Romans 10

Konaga'nimogitapae, nagaemo Goti'a Isaleli vaya'nimo apakufamo alino katino apatesiyafe'mo naipafati'mo nahau'nige'na nunumu hu'na ne'apatove. Nagaemo ago apake'novana apakaemo Gotitefe'mo apayamukiki nehae, hu'na apake'nove. Apayamukiki nehaya'monanafa Goti ge'amo alagepa hu'a no'afiye. Apakaemo, Goti'a fatago kava'amo fiku alino ne'apamiye, hu'a apakesa o'afi'a apakai'api fatago kava'apige'mo ali'a afole ai'a atesayafeke'mo ali'ya'mo ne'aliye. Goti'a agai'a fatago kava'amo alisayafe'mo mago ka'mo ago valino apate'niya'monanafa ohapau'nige'a Goti aiyafi'mo o'mai'nae. Kalaisi'a apakesa afi'a fatago nehaya vaya'mogi fatago kava'mo alisayafe'mo Goti ke'aepa ge'amo ago akame huno hano hu'niye. Mosese'a ke'aepa gemo akame nehaya kavateti'mo Goti aulagale'mo fatago vaya'mo maisaya kavafe'mo avo kaeno'ae'mo,muki ke'aepa ge'amo akame nehisaya vaya'mogimo akame nehaya kavateti'mo afa'a maisaya ya'mo aligae, huno avo kae male'niye. Kae male'niya'monanafa vaya'mogi apakesa afi'a fatago nehaya kavateti'mo fatago kava'amo alisaya kavatefe'mo ava gemo huno'ae'mo,ina la'mo haino Kalaisi'mo avalelino eminesiyafe'mo koku'napi'mo haigiye, hutapa lapakesa o'afiyo. Ago emine'niya'mofe'mo ani agufa kava'mo hisaya ali'yatapimo ohane'niye. Ina la'mo Kalaisi'a fali'niyateti'mo avalelino haisiyafe'mo ma mopamo afe'alumelaga lamigiye, hutapa osiyo. Ago he tino hai'niya'mofe'mae. Ani kava hiyo, huno nosifa na agufa kavake'mo hiyo, huno nehiye. Ani gelefe'mo, Goti ge'amo lapaopale'mo hane'neno lapavayafi'e lapaipafi'e'mo hane'niye, huno hapa pai'niye. Lagaemo ani gelefe'mo apakesa afi'a fatago hisayafe'mo aeta hakalo huta hapa nepaune. Lagaemo, Goti'a Yesu'mo fali'niyateti'mo ago alino he tino ate'niye, hutapa lapakesa afita fatago hutetapae'mo, Yesu'a Ala kava netimo mai'niye, hutapa lapavayafati'mo aeta hakalo nehisayana Goti'a lapakufamo alino katino lapategaiye, huta lapa nepaune. 10 Ani kavatefe'mo laipafi'mo lagesa afita fatago nehunageno'ae'mo Goti'a, naulagale'mo fatago vaya'mo mai'nae, huno nehiye. Ani kava huno Goti'a lagufamo alino katino latesiyafe'mo lavayafati'mo aeta hakalo nehune. 11 Ani kavatefe'mo Goti mukufi'mo avo kae male'niya gemo'a,Ina lagimo agaefe'mo apakesa afi'a fatago nehisafige'a apavagage osuge hapai o'vaige hu'a maigae, huno avo'mo kae male'niye. 12 Na kava hane'niya'mofe'mae. Yu nofi vaya'e alu nofi vaya'mogi'e'mo hailami salami hu'a o'mai'nae. Magoke'age Ala kava ne'mo'a muki vaya'aite'mo yagaino ne'apateya vekamo mai'nige'apae'mo muki vaya'mogimo agaefe'mo keya ae'a ge nehaya vaya'aitefe'mo alopa kagemi ya'e vekagana huno mai'neno fiku hapa maeno ne'apamiye. 13 Ani kavatefe'mo Goti mukufi'mo mago'e gemo huno'ae'mo,Ina lagimo Ala kava ne'mo agi'alefe'mo keya ne'aesafigeno afa'a apakufamo alino katino apategaiye, huno hapa pai'niye.

14 Ani gemo hu'niya'monanafa agaefe'mo apakesa afi'a fatago nosisaya vaya'mogimo haiya kava hu'a agaefe'mo keya ae'a ge hugae. Agaefe'mo ava gemo o'afi'nisayana haiya kava hu'a agaefe'mo apakesa afi'a fatago hugae. Mago vaya'mogi agaefe'mo ava gemo ae'a hakalo hu'a hapa nopaisayana haiya kava hu'a afigae. 15 Mago vekamo'a alino apatesige'a o'usayana haiya kava hu'a u'a ae'a hakalo hu'a hapa paigae. Ani kavatefe'mo avo'mo kae male'niya gemo'a huno'ae'mo,alagepa faigoko ge'aleti'mo alino nanu aeno ne'apateya gemo alini'e'a ae'a hakalo hu'a hapa nepaiya vaya'ai apaiyamo kanale apaiyamo hane'nige'a alini'a ne'ae. Apakaemo alagepa kavafe'mo ava gemo afite'a apamogaga aisayafe'mo ani gemo alini'a ne'ae. 16 Ne'aya'monanafa muki vaya'mogimo alagepa faigoko ge'amo alagepa hu'a akame nosae. Aiyeya'a aise vaya'mogi akame nehaya kavafe'mo,Ala kava nene, huno, ina lagimo ketie'mo apakesa afi'a fatago hu'nae, huno ha pai'niye. 17 Huno ha pai'niya'monanafa mago vaya'mogi Goti ge'amo ae'a hakalo hu'a hapa nepaige'apae'mo ne'afiye. Ne'afigeno'aeke'mo apakesa afi'a fatago nehaya kava'mo anile afole ne'aiye. 18 Afole ne'aiya'monanafa Goti ge'amo o'afi'nafiye, hu'na loka hu'na lapafi nekove. Ha'ao, ago afi'nae. Avo'mo kae male'niya gemo'a huno'ae'mo,

Apake ne'aiya apakemo'mo ma mopafi muki haopalegamo aino atagu faeno uneno hu'niye. Ge'apimo'a muki ma mopa atupalegamo aino atagu faeno uneno hu'niye,
huno hu'niye.
19 Hu'niya'monanafa Isaleli vaya'mogimo Goti gemo o'afi'nafiye. Hogoteno Mosese'a huno'ae'mo,

Nagaemo magoke nofi vaya'mo o'mai'nisaya vayapati'mo alu nofi vaya alu nofi vaya'mo apavalesugetapae'mo lapaipa kafamo hapaegae. Mono gemo o'afi'a negi nagi hu'a ne'maiya vayapati'mo apavalesugetapae'mo lapaipamo legaiye,
huno hu'niye.
20 Henaga'amo Aiyeya'a koli osuno huno haleno hapa paino'ae'mo,

Nagaefe'mo kahauya nosaya vaya'mogimo nage'nae. Ge hu'a nafi oke'naya vaya'mo naipa nagesa ali'na apave li'nove,
huno hu'niye.
21 Hu'niya'monanafa Goti'a Isaleli vaya'aife'mo,

Nagae gemo o'afi'a himu'namu kava'mo nehaya vaya'aitegamo yatala afina'mo he ti'na mai'ne'nae'mo eyo, hu'na hute'na nahakumo ali'na atale'na mai'nove,
huno hapa pai'niye.

Copyright information for `KYG