Romans 13

Gamani vaya'ai apaiyafi'mo maiyo, huno hu'niya gemae

Muki vaya'mogitapamo gamani vaya'ai ge'apimo afiyo. Gamani vaya'mogi yagai'a lapatesaya himamu'apimo Gotitegatike'mo ne'aliye. Goti'a yagai'a apatesayafe'mo lekana paino ne'apate. Ne'apateya'mofe'mo gamani vaya'ai ge'apimo amagi'a ne'atalaya vaya'mogi Goti ge'a'e'mo ago amagi'a ne'atalayanage'a kayo'mo aligae. Gamani vaya'mogimo alagepa kava'age'mo hu'a ne'maiya vaya'mogimo koli hisayafe'mo yagai'a no'apatafa hosu kava'mo nehaya vaya'mogimo koli hisayafe'mo yagai'a ne'apatae. Gamani vaya'aife'mo koli osisayafe'mo lapau'nifiye. Lapau'nisiya'mo'mo alagepa kava'mo hige'apao alagepa kava'mo nehae, hu'a hiyo. Apakaemo alagepa hutapa maisayafe'mo Goti'a alino apami'niya ali'ya'mo ne'aliye. Apakaemo afa'a yagai'a no'apataya'monanafa kayo'mo apamisagetapa apaketetapae'mo lapakaemo hosu kava'mo nehisayana lapamo'ya aigae. Goti'a apakaemo hosu kava'mo nehaya vaya'mo kayo'mo apamisayafe'mo lekana paino apate'niye. Ani kava nehaya'mofe'mo gamani vaya'ai ge'apimo afiyo. Lapakaemo kayo'mo lamigae, hutapa nehaya geeke'mo lapakesa o'afitapa yu'ilaga vekatapimo'a huno'ae'mo, ge'apimo afiyo, huno nehiya ge'ae'mo lapakesa afitetapa ge'apimo afiyo. Gamani vaya'mogi Goti ali'ya'amo ne'ali'a takesi monimo ne'aliya'mofe'mo takesi monimo afa'a apamiyo. Muki vaya'mo afa'a ataletapa apamisaya ya'mo apamiyo. Anonatapilefe'mo takesi monimo lapakitapile'mo apamige alu takesi monimo apamige hutapa apamiyo. Apaiyafi'mo mai'nisaya vaya'ai apaiyafi'mo maiyo. Apaki'apile'mo ali'a asaga hisaya vaya'ai apaki'apile'mo alitapa asaga hiyo.

Muki vaya'aitegamo hisuna kavafe'mo hu'niya gemae

Anonatapimo afa'a ohaneno. Magoke anonatapimo afa'a hane'nisiyana anonatapilefe'mo muki konagatapimogife'mo lapau lapayamopafi'mo lapaino. Vaya'aife'mo hapau apayamopafi'mo nehapaiya vaya'mogimo muki ke'aepa ge'amo akame hu'a hano hu'naya kava'mo nehae. Ke'aepa gemo'a huno'ae'mo,

kumai kava'mo osiyo, huno huge vaya'mo ohapaeyo, huno huge kumaya o'aliyo, huno huge lapa'ye osino, huno huge huno hu'niye.
Ani gegi mago'e ke'aepa gemogi huno hane'nisiya'mo'mo aepa'amo hane'niyana

lapakaitapie'mo lapau lapayamopafi'mo nelapaiya kava hutapa lapaopale'mo mai'naya vaya'aife'mo lapau lapayamopafi'mo lapaino.
10 Hapau apayamopafi'mo nehapaiya vaya'mogimo hapaopale'mo ne'maiya vaya'aitegamo hosu kava'mo nosaya'mofe'mo muki ke'aepa ge'amo akame hu'a hano nehae, huno hu'niya'mofe'mae.

11 Afole ai'niya afina'mo ago age'naya'mofe'mo mani kava'mo hiyo. Lagesa afita fatago hu'nona afinateti'mo mago afina'mo utesigeno Goti'a lagufamo alino katino latesiya afina'mo ago hogo nehiya'mofe'mo lapaupati'mo he titapa yagaitapa maisaya afina'mo afole ai'niye. 12 Hani nehiya kava'mo hano hugefe'mo ago eno hogo nehigeno'ae'mo ha le ya'mo afole aisiyafe'mo nehiyanagi hanipi'mo nehaya kavatapimo ataletetapa kame hisuna kukenatimo ha le yategamo ali'a ne'vaiya agufa kukenatimo alita vaigetao. 13 Ha le yategamo ne'maiya vaya'mogimo nehaya agufa fatago kava'mo higetao. Lusi ne'ya'mo ne'netapa alita anupa hutapa mai'netapae'mo hosu kava'mo osuge ani'mo ne'netapa negi nagi gemo osuge kumai kava osuge alu kava alu kavateti'mo muki kumai kava'mo osuge ge o'vaige lapaipa kafa ohapaege hutapa maiyo. 14 Lapakaemo lapakufamo'mo hau'niya kava'mo hisayafe'mo alo osutapa Ala kava netapimo Yesu Kalaisike'mo kukenagana hutapa alita vaiyo.

Copyright information for `KYG