Revelation of John 3

Satisi taonifi'mo mai'naya siosi vaya'aife'mo hapa pai'niya gemae

Kagaemo Satisi taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo Goti Auneme'amo'mo seveni'a himamu'amo alite'na seveni'a kanefite'mo atafau'na mai'nova vekamo'na mani gemo lapa nepauve. Nehaya kavatapimo ago lapake'nove. Vaya'mogimo lapakitapimo lapami'apae'mo, Afa'a ne'maiyategamo ne'maiya vayane, hu'a nehaya'monanafa o'alitapa nefaliya kavategamo ne'maiya vaya'mo mai'nae. Lapaupati'mo he titapa maiyo. Mago alagepa kavatapimo ago hano hugefe nehiyanagi alita lokiya vaitapa ateyo. Kavatapimo'mo Goti'nimo aulagale'mo haino metale'nige'na age'nove. Haino metale'niya'mofe'mo afitetapa ali'naya gee'mo lapake okanitapa kanale huta akame nehutapa lapaipamo alitapa afe leyo. Lapaupati'mo he oti'nisage'nae'mo kumaya'mo ne'aliya vekamo ne'eya kava hu'na fiku kesi kateti'mo esugetapae'mo hainu afina'mo esufigetapa o'nagegae. Mago Satisi taonifi'mo mai'naya siosi vaya'amogitapamo kukenatapile'mo o'ani'yamo ofai'niye. Lapakaemo yaveyave kukenamo alita vaitetapa nagae'e'mo umenitata hisaya vaya'mo mai'nae. Kame hu'a ae'a ne'apakasaya vaya'mogi yaveyave kukenamo ali'a vaisage'na afa'a maisaya ya'mo ali'nisaya vaya'ai apaki'apimo Goti mukufi'mo avo'mo kae male'niyanage'na ae'na kalo pae'na o'atalegauve. Nagaemo afo'nimo aulagale'e enisole vaya'ai apaulagale'e'mo apaki'apimo aegauve. Agesamo hane'nisiya vekamo'mo Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afino.

Filatefiya taonifi'mo mai'naya siosi vaya'aife'mo hapa pai'niya gemae

Kagaemo Filatefiya taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Nagaemo naote vekamo lama ge'age'mo nehuva vekamo'naNevini'a yagaino ne'apateya kava hu'na yagai'na apatesuva ki'mo ali'nova vekamo'na mani gemo lapa nepauve. Kitamo yaki'na apate'nisuge'apae'mo mago vaya'mogi e'a kitamo ki'a o'apategae. Kitamo ki male'nisuge'apae'mo mago vaya'mogi e'a kitamo yaki'a o'apategae. Nehaya kavatapimo ago lapake'nove. Ageyo, hu'na, Lapaulagale'mo ago kitamo yaki'na lapate'novanage'a mago vaya'mogi e'a kitamo ki'a olapategae. Lapake'novana lokiyatapimo aise'amo hane'niya'monanafa ge'nimo akame nehutapae'mo nagi'nilefe'mo o'ali'none, hutapa hega o'ae'nage'na lapake'nove. Mago vaya'mogimo Satani'e'mo ali'a anupa hu'a mai'ne'apae'mo, Yu vaya'mo mai'none, hu'a nehaya'monanafa aigofe'mo nehae. Lama gemo lapa nepauve, nagaemo apavaleli'ne'na lapaiyafi'mo apatesuge'apae'mo Kalaisi'a lapakaefe'mo hau ayamopafi'mo hau'niya vaya'mo mai'nae, hu'a hugae. 10 Nagaemo, o'ataletapa atafauta alagi hutapa maime maime viyo, hu'na lapa pai'nova gele'mo yagaitapa ate'naya'mofe'mo yagai'na lapatesugetapa muki ma mopafi vaya'mogimo lapamalageka hisaya afina'mo faita kasalo paetapa afa'a maigae. 11 Aise afina'mo utesige'na emi'negauve. Ae'a ne'apakasaya vaya'mogi ne'aliya agufa kakolitatapimo aligae. Fiku yanage'a mago vaya'mogimo lapakaemo alisaya kakolitatapimo anonale aligayanagi ali'naya yate'mo atafauta alagi hutapa maiyo. 12 Nagaemo kame hu'a ae'a ne'apakasaya vaya'mo apavale'na Goti'nimo aote mono no'afi'mo posi yosagana hu'na apategauve. Nopi'mo mai'ne'apae'mo halate kumatagamo u'a olamigae. Nagaemo apakaete'mo Goti'nimo agi'amo avo'mo kae malete'na Goti'nimo saufa Yulusalemu taonimo agi'amo avo'mo kaete'na saufa nagi'nimo avo'mo kae malegauve. 13 Agesamo hane'nisiya vekamo'mo Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afino.

