Romans 1

Nagaemo Polo'na Yesu Kalaisi ali'ya'amo ne'aluve. Agaemo apa veka'amo mai'ne'na Goti alagepa faigoko ge'amo ae'na hakalo hu'na hapa paisuvafe'mo ago lekana paino nateteno'ae'mo nagaefe'mo keya aeno ge hu'niye. Akeya'vilaga Goti'a agaetegati gemo alini e'a ae'a hakalo hu'a hapa nepaiya vaya'mogi aote mukufi'mo avo'mo kae male'naya ge'apimo'a mani alagepa faigoko ge'alefe'mo, afole aigiye, huno hapa pai'niye. Mani gemo mafa'ne'amo Ala kava netimo Yesu Kalaisife'mo ava gemo hane'niye. Agaemo ma mopafi mai'niya kavatefe'mo mago a kanomo'a Nevini aginago'amo alino ate'niye. Aote auneme'e vekamo mai'niya kavatefe'mo Goti'a agai'a himamu'aleti'mo, fali'niyateti'mo ago alino he tino ateteno'ae'mo, mafa'ne'nimo mai'niye, huno alino apave li'niye. Goti'a agaeteti'mo fiku naha maeno namiteno Kalaisi agi'alefe'mo apa ali'ya'amo alisuvafe'mo navaleno nate'niye. Goti'a muki nofi vaya'aife'mo akame hiyo, huno hu'niya ge'amo akame hu'a apakesa afi'a fatago hisayafe'mo apa ali'ya'amo alisuvafe'mo navaleno nate'niye. Lapakae'e'mo ani nofi vayapati'mo mai'nageno Goti'a keya aeno ge hu'nigetapa eta Yesu Kalaisi vaya'amo mai'nae. Mai'naya'mofe'mo nagaemo muki Lomu taonifi'mo mai'naya vaya'mogitapae'mo Goti'a hau ayamopafi'mo hau'nigeno'ae'mo lapaote vaya'amo maisayafe'mo keya aeno ge hu'niya vaya'amogitapae'mo mani avo'mo nekaove. Afotimo Goti'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino.

Hao ke heno nunumu huno apate'niya gemae

Muki ma mopafi vaya'mogimo lapakesa afita fatago nehaya kavafe'mo lapava gemo nehaya'mofe'mo hogote'na ani kavatefe'mo Gotife'mo Yesu Kalaisiteti'mo hao ke nehove. Nagaemo amega nagufaleti'mo Goti ali'ya'amo o'ali'na naipafati'mo Goti mafa'ne'amo alagepa faigoko ge'alefeke'mo ali'ya'mo ne'aluve. Nagaemo nunumu hu'na hano osu'nofa muki afina'mo nunumu hu'na nelapatove. Goti'a nage'niyanageno he, nehiye, huno, naha maesiya gemo afa'a lapa paigiye. 10 Nagaemo yatala afina'mo lapakaetegamo ugefe'mo nehu'nae'mo, hemenimo kahau'nisiyana visuva ka'mo valika nato, hu'na nunumu nehuve. 11 Nagaemo Goti Auneme'aleti'mo fiku alisaya ya'mo ali'na lapamisugeno lokiya vaino lapatesigetapa atafauta alagi hutapa maisayafe'mo u'na lapakesuva naipamo nekaliye. 12 Ali'na lapamiguve, hu'na huva'monanafa nagae'e lapakae'e'mo magokepi lagesa afita fatago nehuna'mofe'mo magokepi lokaeta mai'neta naha maesage'na lapa maegauve.

