Romans 9

Hemenimo nagaemo mago gemo hugefe'mo huve. Nagaemo Kalaisipi'mo mai'ne'nae'mo lama gemo nehuve. Aote Auneme'amo'mo nagupi mafa'nele'mo yagaino ne'ategeno'ae'mo lama ge nehane, huno naha nepaiye. Ani lama gee'mo hu'nae'mo, nagae nofi vayapati ma mopafi konaga'nimogife'mo nagesa ne'afugeno'ae'mo muki afina'mo lusi kava huno naipamo'mo kana nehigeno nainaga nefaiye. Kanale kava'mo hane'niyesinana apakaetefe'mo Kalaisipi'mo o'mai'na malaga vekamo maisuvafe'mo nahau'niyesine. Apakaemo Goti vaya'amo Isaleli nofi vaya'mo mai'nageno'ae'mo, mafa'ne'nimo mai'nae, huno huteno agai'age'mo ha le konali vekamo'a apakae'e'mo magokepi lokaeno mai'niye. Goti'a apakaefe'mo kotalake ge'amo hapa paite hapa paite huno hapa paige ke'aepa ge'amo alino apamige mono kava'mo alino apave lige lapa maegauve, huno hapa pai'niya polomasi ge'amo hapa paige huno mai'niye. Hogote apakinago vaya'mo Isaleli nofi vaya'mo mai'nae. Kalaisi'a apakaepati'mo ma mopafi vekagana huno afole ai'niye. Kalaisi'a Goti'mo mai'neno muki ya'ale'mo ne'yagaiya vekage'mo muki afina'mo ala agi'amo amige amige hu'a ami'a hano osisaya vekamo mai'niye. He, lama ge.

Nagaemo, Goti'a Emalehamufe'mo kotalake gemo ha pai'niya gemo afole o'ai'niye, hu'na nosuve. Muki Isaleli nofi vayapati'mo afole ai'naya vaya'mogimo mago lama ge Isaleli vaya'mo o'mai'nae. Ani kava hu'a muki vaya'amogimo Emalehamu aginago vaya'amo Goti mafa'ne'amo o'mai'nae. Goti'a Emalehamufe'mo, Aisiki'a alino apatesiya vaya'aeke'mo keya ae'na ge hisuge'a kaginago vaya'mo maigae, huno ha pai'niye. Ani gemo aepa'ae'mo hu'nae'mo, apakufaleti'mo ali'a ne'apataya vaya'mo Goti mafa'ne'amo o'mai'nafa Goti'a huguve, huno hu male'niya polomasi ge'aleti'mo alino afole aino ne'apateya vaya'age'mo lama ge aginago vaya'amo mai'nae. Ani kavatefe'mo Goti'a huguve, huno hu male'niya polomasi ge'alefe'mo huno'ae'mo,magoke kafugamo utesige'na ani agufa afina'mo eminesugeno'ae'mo Sela'a mago ve mafa'nemo alino ategaiye, huno ha pai'niye.

10 Mago'e gemo afa'a hane'niye. Mago laginago vekamo Aisiki'a a'amo Lipeka'a aipagu'e ami'nigeno lole lago'ya mafa'nela'mo alino anate'niye. 11 Alino o'anate'nige'anae'mo mago alagepa kava'e hosu kava'e'mo osu'na'a afina'mo Goti'a,yege mafa'nemo'a agana'amo aiyafi'mo mai'neno kayokayo veka'amo maigiye, huno ha pai'niye. Goti'a hogoteno agesa afiteno hau'nigeno lekana paino ate'niya kava'amo alino afole aino atesiyafe'mo ani gemo hu male'niye. Mago vekamo'a alagepa kava'aleti'mo lekana paino o'ate'nifa keya ne'aeya vekamo'a agai'age'mo hau'nigeno lekana paino ate'niye. 13 Ani kavatefe'mo Goti'a avo kae male'niya gemo'a,Yekopufe'mo nahau nayamopafi'mo nahau'niya'monanafa Isofe'mo alagi o'nahau'niye, huno hu'niye.

14 Goti'a ani kava nehiya'mofe'mo lagaemo na agufa gemo hugune. Goti'a fatago kava'mo nosiye, huta hisupiye. Ha'ao, alagi atalegeno hano hino. 15 Ani kavatefe'mo Goti'a Mosesefe'mo,Ina lagife'mo nahau hu'na apategauve, hu'na hu'nisufige'na nahau'niyanage'na afa'a nahau hu'na apategauve. Ina lagimo fiku hapa maegauve, hu'na hu'nisufige'na nahau'niyanage'na afa'a hapa maegauve, huno ha pai'niye. 16 Vaya'mogi apakai'api hapau'niya kavateti'mo afole o'aige apayamukiki nehaya kavateti'mo afole o'aige hu'a afole no'aifa Goti'a hau huno ne'apateya kavatetike'mo afole ne'aiye. 17 Ani kavatefe'mo Goti mukufi'mo avo kae male'niya gemo'a, yagaino ne'apateya vekamo hogote vekamo Felofe'mo,Ina kavatefe'mo ali'na he ti'na kate'nove. Nagaemo himamu'nimo kagaeteti'mo ali'na apave lisuge'apae'mo ma mopafi muki haopalegamo mai'naya vaya'mogimo ala nagi vekamo'na nava gemo ae'a hakalo hu'a hapa paisayafe'mae, huno ha pai'niye. 18 Ani kavatefe'mo Goti'a ina lagife'mo hau huno apatesifigeno afa'a hau'niyanageno hau huno apategaiye. Ani kava huno ina lagimo apaipamo alino akanino apatesifigeno afa'a hau'niyanageno apaipamo alino akanino apategaiye.

