Song of Solomon 7

Kini vekamo a'mafa'ne'amogae, huno, kagaemo kaiyale'mo su'mo vaika ali'nana kaiya'mo'mo mago'e huno kanale kaiyamo hane'niye. Kaumi'yamo aeno hapai'niya ya'e kale'yamo aeno hapai'niya ya'e'mo alopa monileti'mo miya nefaiya yafa'mo ani kava huno alagepa huno age'niya vekamo'a alo hu'niya yafakana huno hane'niye. Kagae kaipamo folagapi'mo mago kapugana huno hane'niye. Ani kapufi'mo nofi alagafati ani'mo havai te'niye. Kaipamo alagepa kanale kaipamo'mo ani kava huno vitimo alini'e'a magokepi ali'a anupa hu'a male'naya vitimo yaveyave ausemo folagapi'mo hane'niya vitigana huno hane'niye. Kagaemo lole nukala'mo'a ani kava huno lole kanale afela afula'mo lago'ya afela afulakana huno hane'niye. Lugokamo'mo mago yatala vegovego no'mo yaveyave nokana huno hane'niye. Kaulagala'mo'a lole ani kotutala'mo Hesimoni taonimo yafa lafi kegi'ya kate kipate'mo hane'niya ani kotutalakana huno hane'niye. Kagaemo kago'yamo kanale kago'yamo Lemanoni yahaofi'mo yatala nokana huno hane'niye. Kava ne'yagaiya vaya'mogimo ani nopi'mo mai'ne'a Namakasi taonifi mai'naya vaya'aife'mo aulu hapae'a apake'a yagai'a ne'maiye. Kagenopamo'mo Kameli avegana huno hane'niye. Kayoka'mo okokana agufa kayoka'mo hane'niye, huno ha pai'niye.

Agaemo kini vekamo atafau'nigeno haite'a emi'ete'a nehaya yate'mo mai'niye.
Nahau nayamopafi'mo ne'nahaiya a kanomogae, huno, alagi kanale a kanomo mai'nane. Muki ya'akamo'mo namogaga aisuva agufa kava'mo nehiye. He tika maikae'mo alagi alagepa huno api aino hane'niya kokanasi yosagana huka he tika mai'nane. Nukamo'mo ani agufa yosa alagagana huno hane'niye. Nagaemo, Ani yosafi'mo hai'na yosa akopale'mo atafauguve, hu'na hu'nove. Hai'na maisugeno nukamo'mo nofi alagamo'a magokepi akalo akalo huno nehaneya kava huno hanegaiye. Kavayafati'mo apoli yosa alagamo'a kanale atumo ne'aiya agufa atumo aigiye. Kavayamo nofi alagafati ani'mo hogote anikana huno hanegaiye, huno ha pai'niye.

Ani nofi alagafati ani'mo nahau nayamopafi'mo ne'nahaiya veka'nilefe'mo hane'niye. Ani ani'mo'a haga'age'mo hu'niye. Apaukalegekana hu'a ne'maiya vaya'mogimo ne'ne'apae'mo ge nehae.
10 Nagaemo nahau nayamopafi'mo ne'nahaiya veka'nimo a'amo mai'nogeno nagaefe'mo ha'ye nehiye, huno hu'niye.

11 Nahau nayamopafi'mo ne'nahaiya veka'nimogae, huno, nagae'e'mo magokepi lokaeka egeta'ao malaga ugu'ae. Uta'a alu aise taonifi'e alu aise taonifi'e'mo havaegau'ae. 12 Havaeteta'ae'mo kotilamisiyapi'mo he tita'a nofi hoyalegamo uta'ae'mo nofi'mo'a ago ausisimo ae'nisifi ause'amo ago aino ata le'nisifi pamagalanati yosamo'a ago ause he'nisifigeta'a uta'a agegau'ae. Mai'neta'ae'mo nahau nayamopafi'mo ne'nahaiya kava'nimo ali'na kave liguve. 13 Alagepa kahaumo ausemo'a alagepa atumo ne'aiye. Nagaemo alagepa yosa alagamo ali'na muki yafa lafi kegi'ya kate kipa'ale'mo male'nove. Mago'amo akeya'vilaga alige mago'amo hemenimo alige hu'na ali'na anupa hu'na male'nove. Nahau nayamopafi'mo ne'nahaiya veka'nimogae, huno, kagaetefe'mo ali'na anupa hu'na male'nove, huno ha pai'niye.

Copyright information for `KYG