Romans 4

Goti'a Emalehamufe'mo, naulagale'mo fatago vekamo mai'nane, huno hu'niya gemae

Mani kavatefe'mo laginago vekamo Emalehamu'a agai'a agufaleti'mo ali'niye, huta hisupiye. Ha'ao. Goti'a Emalehamu'mo alagepa kava hu'niya kava'aleti'mo, naulagale'mo fatago vekamo mai'nane, huno hu'niyesinana Emalehamu'a agai'a agi'ale'mo afa'a alino asaga huno ate'niyesine. Ate'niyesina'monanafa Emalehamu'a Goti aulagale'mo agi'ale'mo afa'a alino asaga huno o'ategaiye. Goti mukufi'mo avo kae male'niya gemo'a na kava hu'niye, huno hu'niye. Ani gemo'a, Emalehamu'a Goti ge'ae'mo agesa afino fatago hu'nigeno Goti'a fatago kava'amo alino ami'niye, huno hu'niye. Inagi vaya'mogimo ali'ya'mo alite'apae'mo miya'apimo ne'aliya yafe'mo, fiku ne'aliye, huta nosupa ali'ya'mo ali'naya anona'apilefe'mo miya'apimo ne'aliye, huta nehune. Huta nehuna'monanafa ali'ya'mo o'ali'a Gotifeke'mo apakesa afi'a fatago nehaya vaya'aife'mo, naulagale'mo fatago vaya'mo mai'nae, huno nehiye. Agaemo mono nosaya vaya'aife'mo, naulagale'mo fatago vaya'mo mai'nae, huno nehiye. Apakaemo ani kava nehiya Gotifeke'mo apakesa afi'a fatago nehae. Nevini'e'mo ani kavafe'mo magoke agufa gemo hu'niye. Agaemo, apakaemo ke'aepa gemo akame nehaya agufa ali'ya'mo o'ali'naya'monanafa Goti'a fatago kava'amo alino apami'nisiya vaya'mogi Goti aulagale'mo alagepa hu'a mai'nayanage'a afa'a apamogaga aigae, huno hu'niye. Ani gee'mo huno'ae'mo,

Goti'a ke'aepa ge'amo amagi'a ne'atalaya hosu kava'apimo alino atalege hosu kava'apimo aeno ati kaeno apatege hu'nisiya vaya'mogi alagepa hu'a mai'nayanage'a afa'a apamogaga aigae.
Ala kava ne'mo'a hosu kava'mo anona'apilefe'mo o'apami'nisiya vaya'mogi alagepa hu'a mai'nayanage'a afa'a apamogaga aigae,
huno hu'niye.

Apakufamo lagau'a atale'naya vaya'age'mo hapa ne'maefi apakufamo lagau'a o'atale'naya vaya'e'mo hapa ne'mae. Ani kavatefe'mo, Emalehamu'a agesa afino fatago hu'nigeno'ae'mo Goti'a fatago kava'amo alino ami'niye, huta nehune. 10 Ani afina'mo Emalehamu'a haiya kava huno mai'niye. Agufamo lagauno atale'niya vekamo mai'nifi agufamo lagauno o'atale'niya vekamo mai'niye. Agaemo agufamo lagauno atale'niya vekamo o'mai'nifa agufamo lagauno o'atale'niya vekamo mai'niye. 11 Emalehamu'a agufamo lagauno o'atale'niya vekamo mai'neno'ae'mo agesa afino fatago huteno fatago kava'amo ali'niye. Fatago kava'amo ali'niya alagena kava'mo hane'niyana agufamo lagauno atale'niya alagena kava'mo ali'niye. Mani alagena kava'mo aune kava'mo hane'niyana, fatago vekamo mai'niye, huno alino apave neliya kava'mo hane'niye. Apakufamo lagau'a o'atale'naya vaya'ai aepa vekamo maisigeno Goti'a apakae'e'mo fatago kava'amo apamisayafe'mo ani kava huno mai'niye. 12 Agaemo apakufamo lagau'a atale'naya vaya'ai aepa vekamo mai'niye. Apakaemo apakufamo lagau'a atale'naya nofi vaya'age'mo o'mai'naya'monanafa Emalehamu'a agufamo lagauno o'atale'niya afina'mo agesa afino fatago hu'niya vekamo aiyakamo ne'aliya'mofe'mo aepa veka'apimo mai'niye.

