Romans 8

Atafa apaipamo akame nehaya kava'e Goti Auneme'amo akame nehaya kava'efe'mo ava gemo hu'niya gemae

Inagi Goti'a Kalaisi Yesupi'mo mai'nisaya vaya'aife'mo, hosu vayane, huno agoti huno o'apategaiye. Apakaemo atafa apaipamo akame nosafa Goti Auneme'amo akame nehae. Na kava hinageno'ae'mo agoti huno olategaiye. Ke'aepa gemo'a hosu kava'e nefali kava'e'mo alino afole aino ne'ateya'monanafa Kalaisi Yesupi'mo mai'nonageno'ae'mo Goti Auneme'amo'mo afa'a maisuna ya'mo alino nelamiya Auneme'amo'mo alagepa faigoko ge'aleti'mo ke'aepa gelefe'mo ago hatu maeno nate'niye. Atafa laipamo hane'nigeno'ae'mo ke'aepa gemo akame hisuna himamutimo ohane'niya'mofe'mo ke'aepa gemo'a afa'a laha o'mae'niye. Afa'a laha o'mae'nigeno'ae'mo Goti'a hosu kavatilefe'mo laha maeno mafa'ne'amo alino ate'nigeno emineno hosu kava'mo nehaya apakufagana agufamo ali'nigeno'ae'mo Goti'a Kalaisi agufafi'mo hosu kavatimo ago amagino atale'niye. Ke'aepa gemo'a huno'ae'mo, fatago kava'mo hiyo, huno hu'niya fatago kava'amo lagaepi'mo afole aisiyafe'mo hu'niye. Lagaemo atafa laipamo'mo nehaiya kava'mo osuta Goti Auneme'amo'mo nehaiya kava'mo nehune. Atafa apaipamo akame nehaya vaya'mogimo atafa apaipamo'mo hau'niya kavafe'mo hapau'nige'a ani kavafeke'mo apakesa ne'afiye. Goti Auneme'amo'mo hau'niya kava'mo akame nehaya vaya'mogimo hau'niya kavafe'mo hapau'nige'a ani kavafe'mo apakesa ne'afiye. Atafa apaipamo'a hau'niya kavafe'mo hapau'nige'a ani kavafe'mo apakesa ne'afiya vaya'mo nefaliya kavategamo ne'maiye. Auneme'amo'mo hau'niya kavafe'mo hapau'nige'a ani kavafe'mo apakesa ne'afiya vaya'mogi afa'a ne'maiya kavategamo afa'a mai'ne'apae'mo, Goti'a aipamo'mo falu huno nelate, hu'a nehageno'ae'mo apaipamo'mo falu nehiye. Atafa apaipamo'a hau'niya kavapi'mo mai'nisaya vaya'mogi Goti aiyafi'mo o'mai'a Goti ke'aepa ge'amo no'afiyanage'a afa'a o'afigaya'mofe'mo Goti kame vaya'amo mai'nae. Mai'naya'mofe'mo atafa apaipamo'a yagaino ne'apateya vaya'mogimo Goti'a amuse huno apatesiyafe'mo mago alagepa kava'mo afa'a alagi osugae. Osugaya'monanafa Goti Auneme'amo lapaipafi'mo mai'nisiyana atafa lapaipamo'a mago'e huno yagaino nolapate. Muki vaya'mogi Kalaisi Auneme'amo o'ali'nisayana Kalaisi vaya'amo o'mai'nae. 10 Kalaisi'a lapaipafi'mo mai'nisiyana hosu kava'mo afole ai'niya'mofe'mo lapakufamo faligiya'monanafa fatago kava'amo ali'naya'mofe'mo afa'a maisaya ya'mo alitetapa afa'a mai'nae. 11 Goti Auneme'amo'mo Yesu'mo fali'niyateti'mo ago alino he tino ate'niya vekamo lapaipafi'mo mai'nisiyana Kalaisi'a alino he tino ate'niya vekamo'a ani kava huno lapaipafi'mo mai'niya Auneme'aleti'mo falisiya lapakufamo alino he tino lapategaiye.

