satani'a lapamalageka huteno kalavusi huno lapatesigetapa naya lole'a afina'mo hanageke ya'mo aligae. Lapakesa afita fatago hu'naya kavatapile'mo atafauta alagi huta maime maime ne'utapa faliyo. Nehisage'nae'mo ae'a ne'apakasaya vaya'mogi ne'aliya agufa kakolitagana ya'mo maige maige hutapa maisaya ya'mo ali'na lapamiguve. 11 Agesamo hane'nisiya vekamo'mo Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afino. Napa tu afina'mo nefaliya kava'mo'a kame hu'a ae'a ne'apakasaya vaya'mo afa'a ohapaegaiye.

Pegamamu taonifi'mo mai'naya siosi vaya'aife'mo hapa pai'niya gemae

12 Kagaemo Pegamamu taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo aluga aluga'ati'mo ave ne'neya naipemo ali'nova vekamo'namo mani gemo lapa nepauve. 13 Lapake'novana Satani'a yagaino ne'apateya kote'mo mai'nage'na lapake'nove. Nagi'nimo o'ataletapa atafauta alagi hutapa mai'nae. Mago vaya'mogimo lama ge nava gemo hu'niya vekamo agi'amo Anitipasi'a Satani'mo ne'maiya kotegamo lapakae folagapi'mo kamiti amagi'naya'monanafa lapakaemo o'nataletapa nagaefe'mo mago'e hutapa lapakesa afita fatago nehae 14 Nehaya'monanafa mago gemo ali'na api ai'na lapatesuva gemo hane'niye. Akeya'vilaga Melami'a Meleki'mo alino aya male'nigeno Isaleli vaya'mogi hosu kava'mo hisayafe'mo Meleki'a apayate'mo ali'nige'apae'mo aigofe goti'apimogimo apami'naya ofalini afumo ame'amo ali'a nete'a kumai kava'mo hu'nae. Mago lapakaepati vaya'mogimo Melami'a alino aya male'niya agufa gemo akame nehae. 15 Lapakaepati'mo mago vaya'mogimo Nikolasi mono vaya'mogi ali'a apaya ne'malaya agufa gemo akame nehaya'mofe'mo 16 lapaipamo alita afe leyo. Lapaipamo alita afe olesaya'mo'mo malage hu'na lapakaetegamo emine'na navayafi'mo hane'niya naipe'nileti'mo lapakaefe'mo kame huguve. 17 Agesamo hane'nisiya vekamo'a Auneme'amo'mo siosi'afi siosi'afi'mo ne'maiya vaya'aife'mo hapa nepaiya gemo afino. Nagaemo kame hu'a ae'a ne'apakasaya vaya'mo koku'napi fala kino hane'niya ne'ya'mo agi'amo mana ne'ya'mo ali'na apamiguve. Apamite'na yaveyave yafate'mo saufa agi'amo avo'mo kae'na apamiguve. Ani saufa agi'amo muki vaya'mogimo o'afisage'a ani yafa'mo ali'nisaya vaya'amogige'mo afigae.

Taiyataila taonifi'mo mai'naya siosi vaya'aife'mo hapa pai'niya gemae

18 Kagaemo Taiyataila taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo Goti mafa'ne'amo'na naulagala'mo ata vaikana huno nelegeno naiyala'mo haesa yafa'mo o'ani'ya'mo ae'a kalo pae'naya yafakana huno hane'nige'na mai'nova vekamo'na mani gemo lapa nepauve. 19 Lapake'novana nehaya kavatapimogi lapau lapayamopafi'mo nelapaiya kavatapimogi lapakesa afita fatago nehaya kavatapigi ali'ya'mo ne'aliya kavatapigi o'ataletapa atafauta alagi hutapa ne'maiya kavatapigi hu'na ago lapake'nove. Hogotetapa hu'naya kava'mo aeta agasetapa mago'e alagepa kava'mo hutapa ne'maiye.

20 Nehaya'monanafa mago gemo ali'na api ai'na lapatesuva gemo hane'niye. Lapakaefe'mo mago a kanomo Yesemeli'a, Gotitegati gemo alini'ne'na ae'na hakalo hu'na hapa nepauva a kanomo mai'nove, huno nehiya a kanomo alitapa ha faita o'ataletapa afa'a ate'nae. Agaemo alino apaya maleteno apayate ali'nige'apae'mo ali'ya'nimo ne'aliya vaya'mogimo kumai kava'mo hute'apae'mo aigofe goti'apimogi ne'apamiya ofalini ne'ya'mo ali'a ne'nae. 21 Hosu kava'mo nehana kavakamo atalo, hu'na hute'na aipamo alino afe lesiya afina'mo ami'nova'monanafa aipamo alino afe lesiyafe'mo ohau'nigeno kumai kavake'mo nehiye. 22 Nehiya'mofe'mo ageyo, ali'na hipa'ale'mo yaga au'na atesugeno lusi kana ya'mo aligiye. Agae'e'mo kumai kava'mo hu'naya vaya'mogimo agae'e'mo hosu kava'mo hu'naya kava'apie'mo apaipamo ali'a afe olesage'nae'mo hosu ya'mo ali'na apamisuge'a lusi kava hu'a kana ya'mo aligae. 23 Ani kava'mo hute'na mafa'ne anaga'amo apamagisuge'a faligae. Inagi siosi'afi siosi'afi'mo mai'naya vaya'mogimo nagaemo hisuva kava'mo agete'apae'mo, agaemo vaya'ai apaipa apakesafi'mo ne'ageya vekamo mai'niye, hu'a nagegae. Na kava hu'nisafi anonatapilefe'mo lapamete lapamete hu'na lapamiguve.

24 Lapamiguva'monanafa mago Taiyataila taonifi'mo mai'naya siosi vaya'mogitapamo ani agufa hosu gemo afitetapa akame nosae. Mago vaya'mogi mani gee'mo, Satani'a alino fala ki male'niya gemo hane'niye, hu'a hu'naya gemo lapakaemo o'afi'nae. Nagaemo hu'nae'mo, mago'e hu'na kana ya'mo ali'na olapamiguva'monanafa 25 afi'naya geleke'mo atafauta alagi huta maime maime ne'vige'nao emi'neno. 26 Nagaemo kame hu'a ae'a apakasete'a afi'naya gele'mo o'atale'a atafau'a alagi hume hume ne'visageno'ae'mo hano hisiya afina'mo afole aisige'nae'mo muki alu nofi alu nofi vaya'aite'mo yagai'a apatesaya himamu'nimo ali'na apamiguve. 27 Afo'nimo'mo yagai'na apatesuva himamu'amo alino nami'niya kava hu'na himamu'nimo ali'na apamisuge'a

Aeni kayoteti'mo yagai'a apategae. Vaya'mogimo mopa samole'mo kayoteti'mo amaginageno aino akaya heno aise aise nehiya kava hu'a yagai'a apategae.
28 Himamu'nimo ali'na apamite'na netepi'mo magoke'age'mo hane'neno aeno ha neleya kanefi'mo ali'na apamiguve. 29 Agesamo hane'nisiya vekamo'mo Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afino.

Copyright information for `KYG