Ruth 3

Luti'a Movasitegamo u'niya gemae

Neyomi'a Lutife'mo, Nanofelo, huno, kagaemo mago vekamo'mo aliteno alagepa huno yagaino katesigeka kanale huka maisanafe'mo nahau'niye. Ani vekamo Movasi'a negafokamo'mo mai'niye. Ali'ya'amo ne'aliya a'ne anaga'e'mo lokaeka ali'ya'amo ali'nana vekamo mai'niye. Hemeni hani'ilagamo ve anaga'mogimo mali alaga'e haleti'ya'a'e'mo sipetileti'mo fai'a kate'a koku'napi'mo yaga yaga hisageno yasimo'mo haleti'ya'amo alino halelino ne'visigeno alaga'age'mo mopafi'mo asagauno aigiye. Movasi'a ani ali'ya'mo alisayategamo uno maigiye. Uno mai'nisigekae'mo ani'mo faletaleka alagepa atumo ne'aiya uvelimo faleteka hogote alagepa kukenakamo alika vaika aliteka ali'ya'mo ne'alisayategamo uka maiyo. Ukae'mo uka aulagale'mo afole o'aika mai'negeno'ao ne'ya'e ani'e'mo neno hano hino. Neno hano huteno'ae'mo haino havaegefe'mo hisigekae'mo haino havaesiya ya'amo ageka alagepa hu male'neka havae'nisigekae'mo palaketimo alika asaga huli'neka aiyalegati'mo faleka haika aiya afafale'mo havao. Henaga'amo ina kava huvo, huno kaha paigiye, huno ha pai'niye. Luti'a, He kanalenage'na muki hana gemo alagi akame huguve, huno ha pai'niye. Inagi ali'ya'mo ne'aliyategamo uno'ae'mo muki anofelo'amo'mo ha pai'niya gemo akame huno hu'niye. Movasi'a ne'ya'mo nege ani'mo nege hu'nigeno'ae'mo aipamo'mo kanale hu'nigeno uno mali alagamo male'naya yategamo havae'niye. Au kale'nigeno'ae'mo Luti'a sako huno uno palaketimo alino asaga huli'neno aiyalegamo faleno haino havae'niye. Movasi'a au kale'neno'ae'mo hani'ilaga folagu'mo aino afe leno havaeyategamo a kanomo eno havae'nigeno ageteno'ae'mo hau ai'niye. Hau aiteno atete nehuno'ae'mo ina lagae, huno afi ge'nigeno'ae'mo, Ala nene, huno, Nagaemo Luti'nage'mae. Negafo'nimogamo mai'nana'mofe'mo kukenakaleti'mo alika kofika nato, huno ha pai'nigeno 10 Movasi'a, Ala kava ne'mo'a alagepa huno kaha maeno kamino. Hemenimo nehana kavakamo'mo kanofelokamo'e'mo mai'nekae'mo nehana alagepa kavakamo ago aeno aga se'niye. Asole neya vaya'mo mai'ne'a mago neya vaya'mogi kagemi ya'apimo hanege mago'amogi ohanege hu'niya vaya'mo mai'nayanageka mago neya vekale'mo maiguve, huka kagesamo o'afi'nane. 11 Muki mani kote ve a'nemogimo kagaemo kage'nayana kanale a kanomo mai'nane, hu'a ago kage'naya'mofe'mo koli osuvo. Naha pai'nana gemo afi'novanage'na kaha paigesuve. 12 Negafokamo'namo mai'novanage'na miya fai'na hatu mae'na katesuva vekamo mai'nova'monanafa mago hogote vekamo negafokamo'mo maitege'na agae akamelegati vekamo nagaemo mai'nove. 13 Hemenimo manile havae'nege'nao egamo u'na aipa agesae'mo afi gegauve. Yagai'na kategauve, huno hisiyana kanalene. Agaemo, yagai'na okategauve huno hisiyana nagaemo afa'a yagai'na kategauve. Goti'a mai'niye, hu'a alagi lama gemo nehaya kava hu'na lama gemo kaha nepauve. Hemenimo halate ago havae'negeno kotino, huno ha pai'niye. 14 Luti'a halate havaeteno kotino ha ole'nigeno'ae'mo ve a'nemogimo o'agesayafe'mo ago he tino u'niye. Movasi'a vaya'mogimo Luti'mo agesayafe'mo ohau'niya'mofe'mo hanipi'mo he tino u'niye. 15 Movasi'a Lutife'mo, lavolavokamo alika ataleka yakai maleno, huno ha pai'nigeno Luti'a alino ataleno yakai male'nigeno laisi kukana ya'mo alino aeno laku faeno maleteno alino asaga huno kofino ate'niye. Kofino ate'nigeno kofilino taonifilagamo hai'niye. 16 Luti'a haino anofelo'amotegamo ava'yi hu'nigeno'ae'mo, nanofelo, ago ne'apiye, huno afi ge'nigeno'ae'mo Luti'a Movasi'mo muki ha mae'niya gemo ava ge huno ha pai'niye. 17 Ha paiteno mago'e gemo ha paino'ae'mo, Movasi'a mali alagamo alino namiteno'ae'mo, Kanofelokamotegamo kagufa'ageke'mo o'uka ne'ya'eke'mo alinineka uvo, huno naha pai'niye, huno ha pai'nigeno 18 Neyomi'a, ani kavafe'mo kahausoli osuka haiya kava'mo afole aisifigi aise afina'mo afa'a agava maiyo. Movasi'a hemenimo afa'a no'maigaifa ani kava'mo alino alagepa huno ne'ategaiye, huno ha pai'niye.

Copyright information for `KYG