Revelation of John 20

Vani tauseni'a kafugamo yagaino apatesiya kava'mo age'niya gemae

Agovana mago enisole vekamo koku'napati'mo emine'niya vekamo ayapi'mo ki'mo ive keli avayale kitale ki'e alopa seli nofi'e'mo aliteno emine'nige'na age'nove. Agaemo alopa nagalo'yavemo akeya'vilaga mai'niya nagalo'yavemo agi'amo Nevo'ae huno hanege mago alu agi'amo Satani'ae huno hanege hu'niya vekamo atafauno seli nofiteti'mo kino ate'nigeno vani tauseni'a kafugamo mai'niye. Atafauno ive kelifi'mo alino yaga auno ateteno alagi yakino o'atesiyafe'mo loki ae maleteno kameleti'mo faleno akani male'niye. Enisole vekamo'a nagalo'yavemo'mo alu kotega alu kotegamo mai'naya vaya'mo apayate'mo o'alisiyafe'mo ive kelifi'mo alino yaga auno ate'nigeno maime maime ne'viyanageno vani tauseni'a kafugamo hano hutesigeno'ae'mo aise afina'mo afa'a maisiyafe'mo hatu maeno ategaiye. Ani kava'mo agete'nae'mo mago'e kava'mo age'novana agoti hu'a apatesaya himamu'apimo ali'naya vaya'mo siate'mo mai'nage'na apake'nove. Agovana naipeleti'mo lugo'apimo he'a hataga hu'nage'a fali'naya vaya'ai apaune'apame'amo apake'nove. Ani vaya'mogimo Goti ge'amo Yesufe'mo ava gemo hapa pai'naya'mofe'mo lugo'apimo he'a hataga hu'nae. Apakaemo afela afulefe'mo mono osuge aune'ae'mo mono osuge hute'a hapanile'e apayate'e'mo afela afumo alagena ya'amo o'ali'nae. Apakaemo afa'a maisaya ya'mo alite'a Kalaisi'e'mo vani tauseni'a kafugamo magokepi mai'ne'a yagai'a apate'naya'monanafa mago alu vaya'mo fali'naya vaya'mo ani afina'mo he oti'nayanage'a vani tauseni'a kafugamo hano hutesige'apae'mo he tigae. Hogoteno ago alino he tino apate'niya vaya'mo apaote vaya'amo mai'ne'a Goti aulagale'mo alagepa hu'a mai'nayanage'a afa'a apamogaga aigae. Napa tu fali kava'mo'a afa'a aeno o'apakasesige'a Goti'e Kalaisi'efe'mo mono hu'a ne'apataya vaya mai'ne'apae'mo Kalaisi'e'mo vani tauseni'a kafugamo magokepi lokae'a yagai'a apategae.

Satani'mo alino ago'ya faino atale'niya gemae

Vani tauseni'a kafugamo ago utesigeno'ae'mo enisole vekamo'a Satani'mo kalavusifati'mo hatu maeno ategaiye. Uno muki alu kotega alu kotegamo mai'naya vaya'mo Gogi nofi vaya'e Megogi nofi vaya'e'mo humi apateteno kame hisayafe'mo asole vaya'mo ani kahaepamo lekana opaisuna agufa vaya'mo alino anupa huno apategaiye. Atagu fae'a hai'a Goti'a hau'niya taonifi'mo mai'naya vaya'mo fai'a ku ai'a apate'naya'monanafa koku'napati'mo atamo emineno leno apasaga litegeno 10 Nevo'mo apayate ali'niya vekamo ata kotu'mo sofa yafapi'mo neleya ata kotupi'mo alino yaga auno atale'niye. Afela afu'e aigofe aune veka'e'mo mai'na'a kopi'mo alino yaga auno atale'niye. Apakaemo feluga'e hani'ilaga'e'mo alagi apakafu kino hano osuno apakafu kige kige hu'a maigae.

Agoti huno apatesiya kava'mo age'niya gemae

11 Hutege'nae'mo agovana alopa yaveyave siamo yagaino ne'apateya vekamo sia'amo hane'nigeno mago vekamo ani siate'mo fai mai'nige'na age'nove. Ma mopa'e koku'na'e'mo ani vekamo augosamo ne'age'anae'mo anaune he'ana u'ana lageso hu'na'ae. 12 U'na age'na apakovana fali'naya vaya'mo apaki hane'niya vayanagi apaki ohane'niya vayanagi hu'a yagaino ne'apateya vekamo sia aulagale'mo he ti'a mai'nageno muki muku'amo alino vaka leteno mago alu mukumo afa'a maisaya ya'mo ali'naya vaya'ai apaki'apimo hane'niya mukumo alino vaka le'niye. Agaemo fali'naya vaya'mogi hu'naya kava'apimo muki asole mukufi'mo avo'mo kae male'niya kava'apilefe'mo agoti huno apate'niye. 13 Solovala anipi'mo fali'naya vaya'mo solovala anipati'mo he tige ki'a apate'naya vaya'mo kanolufati'mo he tige fali'nageno apakupi mafa'nemo uno ne'maiyateti'mo he tige hu'a he ti'a mai'nageno agoti huno apate'niye. 14 Goti'a nefaliya kava'e vaya'mo fali'nageno apakupi mafa'ne'amo uno ne'maiyatega'e'mo alino hano huno anate'niye. Ata kotupi'mo mai'naya kava'mo agi'amo napa tu afina'mo nefaliya kavane. 15 Mukufi'mo afa'a maisaya ya'mo ali'naya vaya'ai apaki'apimo hane'niya mukufi'mo ageteno'ae'mo apaki'apimo avo'mo kaeno o'male'nisiya vaya'mo alino ata kotupi'mo yaga auno apatale'niye.

Copyright information for `KYG