Romans 3

Mani gemo nehuva'mofe'mo Yu vaya'mogimo alu nofi vaya'mo ae'a apakasesayafe'mo hapa maesiya ya'mo o'ali'nafiye. Apakufamo lagau'a ne'apataya kava'mo'a haiya kava huno hapa maegaiye. Muki kavatefe'mo hapa maesiya ya'mo ago ali'nae. Hogote ya'mo hapa maesiya ya'mo hane'niyana Goti'a ge'ale'mo yagai'a atesayafe'mo ge'amo ago alino apami'niye. Apami'niya'monanafa mago Yu vaya'amogimo apakesa afi'a fatago osu'naya'mofe'mo Goti'a Emalehamufe'mo, kaginago vaya'mo hapa maegauve, huno ha pai'niya gemo afa gemo hane'niyanageno Goti'a agai'a ge'amo afa'a akame osisifiye. Alagi atalegeno hano hino. Muki vaya'mogimo aigofe gemo nehisageno'ae'mo Goti'a agai'a ge'amo alagi o'ataleno akame hugiye. Ani kavatefe'mo Goti mukufi gemo'a huno'ae'mo, kagaemo gemo hisanage'a afite'apae'mo, alagi lama gemo nehiye, hu'a hugae. Vaya'mogimo agoti hu'a nekatesagekae'mo aeka apakasegane, huno avo kae male'niye. Lagaemo Yu vaya'mogita hosu kava'mo hu'nisunana Goti fatago kava'amo vaya'ai apaulagale'mo mago'e huno afole ai'nisiyana na agufa gemo hugune. Goti'a anonatilefe'mo kayo'mo nelamisigetae'mo, hosu kava'mo nehiye, huta ma mopafi vayakana huta ge hisupiye. Alagi atalegeno hano hino. Mani gemo lama gemo hane'niyesinana Goti'a ma mopafi vaya'mo afa'a agoti huno o'apatesine. Mago Yu vaya'mogi, hosu kava'mo hu'nisunageno'ae'mo Goti fatago kava'amo vaya'ai apaulagale'mo mago'e huno afole ai'nisiyana na kava hisigeno agoti huno lategaiye. Vae, hu'na, alagepa hu'a apakesa afi'naesinana alagepa kava'mo afole aisiyafe'mo hosu kava'mo higetao, huta afa'a nehunesine. Ani gemo afa'a osuguna'monanafa mago vaya'mogi lagaefe'mo, ani gemo nehae, hu'a faipa hu'a nelatae. Goti'a mani vaya'aife'mo, hosu vayane, huno huteno agoti huno apategaiye. He, alagi lama gemo hugiye.

Muki ma mopafi vaya'aife'mo hosu vayane, huno hu'niya gemae

Inagi lagaemo Yu vaya'mogita aeta apakaseta alagepa vaya'mo mai'nopiye. Ha'ao, hosu kava'mo'a Yu vaya'mogita'e Yu nofi vayapati'mo o'mai'naya vaya'e'mo aeno lagaseno yagaino late'niye, hu'na ali'na lapave li'nove. 10 Ani kavatefe'mo Goti mukufi'mo avo kae male'naya gemo'a huno'ae'mo,

Mago fatago vaya'mo o'mai'nae. Magoke'atomo alagi o'mai'niye.
11 Mago afi'naya vaya'mo o'mai'nae. Goti'mo agegefe'mo kahauya nehaya vaya'mo o'mai'nae. 12 Muki vaya'mogimo ani ka'mo ago atale'nae. Muki'amo hosu vaya'mo hamale'nae. Alagepa kava'mo nehaya vaya'mo mago o'mai'nae. Magoke'atomo alagi o'mai'niye. 13 Lugo'apimo kano kelimo ali'a halo ne'aigeno atu ne'aiya kano keligana huno hane'nigeno hosu gemo afole ne'aiye. Apavenafu'naleti'mo aigofe gemo nehae. Nagalo'yave'mogi apavayafi'mo analisa ani'mo havai te'niya kava huno hosu gemo apavayafi'mo havai te'nige'a ge'apileti'mo vaya'mo nehapae. 14 Apakaemo hu'a faipa hu'a ne'apataya ge'e hapai vai'a ne'apataya kava'e'mo apaipafi'mo havai te'niye. 15 Apakaemo apaiyaleti'mo nagu nagu hu'a u'a vaya'mo nehapae. 16 U e'a nehayategamo muki ya'mo ali'a hosu hu'a atege apakafu kisiya ya'mo ali'a apamige nehae. 17 Alagepa hu'a magokepi lokae'a maisaya ka'mo no'agae. 18 Gotife'mo koli hisaya agufa apakesa no'afiye,
hu'a avo kae male'nae.
19 Ago afi'nonana Goti'a ke'aepa ge'aleti'mo ke'aepa ge'amo afe'alumelagamo mai'naya vaya'aife'mo hapa nepaiye. Apakaemo ge'ale'mo ae'a atagaina hu'a ge osu'a ani gemo ha pai'apae'mo, Goti aulagale'mo hosu kava'mo hu'nonanageno kayo'mo lamigiye, hu'a hisayafe'mo hapa nepaiye. 20 Hapa nepaiya'mofe'mo Goti'a muki vaya'mogimo ke'aepa ge'amo akame nehisaya kavateti'mo, naulagale'mo fatago vaya'mo mai'nae, huno osugiya'monanafa ke'aepa ge'aleti'mo vaya'ai hosu kava'apimo alino apave neliye.

