Ruth 4

Movasi'a Luti'mo ali'niya gemae

Movasi'a taonimo yafa lafi kegi'yale'mo ali'a anupa hu'a ne'maiya yate'mo uno itopale'mo mai'niye. Mai'nigeno mago vekamo Elimeleki nofi vayapati vekae'mo Movasi'a ava gemo hu'niya vekamo ne'egeno ageteno Movasi'a keya aeno ge huno'ae'mo, Ve'nimo, huno, Eka manile'mo itopale'mo maiyo, huno ha pai'nigeno eno itopale'mo mai'niye. Movasi'a naya lole'a vayatama vaya'mo taonifi'mo ne'yagaiya vayatama vaya'mo apavalelino e'nige'a magokepi itopale'mo mai'nae. Mai'ne'apae'mo Movasi'a agai'a anaga vayapati vekae'mo, Neyomi'a Movapu kotegati'mo ataleno eno manile'mo mai'niye. Elimeleki'a ago falitegeno Neyomi'a Elimeleki mopamo la'agae anaga vayapati vekamo mopa'amo maketi hisiyafe'mo hau'niyanage'na mago gemo kaha paigesuve. Kagaemo miya faika hatu maeka atesanafe'mo kahau'nisiyana mani vaya'ai apaulagale'mo miya faiyo. Kagaemo miya faisanafe'mo hogote vekamo mai'nanage'na kagae kakamelegati vekamo nagaemo mai'nove. Inagi miya fai'na hatu mae'na ategauve, huka hisana'mo'mo naha paiyo, huno afi ge'nigeno, miya fai'na hatu mae'na ategauve, huno ha pai'niye. Movasi'a, Neyomiteti'mo mopamo miya faisana'mo'mo Luti'mo Movapu kotega kogu a kano'e'mo miya faigane. Fali'niya vekamo nofi vaya'amogi mopamo hanesiyafe'mae, huno ha pai'nigeno, Nagaemo afa'a miya fai'na hatu mae'na o'ategauve. Falitesuge'apae'mo mafa'ne anaga'nimogi o'alisayana kanale osugiye. O'nahaiyanagi kagaikage'mo miya faiyo, huno ha pai'niye. Akeya'vilagamo Isaleli vaya'mogi hu'naya kava'mo hane'niyana mago ya'mo miya fai'a hatu mae'a ate'naya afina'mo ani vaya'mogimo apaiyaleti'mo su'apimo asagi'a ne'apamiya kavane. Isaleli vaya'mogimo ani kava'mo ago alita kanale hu'none, hu'a hute'a nehaya kava'mo hane'niye. Ani kava'mo hane'niya'mofe'mo ani vekamo'a Movasife'mo, Miya faiyo, huno ha paiteno'ae'mo aiyaleti'mo su'amo asagino ami'niye. Movasi'a ne'yagaiya vayatama vaya'e muki vaya'efe'mo, Muki'amogitapamo ani kava'mo ago age'nae. Hogoteno Neyomi'a Elimeleki yatenagi Kiliyoni yatenagi Maloni yatenagi huno muki ya'apile'mo yagai'niye. Hemenimo nagaemo muki ya'apimo ago miya fauve. 10 Ago miya fauva'mofe'mo Luti'mo nagai'ni a'mo maiye. Maloni'a ani a kanomo Movapu kotega a kanomo ali'niyateti'mo ago ataleno fali'niya a kanomo nagaemo ago aluve. Aluva'mofe'mo Maloni anaga vaya'ai mopamo hanegaiye. Maloni anaga vaya'mo fali'a hano osu'a maige maige hu'a maigae. Hemenimo lapakaemo mani nehuva kava'mo ago age'nae, huno hapa pai'niye. 11 Ne'yagaiya vayatama vaya'mogi'e'mo, He, ago age'none. Ala kava ne'mo'a ani nokafi'mo esiya a kanomo alagepa huno yagaino ate'nisigeno asole mafa'nemo Yekopu atala'mo Leso'e Liya'e'mo ali'ana apate'na'a kava huno asole mafa'ne anaga'mo alino apategaiye. Ala kava ne'mo'a kaha maenageka Efalata nofi vayapati'mo kagemi yaka'e vekamo mai'neka ala kagi vekamo maiyo. 12 Ala kava ne'mo'a kaha maenage'a mafa'ne anagakamogimo Pelesi nofi vayapati'mo Yutagani Temagani mafa'ne anaga vayakana hu'a maigae, hu'a ha pai'nae. 13 Movasi'a Luti'mo ali'nigeno Ala kava ne'mo'a Luti'mo alagepa huno ha mae'nigeno aipagu'e'mo maiteno ve mafa'nemo alino ate'niye. 14 A'ne anaga'mogimo Neyomife'mo, Ala kava ne'mo agi'ale'mo alita asaga higetao. Ala kava ne'mo'a ve mafa'nemo kami'niyanageno hemenimo miya faino hatu maeno latesiya vekamo mai'niye. Ani mafa'nemo ala agi vekamo maino. 15 Kanofelokamo'mo kagaefe'mo hau ayamopafi'mo hau'nigeno alagepa huno kaha ne'maeya'mofe'mo seveni'a ve mafa'nemo alika apate'nanesinana ago aeno apaka se'niyesine. Agaemo alino ate'niya ve mafa'nemo'a alagepa huno yagaino kategaiye. Anekalomo ago le'nananageno alagepa huno yagaino kategaiye, hu'a ha pai'nae. 16 Inagi Neyomi'a ani ve mafa'nemo avaleno anu kiteno yagaino ate'niye. 17 Ani kote a'ne anaga'mogimo agi'amo Ometi'ae hu'a ate'nae. Muki vaya'aife'mo, Neyomi'a ve mafa'nemo ago alino ate'niye, hu'a hapa pai'nae. Henaga'amo Ometi'a Yesimo alino ate'nigeno Yesi'a Nevini'mo alino ate'niye. 18 Pelesi aginago vaya'mogi apaki'apimo hane'niye. Ani vaya'ai apaki'apimo Pelesi'a Hesaloni'mo alino ate'nigeno Hesaloni'a Lamo'mo alino ate'nigeno Lamo'a Aminanapu'mo alino ate'nigeno Aminanapu'a Nesoni'mo alino ate'nigeno Nesoni'a Samoni'mo alino ate'nigeno Samoni'a Movasi'mo alino ate'nigeno Movasi'a Ometi'mo alino ate'nigeno Ometi'a Yesi'mo alino ate'nigeno'ae'mo Yesi'a Nevini'mo alino ate'niye.

Copyright information for `KYG