13 Konaga'nimogitapae, mago gemo afisayafe'mo nahau'niyanagi lapakaemo alagepa hutapa afiyo. Muki afina'mo hu'nae'mo, uguve, hu'na nehuva'monanafa lapakaetegamo visuva ka'mo ago akani male'niye. Nagaemo Yu nofi vayapati o'mai'naya vaya'aitegamo u'na Goti ge'amo hakale'nogeno alagamo ae'niya kava hu'na lapakaetega'e'mo u'na Goti ge'amo hakalesugeno alagamo aesiyafe'mo ne'nahaiye. 14 Goti'a nami'niya anona'alefe'mo Galiki nofi vaya'aifenagi muki nofi vaya'aifenagi afi'naya vaya'aifenagi o'afi'naya vaya'aifenagi ae'na hakalo hu'na hapa paiguve. 15 Visuvafe'mo Goti'a agai'a ya'mo hane'niya'monanafa Lomu taonifi'mo mai'naya vaya'mogitapae'mo u'na alagepa faigoko ge'amo ae'na hakalo hu'na lapa paisuvafe'mo nahau'nige'na ago alo hu'na mai'nove.

16 Na kava hige'naene. Kalaisife'mo alagepa faigoko ge'alefe'mo navagage osu'nige'na namogaga ne'auva'mofe'mae. Goti'a ani gemo himamu'aleti'mo apakesa afi'a fatago nehaya vaya'ai apakufamo alino katino ne'apate. Hogoteno Yu nofi vaya'aitegamo afole aiteno'ae'mo alu nofi vaya'aitegamo afole ai'niye. 17 Goti'a mani geleti'mo agai'a fatago kava'amo ago alino apave liteno apakesa afi'a fatago nehaya kavateti'mo apakesa afi'a fatago nehaya vaya'mo alino ne'apamiye. Ani kavatefe'mo Goti mukufi'mo avo'mo kae male'naya gemo'a huno'ae'mo, apakesa afi'a fatago nehaya kavateti'mo fatago vaya'amo mai'nayanage'a alagepa hu'a maigae, huno hapa pai'niye.

