Romans 2

Goti'a agoti huno apatesiya kavafe'mo ava gemo hu'niya gemae

Ve'nimogae, kagaemo vaya'ai hosu kava'apimo agetekae'mo alika fako huka apatetekae'mo, hosu kava'mo nehae, huka nehukae'mo kagaika'efeke'mo ani gemo nehane. Magoke agufa hosu kava'mo nehana'mofe'mae. Kagaemo hosu kava'mo nehae, huka nehana vekamogamo magoke agufa hosu kava'mo nehana'mofe'mo ina lagamo mai'napigeka agotile'mo he tika mai'nekae'mo, nagaemo hosu kava'mo hu'nofi, hu'na o'age'nove, huka aeka ati okaegane. Goti'a hu'naya kava'apilefeke'mo ani kava'mo nehaya vaya'mo alagi lama ge huno agoti huno apategaiye, huta ago afi'none. Ve'nimogae, ani agufa kava'mo nehukae'mo ani kava'mo nehaya vaya'mo alika fako huka apatetekae'mo, ae'na kasalo paegauve, huka kagesa ne'afipiye. Goti'a kagemi ya'agana huno male'niya yapati'mo kagaetegamo lusi alagepa kava'mo huteno malage huno aipamo leno okateno yatala afina'mo afa'a nekateya'monanafa alagepa huka kagesa o'afi'neka afa kavane, huka kagesa ne'afipiye. Goti'a kaipamo alika afe lesanafe'mo kagaetegamo alagepa kava'mo nehiye, huka o'afi'napiye. Kaipamo alika afe ole'nana'monanafa kaipamo'mo lokiya vai'nigeka afa'a mai'nekae'mo Goti'a aipamo leno nekateya kayo'mo alo huka maleme maleme ne'anageno'ae'mo ko nesiye. Goti'a vaya'ai apaulagale'mo aipamo leno ne'apateyanageno alino alagepa huno agoti huno apatesiya afina'mo mani kayo'mo kamigiye. Goti'a muki vaya'mogimo hu'naya kava'mo anona'apilefe'mo miya'apimo apamigiye. Goti'a ha le konali ya'apigi ala apaki'apigi maige maige hu'a maisaya ya'apigi alisayafe'mo hapa'ye nehige'a alagepa kava'mo o'atale'a atafau'a alagi hume hume ne'visaya vaya'mo alagepa hu'a maige maige hu'a maisaya ya'apimo alino apamigiye. Alino apamigiya'monanafa Gotife'mo kame hu'a atete'a lama ge'amo akame osu'a hosu kava'mo akame nehaya vaya'aife'mo aipamo leno ne'apateya kayo'mo apamisige'a lusi kana ya'mo alisageno apakafu kigiye. Ani agufa kava'mo muki hosu kava'mo nehisaya vaya'aitegamo afole aigiye. Hogoteno Yu vaya'aitegamo afole aiteno Yu nofi vayapati'mo o'mai'naya vaya'aitegamo afole aigiye. 10 Afole aigiya'monanafa muki vaya'mo alagepa kava'mo nehisaya vaya'mogimo ha le konali ya'apimo alige ala apaki'apimo alige hisageno apaipamo'mo falu hugiye. Hogote'a Yu vaya'mogimo alitesage'apae'mo Yu nofi vayapati'mo o'mai'naya vaya'mogimo aligae. 11 Na kava hinage'apaene. Goti'a amega apakufale kavatefe'mo agesa o'afino muki vaya'mo magoke agufa kavateti'mo alino fako huno ne'apate. 12 Ke'aepa ge'amo o'ali'nisaya vaya'mogi hosu kava'mo nehisageno'ae'mo Goti'a agoti huno apateteno apamagisige'a faligaya'monanafa ke'aepa ge'aleti'mo alino agoti huno o'apategaiye. Ke'aepa ge'amo ali'naya vaya'mogimo hosu kava'mo nehisageno'ae'mo mago'e huno ke'aepa ge'aleti'mo alino agoti huno apategaiye. 13 Goti'a ke'aepa ge'amo fiku afi'naya vaya'aife'mo, naulagale'mo fatago vaya'mo mai'nae, huno nosifa ke'aepa ge'amo afite'a akame nehaya vaya'aifeke'mo, naulagale'mo fatago vaya'mo mai'nae, huno nehiye. 14 Yu nofi vayapati'mo o'mai'naya vaya'mogimo ke'aepa ge'amo o'ali'naya'monanafa ke'aepa ge'amo akame nehagetae'mo, Goti ke'aepa ge'amo apaipafi'mo hane'niye, huta ne'apakone. 15 Apakaemo laipafi'mo avo'mo kae male'niya ke'aepa ge'amo hane'niye, hu'a ali'a apave neliye. Yu'ilaga veka'apimo'a, ma kava hiyo ina kava osiyo, huno hapa nepaiye. Apakaemo apakesa afite'apae'mo hosu kava'mo nehune, hu'a huge alagepa kava'mo nehune, hu'a huge hu'a nehae. 16 Goti'a agoti huno apatesiya afina'mo alagepa faigoko ge'nilefe'mo Yesu Kalaisiteti'mo hu'a fala ki'a ne'atalaya kava'mo alino fako huno apategaiye.