Fatago kava'mo Gotitegati'mo ne'e, huno hu'niya gemae

21 Ani kava hu'a mai'naya'monanafa hemenimo Goti'a fatago kava'amo agaetegati'mo alino apave neliye. Ke'aepa ge'amo akame nehaya kavateti'mo alino no'apamifa fiku hapa maeno ne'apamiye. Mosese'e Gotitegati gemo alini e'a ae'a hakalo hu'a hapa nepaiya vaya'mogi'e'mo avo kae male'naya geleti'mo ani kavafe'mo ava gemo ae'a hakalo hu'a hapa nepaiye. 22 Goti'a mani fatago kava'amo alino Yesu Kalaisife'mo apakesa afi'a fatago nehaya kavateti'mo muki apakesa afi'a fatago nehaya vaya'mo ne'apamigeno apakaete'mo hane'niye. Hailami salami hu'a no'maifa magoke aiyaya vaya'mo ne'maiya'mofe'mae. 23 Na kava hu'nageno'aene. Muki vaya'mogimo hosu kava'mo hute'a Goti ha le konali ya'amo hai'a me tale'naya'mofe'mo no'aliye. 24 No'aliya'monanafa Goti'a Kalaisi Yesu'mo miya faino hatu maeno late'niya kavateti'mo, naulagale'mo fatago vaya'mo mai'nae, huno laha pai'niye. Goti'a muki kavatilefe'mo agesa o'afino fiku laha maeno lami'niye. 25 Agaemo mafa'ne'amo kola'ae'mo lagesa afita fatago hisuna kavateti'mo aipamo leno olateno aipamo falu huno latesiyafe'mo mafa'ne'amo muki vaya'ai apaulagale'mo ago alino afole aino ate'niye. Akeya'vilagamo Goti vaya'amogi hosu kava'mo hu'nageno'ae'mo kayo'mo o'apamino afa'a apakeno apatale'niye. Hu'niya kava'alefe'mo fatago kava'mo hu'nove, huno alino lave lisiyafe'mo mafa'ne'amo muki vaya'ai apaulagale'mo ago alino afole aino ate'niye. 26 He, hemenimo Goti'a fatago kava'amo ago alino lave nelino'ae'mo Yesufe'mo lagesa afita fatago nehuna vaya'mogitae'mo, naulagale'mo fatago vaya'mo mai'nae, huno nehuno'ae'mo, fatago vekamo mai'nove, huno alino lave lisiyafe'mo Yesu'a afole yate'mo ago alino afole aino ate'niye.

27 Hu'niya'mofe'mo lagitile'mo afa'a alita asaga huta atesuna kava'mo hane'nifiye. Ha'ao, ani kava'mo ago alino hafaino atale'niye. Haiya agufa kavateti'mo alino hafaino atale'niye. Ke'aepa ge'aleti'mo alino hafaino atale'nifiye. Ha'ao, lagesa afita fatago nehuna kavatetike'mo ago alino hafaino atale'niye. 28 Atale'niya'mofe'mo ina kava huta afi'nonana Goti'a ke'aepa ge'amo akame nehaya kavateti'mo naulagale'mo fatago vaya'mo mai'nae, huno nosifa apakesa afi'a fatago nehaya kavatetike'mo naulagale'mo fatago vaya'mo mai'nae, huno nehiye. 29 Yu vaya'mogitage'mo Gotitimo'mo mai'niye, huta hisupi Yu nofi vayapati'mo o'mai'naya vaya'mogi'e'mo, Gotitimo'mo mai'niye, hu'a hugae. He, Yu nofi vayapati'mo o'mai'naya vaya'mogi'e'mo Gotitimo'mo mai'niye, hu'a hugae. 30 Goti'a magoke'age'mo mai'niyanageno Yu vaya'mogi apakesa afi'a fatago nehaya kavateti'mo naulagale'mo fatago vaya'mo mai'nae, huno huge Yu nofi vayapati'mo o'mai'naya vaya'mogi'e'mo apakesa afi'a fatago nehaya kavateti'mo naulagale'mo fatago vaya'mo mai'nae, huno huge nehiye. 31 Inagi lagaemo apakesa afi'a fatago hisaya kavafe'mo ava gemo nehutae'mo ke'aepa ge'amo aeta ati nekaopiye. Alagi atalegeno hano hino. Lagaemo ke'aepa ge'amo ha maeta alita he tita ne'atone.

Copyright information for `KYG