12 Konaga'nimogitapae, ani kava hugiya'mofe'mo anonatimo hane'niye. Atafa laipamo akame hisuna anonatimo ohane'niye. 13 Atafa lapaipamo'a hau'niya kava'mo akame nehisayana faligaya'monanafa Goti Auneme'aleti'mo lapakufamo hau'niya kava'mo alitapa amagita falitapa atalesayana ofalitapa afa'a maigae. 14 Goti Auneme'amo'mo apayate ne'alige'a akame nehaya vaya'mo Goti mafa'ne'amo mai'nae. 15 Ali'naya Auneme'amo'mo halate koli hisayafe'mo lapavaleno kalavusi ali'yate'mo olapate'nifa Goti afamo anagapi'mo lapavalelino uno faleno lapate'niye. Faleno late'nigeta Auneme'a'e himamu'aleti'e'mo hutae'mo, Afo, Afotimogae, huta keya ne'aone. 16 Goti Auneme'amo'mo launelamefe'mo, Goti mafa'ne'amo mai'nae, huno laha nepaigeta ne'afune. 17 Goti mafa'ne'amo mai'nona'mofe'mo Afotimo ya'amo alisuna mafa'ne'amo mai'none. Kalaisi'e'mo Afotimo ya'amo aligune. Lagaemo agae'e'mo magokepi kanamo ne'alisunana agae'e'mo ha le konali ya'amo magokepi aligune. 18 Nagesa afifi nehu'nae'mo, hemenimo kanamo ne'aliya ya'mo aise yanageno ha le konali ya'amo alino lamisigeta alisuna ya'mo alopa ya'mo hane'niye. 19 Ani yatefe'mo ma mopa'e muki ma mopafi hane'niya ya'e'mo Goti mafa'ne'amo'mo ha le'yategamo alino afole aino apatesiyafe'mo agava mai'ne'a hane'nae. 20 Ma mopa'e muki ma mopafi hane'niya ya'mogi'e'mo hosu kava'mo osu'naya'monanafa Goti'a alino hosu huno apate'nige'apa hosu kava hu'a hane'nae. Hane'naya'monanafa alagepa hu'a hanesayafe'mo agava mai'ne'a hane'nae.

21 Goti'a mafane'amo hatu maeno apatesige'apae'mo ha le konali ya'amo alite'a afa'a maigae. Ani kava huno Goti'a ma mopa'e muki ma mopafi hane'niya ya'e'mo kasalisaya kavategati nofi'mo hatu maeno apatesige'apae'mo alagepa hu'a hanegae. 22 A'nemogi mafa'nemo ali'a apategefe hu'nageno'ae'mo apakafu ki'nige'apae'mo avovo hu'a yulagefa ne'aiya kava hu'a ma mopa'e muki ma mopafi hane'naya ya'mogi'e'mo avovo hume hume ne'ae. 23 Ani ya'amogige'mo avovo nosafa lagaemo Goti'a alino lamisiya yapati'mo hogoteno Auneme'amo ago alino lami'niya vaya'mogita'e'mo muki ya'amo alino lamisiyafe'mo avovo nehune. Goti'a lagufale nofi'mo hatu maeno latesigeta alopa mafa'negana huta maisunafe'mo agava mai'neta avovo nehune. 24 Goti'a lagufamo alagi alino katino latesiyafe'mo agava mai'neta lavayagunagu nehune. Lagaemo ani ya'mo ago ali'nonesinana agava mai'neta lavayagunagu nosunesine. Vaya'mogi age'naya kavafe'mo agava mai'ne'a apavayagunagu nosae. 25 Lagaemo o'age'nona yafe'mo agava mai'neta lavayagunagu nehutae'mo alagi agegaune, huta nehuta o'ataleta agava ne'maune.