Leyotisiya taonifi'mo mai'naya siosi vaya'aife'mo hapa pai'niya gemae

14 Kagaemo Leyotisiya taonifi'mo mai'naya siosi vaya'aite'mo yagaino ne'apateya apa vekalegamo mani kaha nepauva gemo avo'mo kaeka atalegeno vino. Goti'a ge'amo naha pai'nige'na he lama gemo nehuva vekamo mai'nove. Gotife'mo fatago gemo alagi lama ge'amo ae'na hakalo hu'na hapa nepauva vekamo mai'nove. Muki ya'amo Goti'a alo hu'niya ya'mo aepa fai'nova vekamo mai'ne'nae'mo mani gemo lapa nepauve. 15 Nehaya kavatapimo ago lapake'nove. Lapake'novana yasi anikana hutapa o'maige amuko anikana hutapa o'maige hu'nage'na lapake'nove. Yasi anikana hutapa mai'nafi amuko anikana hutapa mai'nafi huno afa'a nahau'niye. 16 Nahau'niyesina'monanafa yasi anikana hutapa o'maige amuko anikana hutapa o'maige hu'netapa aise'amo amuko hu'niya anikana hutapa ne'maiya'mofe'mo navayafati'mo mu vali'na lapatalegauve. 17 Lapakaemo, Kagemi yatimo hane'niya vaya'mo mai'neta muki yatimo ali'none. Mago yafe'mo kafu osu'nona vaya'mo mai'none, hutapa nehaya'monanafa lapakaemo, lagaemo hosu kavapi'mo maige hapau hu'a latesaya kopi'mo maige kagemi ya o'ali'nona vaya'mo maige laulagamo ali hu'niya vaya'mo maige lagufa'alaga'age'mo maige huta mai'none, hutapa no'agae. 18 Ani kava'mo hutapa mai'naya'mofe'mo kagemi yatapimo hanesiya vaya'mo maisayafe'mo goli yafa'mo atafi'mo kae'na ali'na alagepa hu'na ate'nova goli yafa'mo nagaeteti'mo miya faiyo. Lapakufa'alaga'age'mo mai'nayanageno lapavagage osisiyafe'mo nagaeteti'mo yaveyave kukenamo miya faita vaiyo. Lapaulagaleti'mo alagepa hutapa agesayafe'mo lapaulagale'mo falesaya malasinimo nagaeteti'mo miya faiyo.

19 Muki nahau nayamopafi'mo nahau'niya vaya'aife'mo, hosu kava'mo nehae, hu'na hute'na ali'na api ai'na ne'apatova'mofe'mo lapayamukiki hutapa lapaipamo alitapa afe leyo. 20 Nageyo, kipate'mo he ti'na mai'ne'na hakalu hakalu huge huge hu'na ne'mauve. Mago vekamo'mo ge'nimo afiteno kitamo yakino natesige'nae'mo hai'na agae'e'mo ne'ya'mo nesugeno nagae'e'mo ne'ya'mo negaiye. 21 Nagaemo kame hu'a ae'a ne'apakasaya vaya'mo ali'na apamisuge'a fai mai'ne'na yagai'na ne'apatova siate'mo nagae'e'mo fai maigae. Nagaemo ago kame hu'na ae'na apakase'nogeno afo'nimo'mo fai mai'neno yagaino ne'apateya sia'amo nami'nige'na fai mai'nova kava hu'a nagae'e'mo fai maigae. 22 Agesamo hane'nisiya vekamo'mo Goti Auneme'amo'mo siosi'afi siosi'afi'mo mai'naya vaya'aife'mo hapa nepaiya gemo afino, huno hapa pai'niye.

Copyright information for `KYG