13 Goti'a Emalehamufe'mo, muki ma mopamo kagae'e kaginago vayakamogi'e'mo lapamisugetapa alagi alagepa hutapa maigae, huno polomasi gemo ha pai'niye. Emalehamu'mofi aginago vaya'amogimofi hu'a ke'aepa ge'amo akame hu'nisaya kavateti'mo Goti'a lapamiguve, huno hu'niya ya'amo alisayafe'mo osu'nifa apakesa afi'a fatago hute'a fatago kava'amo ali'nisaya kavatetike'mo alisayafe'mo hu'niye. 14 Mafa'ne'apimogimo afo'apimogi male'naya ya'mo ne'aliya kava hu'a ke'aepa ge'amo akame nehaya vaya'mogimo ali'naesinana apakesa afi'a fatago nehaya kava'mo ina agufa kavanageno Goti'a fiku lapa mae'na lapamiguve, huno hu'niya polomasi ge'amo afa gemo hane'ninageno afole o'ai'niesine. 15 Na kava higeno'aene. Ke'aepa ge'amo ohane'niyesinana ke'aepa ge'amo amagi'a no'atalaesine. Hiya'monanafa ke'aepa ge'amo'a hane'niya'mofe'mo aipamo leno ne'apateya kayo'mo apamisiya agufa kava'mo alino afole aino ne'ate. 16 Ani kava hane'niya'mofe'mo muki aginago vaya'mogimo hai'a me otale'a alagi hai'a polomasi gemo hu male'niya ya'mo alisayafe'mo fiku hapa maeno ne'apamige'apae'mo apakesa afi'a fatago nehaya vaya'mogi aligae. Yu nofi aginago vaya'amogige'mo o'aligafa Emalehamu'a hu'niya kava hu'a apakesa afi'a fatago nehaya aginago vaya'mogi'e'mo alisayafe'mae. Agaemo muki'amogita aepa netimo mai'niye. 17 Ani kavatefe'mo Goti mukufi'mo avo kae male'niya gemo'a huno'ae'mo,Muki nofi vaya'ai apakinago aepa veka'apimo ali'na afole ai'na kate'nove, huno hu male'niye. Ani gemo huno hu male'niya afina'mo Goti aulagale'mo Emalehamu'a muki'amogita afotimo'mo afole ai'niye. Agaemo Gotife'mo agesa afino fatago hu'neno'ae'mo fali'naya vaya'mo alino he tino apatege ohane'niya yafe'mo, hane'niye, huno huge nehiya Gotife'mo agesa afino fatago hu'niye. 18 Emalehamu'a afole aisiya ka'mo o'age'niya'monanafa agesa afino fatago nehuno avayagunagu huno agava mai'niya'mofe'mo Goti'a, muki asole kaginago vaya'mo maigae, huno ha pai'niya gemo afole ai'nigeno muki nofi vaya'ai aepa veka'apimo afole ai'niye. 19 Emalehamu'a kafuga'amo vani hataleti hugefe haino hogo hu'niya kafugafi'mo mai'neno'ae'mo, kola'nimo'a ali'ya o'ali'nigeno a'nimo aipamo ago alino kalagu ki'nigeno la'agufamo faligekana huno hane'niye, huno hu'niya'monanafa ani kavafe'mo agesa afifi huno mai'neno'ae'mo aise'amo agesa afino fatago osu'niya'monanafa lokiya vaino mago'e huno agesa afino fatago hu'niye. 20 Agaemo Goti'a, henaga'amo huguve, huno hu'niya gee'mo, hisifi osisifi, huno lole agesa o'afi'niye. Ha'ao, agesa afino fatago hu'niya kava'amo'mo lokiya vaino ate'nigeno'ae'mo agaemo Goti'mo ala agi'amo ami'niye. 21 Agaemo Goti'a, huguve, huno hu'niya gee'mo lokiya vaino magoke agesa afi'neno'ae'mo, ani kava'mo afa'a hugiye, huno hu'niye. 22 Huno hu'niya'mofe'moGoti'a, naulagale'mo fatago vekamo mai'nane, huno ha pai'niye. 23 Goti'a, naulagale'mo fatago vekamo mai'nane, huno ha pai'niya gemo Emalehamufeke'mo avo okae'nifa lagae'efe'mo avo kae male'niye. Ani kava huno Goti'a lagaemo agaefe'mo Ala kava netimo Yesu'a fali'niyateti'mo ago alino he tino ate'niya Gotife'mo lagesa afita fatago nehuna vaya'mogitae'mo, naulagale'mo fatago vaya'mo mai'nae, huno laha paigiye. 25 Goti'a hosu kavatilefe'mo avalelino uno hosu vaya'ai apayapi'mo ateteno'ae'mo naulagale'mo fatago vaya'mo mai'nae, huno laha paisiyafe'mo kanolufati'mo ago alino he tino ate'niye.

Copyright information for `KYG