26 Goti Auneme'amo'mo ani kava huno lagaemo lokiya no'vauna vaya'mo laha ne'mae. Lagaemo na kavafe'mo nunumu hisupi huta o'afi'nona'monanafa Goti Auneme'amo'mo agai'amo laha ne'maegeta lavayaletike'mo ge osuta laipafati'e'mo yulagefa aigekana agufa gemo huta nunumu nehune. 27 Lavayaletike'mo ge nosuna'monanafa Goti'a apaipafike'mo ne'apakeya vekamo'a Auneme'amo'mo agesa ne'afiya agesamo ne'afiye. Auneme'amo'mo Goti'a hau'niya kavafe'mo nunumu'mo huno nelategeno'ae'mo Goti'a ne'afiye. 28 Muki alu kava alu kava'mo afole ne'aiya kava'mo'a Gotife'mo hapau apayamopafi'mo nehapaiya vaya'aife'mo Goti'a huguve, huno hu male'niya ge'aleti'mo keya aeno ge hu'niya vaya'mo alagepa hu'a maisayafe'mo muki alu kavateti'e alu kavateti'e'mo alino magokepi lokaeno ali'ya'mo ne'aliye. 29 Ani kavatefe'mo Goti'a hogoteno agesa afiteno'ae'mo hau ayamopafi'mo hau'niya vaya'aife'mo, mafa'ne'nigana hu'a maigae, huteno lekana paino apate'niye. Agana'amogimo asole vaya'mo maisageno hogote yege mafa'ne'amo'mo nepu'apimo'mo maisiyafeke'mo lekana paino apate'niye. 30 Lekana paino apate'niya vaya'aife'mo keya aeno ge hu'niye. Keya aeno ge hu'niya vaya'aife'mo, naulagale'mo fatago vaya'mo mai'nae, huno hapa pai'niye. Naulagale'mo fatago vaya'mo mai'nae, huno hapa pai'niya vaya'mo ha le konali ya'amo alino apami'niye. 31 Ani kava nehiya kavatefe'mo na gemo hugune. Goti'a lagaeke'mo laha ne'maeya'mofe'mo haiya vaya'mogi lagaefe'mo kame hu'a lategae. 32 Agaemo agai'a mafa'ne'amo agegeno o'ate'nifa muki'amogitalefe'mo avalelino uno apayapi'mo ate'niye. Agaemo mafa'ne'amo ago avaleno lami'niya'mofe'mo mafa'ne'a'e muki ya'a'e'mo afa'a olamigifiye. Ha'ao, afa'a alino lamigiye. 33 Haiya vaya'mogimo Goti'a lekana paino apate'niya vaya'mo apavaleli'a u'a agoti hu'a apatete'apae'mo, ina hosu kava'mo hu'nae, hu'a hugae. Ha'ao, Goti'a naulagale'mo fatago vaya'mo mai'nae, huno hapa pai'niye. 34 Haiya vaya'mogimo agoti hu'a apatete'apae'mo, hosu vaya'mo mai'nae, hu'a hugae. Ha'ao, Kalaisi'a ago fali'niye. Fali'niya'monanafa Goti'a ago alino he tino ate'nigeno'ae'mo mago'e huno laha maesiyafe'mo Goti lamaga haopale'mo mai'neno'ae'mo nunumu huno nelate. 35 Haiya vaya'mogimo Kalaisi'a lagaefe'mo hau ayamopafi'mo nehaiya kavapati'mo ali'a apahe'a latalegae. Hanageke ya'mo alisupi kanamo alisupi apaini hu'a latesafi laga tesifi kagemi yatimo ohanesifi lamagigefe hisafi lamagisageta falisupi huta mai'nisunana muki ani agufa kavateti'mo Kalaisi'a lagaefe'mo hau ayamopafi'mo nehaiya kavapati'mo ali'a apahe'a olatalegae. 36 Goti mukufi'mo avo kae male'niya gemo'a huno'ae'mo,

Gotiyo, hu'a, vaya'mogimo kagaetefe'mo muki afina'mo lahaegefe'mo nehae. Apakaemo, apamagisuna sipisipi afugana hu'a mai'nae, hu'a nelagae,
hu'a hu'nae.
37 Muki ani agufa kava'mo lagaetegamo afole ne'aiya'monanafa lagaefe'mo hau ayamopafi'mo nehaiya vekaleti'mo hemenimo mago'e huta aeta agaseta alagepa huta ne'maune. 38 Nagaemo ago age'novana falisuna kava'mopi afa'a maisuna kava'mopi enisole vaya'mogimofi yagai'a ne'apateya vaya'mogimofi himamu vaya'mogimofi hemenimo hane'niya kava'mopi henaga'amo afole aisiya kava'mopi lokiya ya'mopi anaga hane'niya ya'mopi afelaga hane'niya ya'mopi muki ya'mopi vaya'mogimofi hu'a Goti'a Ala kava netimo Kalaisi Yesupi'mo mai'nona vaya'mogitae'mo hau ayamopafi'mo nehaiya kavapati'mo ali'a apahe'a olatalegae.

Copyright information for `KYG