Muki vaya'mogimo Goti'mo apakame'ya ami'naya gemae

18 Koku'napati'mo Goti'a aipamo leno ne'apateya kava'amo alino apave neliye. Goti'a agaefe'mo muki mono nosaya kava'e muki vaya'aitegamo muki hosu kava'mo nehaya kavate'efe'mo aipamo leno ne'apate. Apakaemo hosu kava'apileti'mo lama ge'amo apaipafi'mo hane'niya lama ge'ale'mo ali'ya'mo o'alisiyafe'mo ae'a akani'a ne'atae. 19 Goti'a na agufa vekamo mai'nofi huno apaipafi'mo ago alino apave li'nigeno ha le yategamo afole ai'niya'mofe'mae. 20 Goti'a ma mopamo alo hu'niya afinateti'mo muki vaya'mogi alo hu'niya ya'amo ago ageme ageme e'nae. Ageme ageme ne'e'apae'mo apaulagaleti'mo no'agaya ya'mo Goti'a hanege hanege huno hanesiya himamu'amo agete'apae'mo, aeto agufa vekamo hogote vekamo alagi ago aeno lagase'niya vekamo mai'niye, hu'a ne'agae. Ne'agaya'mofe'mo hosu kava'apimo ae'a ati kaesayafe'mo, alagi o'age'none, hu'a afa'a osugae. 21 Muki vaya'mogimo Goti'mo ago age'naya'mofe'mo ala agi'amo Goti'mo amisaya agufa agi'amo o'amige agaefe'mo hao ke osege hu'a mai'nae. Afa apakesage'mo ne'afigeno apaipafi'mo hani hu'niya kava'mo afole ai'nige'apae'mo negi nagi kava'mo hu'a mai'nae. 22 Apakaemo, afi'nona vaya'mo mai'none, hu'a nehu'apae'mo negi vaya'mo hamale'nae. 23 Apakaemo maige maige huno ne'maiya ha le konali Gotifeke'mo mono osu'a apakame'ya amite'a agae aimu'yale'mo kasalisiya vayakana agufa aunegi namagana agufa aunegi afugana agufa aunegi nagalo'yavegana agufa aunegi hu'a alo hu'a malete'a ani yatefeke'mo mono hu'nae. 24 Hu'naya'mofe'mo Goti'a hosu kava'mo hisayafe'mo mago'e huno apatafauno o'maino afa'a apakeno apatale'nige'apae'mo hapau'niya kava'mo hu'a kumai kava'mo hu'nae. Apavagage hisiya agufa kavake'mo nehu'a apakai'api apakufamo ali'a hosu hu'a atege vaya'ai apakufamo ali'a hosu hu'a apatege hu'a mai'nae. 25 Apakaemo lama ge'amo atalete'a lama ge Gotife'mo mono osu'a atale'a agae aimu'yale'mo aigofe goti'apimogifeke'mo mono hu'nae. Goti'a muki ya'amo alo hu'niya vekae'mo mono osuge ge'amo o'afige hute'a apakai'apimo alo hu'naya yatefeke'mo mono hute'apae'mo akame hu'nae. Hu'naya'monanafa alo hu'niya vekamo agi'ale'mo muki afina'mo ali'a asaga hume hume u'a maiyo. He, lama ge. 26 Ani hosu kava'mo hu'naya'mofe'mo Goti'a mago'e huno apatafauno o'maino afa apakeno apatale'nige'apae'mo alagi hosu hapa'ye kava'mo hu'nae. A'ne'apimogimo vele ne'maiya kava'mo atale'a ani kava aimu'yale'mo a'ne apafalugi'e'mo aeto agufa hosu kava'mo hu'nae. 27 Ani kava hu'a vemogi'e'mo a'nemo o'ali'a ve apafalugige'mo alisayafe'mo lokiya apaipamo kali'nageno apaipafati'mo atete hapau'niye. Vemogimo vemo alite'apae'mo apavagage hisiya agufa kava'mo hute'a Goti'mo atale'a hosu kava'mo anona'apilefe'mo ani hosu miya'mo ali'nae. 28 Apakaemo Gotife'mo lama ge hu'a apakesa afisayafe'mo ohapau'niya'mofe'mo Goti'a mago'e huno apatafauno o'maino afa'a apakeno apatale'nige'a hosu apaipa apakesake'mo alino he tino apate'nige'a osisaya agufa kava'mo nehae. 29 Muki alu hosu kava alu hosu kavanagi kumai kavanagi alagepa osu kavanagi ma mopafi yafe'mo hapa'ye nehiya kavanagi apaini hu'a ne'apataya kava'mo'agi huno apaipafi'mo havaite'niye. Apaipa kafa nehapaya kavanagi vaya'mo kamiti ne'apamagiya kavanagi kaveta nehaya kavanagi aigofe gemo nehaya kavanagi hosu apaipa nekaliya kavanagi huno apaipafi'mo havai teno hane'niye. 30 Apakaemo hosu faigoko gemo huge vaya'ai apaki'apile'mo ali'a afepi apatege Gotife'mo alagi ohapauge hanageke ya'mo ali'a apamite'a ali'a apaiyafi'mo apatege ala vaya'mo mai'none, hu'a huge apakai'api apaki'apile'mo ali'a asaga hu'a atege apakesa afifi hu'a saufa hosu kava'mo huge ita'api afo'apimogi ge'apimo o'afige hu'a ne'maiye. 31 Apakaemo negi kava'mo huge hugune, hu'a nehaya gemo osu'a atalege afamo anaga'apie'mo hapau apayamopafi'mo ohapauge apaipamo'mo falu hu'a o'apatege hapau hu'a o'apatege hu'a ne'maiye. 32 Goti'a ani agufa kava'mo nehaya vaya'aife'mo, anona'apilefe'mo apamisuge'a alagi falisaya vaya'mo mai'nae, huno ago hu male'niye. Apakaemo ani gemo ago afi'naya'monanafa ani agufa hosu kava'age'mo nosaya'monanafa mago'e hosu kava'mo nehu'apae'mo hosu kava'mo nehaya vaya'aife'mo amuse hu'a ne'apatae.

Copyright information for `KYG