Revelation of John 6

Kamemo alino akauteno'a pepamo alino ata le'niya gemae

Age'novana aikeli sipisipimo'a hogote kamemo alino ne'akaigeno'ae'mo magoke vekamo lole'e lole'e vayapati vekamo'mo alopa gefati'mo hakalu hakalu hugekana agufa gemo, eka ago, huno ge hu'niye. Huno hu'nige'na agovana naulagale'mo yaveyave hosimo mai'nige'na age'nove. Hosile'mo fai mai'niya vekamo'a ati ali'nigeno Goti'a yagaino ne'apateya kakolitamo alino ami'nigeno aliteno uno kame huno aeno ne'apakaseya vekamo'mo uno kame huno aeno apakasesiyafe'mo u'niye.

Aikeli sipisipimo'a napa tu kamemo alino ne'akaigeno'ae'mo lole'e lole'e vayapati'mo napa tu vekamo'mo eka ago, huno ge hu'nige'na afi'nove. Mago alu hosimo haesa hosimo e'nigeno ani hosile'mo fai mai'niya vekamo'a apamagisiyafe'mo kame huno apatesiya himamu'amo ali'niye. Mago vekamo'a alopa naipemo alino ami'nigeno aliteno u'niye.

Aikeli sipisipimo'a napa tali kamemo alino ne'akaigeno'ae'mo lole'e lole'e vayapati'mo napa tali vekamo'mo eka ago, huno ge hu'nige'na afite'na age'novana naulagale'mo anupa hosimo e'nigeno ani hosile'mo fai mai'niya vekamo'a sigelimo ayapi'mo ali'niye. Inagi lole'e lole'e vayapati vekamo'a age aigekana huno ge huno'ae'mo, kafu hu afinafe'mo magoke afina'mo ali'ya ali'niya yatefe'mo miya'apimo afa'a atale'a lole'e lole'e laisi kapumo hugekana hu'a hu'naya ya'mo agi'amo vitimo miya faigae. Magoke afina'mo ali'ya ali'niya yatefe'mo miya'apimo afa'a atale'a tuolofu'a kapumo napa tu agufa vitimo agi'amo malimo miya faigae. Alifi yosa alagafati ani'e nofi alagafati ani'e'mo alika hosu huka o'ato, huno hu'niye.

Inagi aikeli sipisipimo'a napa fo kamemo alino ne'akaige'nae'mo afuvana lole'e lole'e vayapati'mo napa fo vekamo'a eka ago, huno ge hu'niye. Age'novana naulagale'mo falupa hosimo mai'nigeno ani hosile'mo fai mai'niya vekamo agi'amo vaya'mo apamagisige'a falisaya vekae, huno hane'niye. Eno ne'vigeno akame huno mago vekamo e'niye. Agi'amo fali'naya vaya'mo u'a mai'naya kotegae, huno hane'niye. Anakaemo ma mopafi mai'naya vayapati'mo ali'ana fako hu'ana lole'e lole'e vaya'mo apate'ne'ana lole'e mago'e vaya'mo afa'a apatete'ana magoke vaya'mo apamagisa'a himamu'animo ali'na'ae. Anakaemo kame hu'ana apatesa'age'apae'mo falige kafu hu kava'mo ali'ana afole ai'ana atesa'age'apae'mo falige kaita hapau kava'mo ali'ana afole ai'ana atesa'age'apae'mo falige afela afumogimo hapaesage'a falisayafe'mo ali'ana apatesa'age'a u'a hapaesage'apae'mo falige hu'a falisaya himamu'animo ali'na'ae.

Agaemo napa faefu kamemo alino ne'akaige'nae'mo agovana fali'naya vaya'ai apakupi mafa'nemogi ofalinimo ne'malaya hi'yalamu'mo hipakapi'mo mai'nage'na apake'nove. Ani vaya'mogimo Goti ge'amo Kalaisife ava gemo o'atale'a alagepa hu'a ae'a hakalo hu'a hapa pai'naya'mofe'mo apamagi'nae. 10 Apakaemo alopa gefati'mo hu'apae'mo, kayamufa'age ala kava ne'mogae, kaote vekamo lama ge'age'mo nehana vekamogae, Ma mopafi vaya'mogimo kamiti lamagi'naya'mofe'mo na magi afina'mo utesigeka hosu kava'apimo alika fako huka apateteka kayo'mo apamigane, hu'a afi ge'nae. 11 Goti'a yatala yaveyave kukenamo alino apamete apamete huno apamiteno'ae'mo, Lapamagi'nagetapa fali'naya kava hu'a ali'ya'nimo lapakae'e'mo magokepi lokaeta ne'aliya vaya'e konagatapimogi'e'mo apamagisage'apae'mo faligae. Aise afina'mo afa'a apakava maime maime ne'visage'apae'mo muki falisaya vaya'mo afa'a faligae, huno hapa pai'niye.

12 Age'novana aikeli sipisipimo'a napa sigisi kamemo alino ne'akaigeno'ae'mo lusi imima'mo ali'nigeno yegemo oleno alino anupa'age huteno anupa lavolavogana hu'nigeno kaimo'mo alino kolakana hu'niye. 13 Yasimo'mo yu'yu yosa alagamo alino hali hutalegeno asagauno ne'aiya kava huno muki kanefi'amo ma mopafi'mo asagau'a ai'nae. 14 Hiya koku'na'mo mati yakaikona ali'a kafage kigekana huno hano hu'niye. Muki ave'e ani ago'nanena'mogi'e'mo no'apimo atale'a u'a lageso hisayafe'mo u'nae.

15 Hutege'apae'mo ma mopafi ala kini vayanagi yagai'a ne'apataya vayanagi ati vaya'aite'mo yagai'a ne'apataya vayanagi kagemi ya'api'e vayanagi apayamufa vayanagi muki kalavusi ali'ya ne'aliya vayanagi afa'a ne'maiya vayanagi hu'a muki vaya'amo u'a yafa kapi'mo fala kige avefi'mo hane'niya yafa kapi'mo hai'a fala kige hu'a mai'nae. 16 Apakaemo ave'e yafa'efe'mo, Aika naku paeka emikeka aika lati kaege'anao yagaino ne'apateya vekamo siate'mo fai mai'niya veka'e aipamo leno nelateya aikeli sipisipimo'e'mo olagesa'afe'mae. 17 Anaipamo le'ana ne'apata'a afina'mo afole ai'nigi haiya vaya'mogi afa'a he ti'a maigae, hu'a hu'nae.

Copyright information for `KYG