Yu vaya'mogi, mono kavatimo'a laha maegaiye, hu'a hu'naya gemae

17 Kagaemo, Yu vekamo mai'novanageno ke'aepa gemo'a naha maegaiye, huka hutekae'mo, Goti vaya'amo mai'nove, huka nehane. 18 Goti ke'aepa ge'amo ali'a kaya male'nagekae'mo Goti'a hau'niya kava'mo ageteka hogote alagepa kavafe'mo, kanale kavane, huka nehane. 19 Kagaemo hukae'mo, ke'aepa ge'amo ago afi'nove. Afite'na nagaemo lama gemo aepa'amo ago age'nove, huka nehane. Lole kagesa o'afi'neka lokiya vaika kagesa afikae'mo, apaulagamo ali hu'nige'a alagepa ka'mo o'age'a hani yapi'mo ne'maiya vaya'mo ha le ya'mo ali'na ne'apamuve. O'afi'naya vaya'mo ali'na api ai'na apatete'na mafa'negana hu'a apakesa ohane'niya vaya'mo ali'na apaya ne'malove, huka kagesa ne'afine. 21 He, alika apaya ne'malana'monanafa kagaikamo alika kaya no'malapiye. Kumaya'mo o'aliyo, huka aeka hakalo huka hapa nepaina'monanafa kumaya'mo ne'alipiye. 22 Kumai kava'mo osiyo, huka nehana'monanafa kumai kava'mo nehapiye. Kagaemo aigofe goti'apimogife'mo alagi okahau'niya'monanafa Gotife'mo kagesa afika koli nosapiye. 23 Kagaemo, ke'aepa gemo afi'nove, huka kagikale'mo alika asaga huka nekatana'monanafa ke'aepa ge'amo ago amagika ataleteka Goti agi'ale'mo alika afepi ne'atane. 24 Goti mukufi'mo avo'mo kae male'niya gemo'a huno'ae'mo, lapakaemo hosu kava'mo nehaya'mofe'mo Yu nofi vayapati'mo o'mai'naya vaya'mogi Gotife'mo hu'a faipa hu'a ne'atae, huno hu'niye.

Apakufamo lagau'a ne'apataya kavafe'mo ava gemo hu'niya gemae

25 Kagaemo ke'aepa ge'amo akame nehisana'mo'mo kagufamo lagau'a kate'naya kava'mo'a afa'a kaha maegaiye. Ke'aepa ge'amo amagika ne'atalesana'mo'mo kagufamo lagau'a kate'naya kava'mo ina agufa kava'mo hane'niye. 26 Mago vekamo agufamo lagau'a o'ate'nisaya vekamo'a ke'aepa ge'amo akame nehisiyana Goti aulagale'mo apakufamo lagau'a apate'naya vayakana huno maigiye. 27 Apakufamo lagau'a o'apate'nage'a afa'a mai'naya vaya'mogimo ke'aepa ge'amo akame nehisayana agoti hu'a kategae. Ke'aepa ge'amo ago ali'nanage'apae'mo kagufamo lagau'a kate'naya vekamogamo ani ke'aepa ge'amo ago amagika ne'atalana'mofe'mo, hosu kava'mo hu'nane, hu'a agoti hu'a kategae. 28 Lama ge Yu vekamo'a amega agufale Yu vekamo o'mai'nifa aipafi Yu vekamo mai'niye. Lama ge apakufamo lagau'a ne'apataya kava'mo amega apakufale kava'mo ohane'nifa apaipafi kava'mo hane'niye. Ke'aepa gemo'a mani agufa ali'ya'mo afa'a o'aligiya'monanafa Goti Auneme'amo'mo apaipafi'mo mani agufa ali'ya'mo afa'a ne'aliye. Ma mopafi vaya'mogimo lama ge Yu vekamo agi'ale'mo ali'a asaga hu'a no'ataya'monanafa Goti'a agi'ale'mo alino asaga huno ne'ate.

Copyright information for `KYG