Goti'a aipamo leno apatege hau huno apatege nehiya kavafe'mo ava gemo hu'niya gemae

19 Ani kava'mo nehiya'mofe'mo kagaemo, na kava nehageno'ae'mo Goti'a vai'mo ne'apamiye. Ina la'mo Goti'a hau'niya kava'amo alino atalegaiye, huka naha paigane. 20 Vayalafa'mo mai'nana'mofe'mo ina lagamo Goti ge'ale'mo afa'a aeka atagaina huka nehane. Alo hu'niya ya'mo'a alo hu'niya vekae'mo, na kava higeka ani kava huka alo huka nate'nane, huno afa'a hugifiye. 21 Kalipa mopaleti'mo ke'mo alo nehiya vekamo'a, na agufa ke'mo alo hugufi, huno nehisiyana hau'niyanageno agai'a ya'mogeno ani agufa ke'mo afa'a alo hugiye. Agaemo ani kalipa mopaleti'mo alino kamaeteno alino lo aeno magokayaga atupa'aleti'mo alagepa ke'mo alo huteno magokayaga atupa'aleti'mo afa ke'mo afa'a alo hugiye. 22 Ani kava huno Goti'a aipamo leno ne'apateya kava'e himamu'a'e'mo afa'a alino apave lisiyafe'mo hau'niye. Hau'nigeno'ae'mo aipamo leno ne'apateya vaya'mo mopa kegana hu'a mai'naya vaya'mo alino hano huno apatalesiyafe'mo apakai'apimo alo hu'a mai'naya'monanafa malage huno o'apamagino yatala afina'mo afa'a apakeno mai'niye. 23 Ani kava huno mago vaya'amo lusi ha le konali ya'amo alisayafe'mo hogoteno alo huno apate'niye. 24 Keya aeno ge hu'niya vaya'mogitalegamo ani kava'mo hu'niye. Yu vaya'aifeke'mo keya o'ae'nifa alu nofi vaya'efe'mo keya aeno ge hu'niye. 25 Ani kavatefe'mo Hoseya'a Goti mukufi'mo avo kae male'niya gemo'a huno'ae'mo,

Hogote'a vaya'nimo o'mai'naya vaya'aife'mo, vaya'nimo mai'nae, hu'na huguve. Nahau nayamopafi'mo o'nahau'niya vaya'aife'mo nahau nayamopafi'mo nahau'niya vayane, hu'na huguve,
huno huteno'ae'mo,

26 Vaya'nimo o'mai'nae, hu'na hapa pai'nova vaya'ai kotegamo mai'naya vaya'mogi alagi afa'a ne'maiya auneme'e Goti mafa'ne'amo mai'nae, hu'a hugae.
huno hu'niye.
27 Aiyeya'e'mo Isaleli vaya'aife'mo,

Isaleli vaya'mogimo ani asuepagana hu'a asole vaya'mo mai'naya'monanafa ani vaya'aipati'mo logufa vaya'ai apakufamo alino katino apategaiye.
28 Ani kavatefe'mo Ala kava ne'mo'a apamagiguve, huno hu'niya gelefe'mo ma mopafi vaya'mo malage huno apamagigiye,
huno hapa pai'niye.
29 Aiyeya'a hogoteno ani agufa ge'e'mo,

Ala kava ne'mo'a muki koku'napi ne'maiya vaya'aitenagi ma mopafi'mo ne'maiya vaya'aitenagi huno yagaino ne'apateya vekamo'a avina yakana huta maisunafe'mo lageno olatale'niyesinana Sotomi taonifi'mo mai'naya vaya'e Gomola taonifi'mo mai'naya vaya'e'mo afa'a apakeno o'apataleno alino hano huno apatale'niya kava huno alino hano huno latale'niyesine,
huno hu'niye.

Isaleli vaya'mogimo apakesa afi'a fatago osu'naya'mofe'mo o'ali'nae, huno hu'niya gemae

30 Nehuva gemo aepa'ae'mo hu'nae'mo, alu nofi vaya'mogimo fatago kava'mo alisageno'ae'mo Goti'a, naulagale'mo fatago vaya'mo mai'nae, huno hisiyafe'mo vegala o'ae'naya'monanafa apakesa afi'a fatago hu'naya kavatetike'mo Gotitegati'mo fatago kava'amo ali'nae. 31 Ali'naya'monanafa Isaleli nofi vaya'mogimo ke'aepa ge'amo akame hu'naya kavateti'mo fatago kava'mo alisayafe'mo vegala ae'naya'monanafa fatago kava'mo alisayafe'mo ke'aepa ge'amo akame nehu'apae'mo hai'a metale'nae. 32 Na kava hu'naya'mofe'mo o'ali'nae. Apakesa afi'a fatago hisaya kavateti'mo alisayafe'mo osu'nafa ke'aepa gemo akame hu'naya kavateti'mo alisayafe'mo hu'naya'mofe'mo o'ali'nae. Goti mukufi hu'niya gemo'a mago yafafe'mo ava gemo hu'niye. Ani yafapi'mo apaiyamo fai'a lo aete'a heleve hu'nae. 33 Goti mukufi gemo'a,

Afiyo, nagaemo Saiyoni taonifi'mo no'mo fai'na atesuva yafa'mo malegauve. Male'nisuge'apae'mo apaiyamo fai'a lo aete'a heleve hu'a asagau'a aigaya'monanafa muki alu vaya alu vaya'mogimo agaefe'mo apakesa afi'a fatago hisaya vaya'mogimo apavagage osuge hapai vai'a o'atege hugae,
huno hu'niye.

Copyright information for `KYG