Titus 1

Nagaemo Polo'namo Goti nofite'mo mai'ne'nae'mo ali'ya'amo alige Yesu Kalaisi apa veka'amo maige hu'ne'nae'mo mani avo'mo nekaove. Goti'a lekana paino apate'niya vaya'mogi apakesa afi'a fatago huge lama gemo alagepa hu'a afi'ne'a Gotifeke'mo alagepa hu'a mono huge hisayafe'mo nagaemo ali'ya'mo ne'aluve. Goti'a alagi aigofe gemo nosiya vekamo'a hogoteno ma mopamo alo osu'neno'ae'mo, fiku hapa mae'na apamisuge'a maige maige hu'a maigae, huno ago hu male'niya'mofe'mo agava mai'ne'apae'mo apavayagunagu nehae. Nehaya'monanafa afole aigiye, huno huteno lekana pai male'niya afina'mo vaya'mogi ge'amo ae'a hakalo hu'a hapa pai'nageno'ae'mo afole yategamo ago afole ai'niye. Goti'a lagufamo alino katino nelateya vekamo'a mani gemo alino namiteno'ae'mo, aeka hakalo huka hapa paiyo, huno naha pai'nige'na ae'na hakalo hu'na hapa nepauve.

Lama ge mafa'ne'nimo Taitasigae'mo mani avo'mo nekaove. Lagesa afita fatago hu'nona kava huka kagesa afika fatago hu'nane. Afotimo Goti'e lagufamo alino katino late'niya vekamo Yesu Kalaisi'e'mo fiku kaha mae'ana kamite'ana hanau hu'ana katesa'ageno kaipamo'mo falu hino.

Siosi vaya'aite'mo yagai'a apatesaya vayatama vaya'mogimo ina kava'mo nehaya vayane, huno hu'niya gemae

Lagaemo mago ali'ya'amo alita hano osu'nonanageka kagaemo alika hano hisanafe'mo Kiliti ani ago'nanenafi'mo katale'na u'nove. Siosi vaya'aite'mo yagai'a apatesaya vayatama vaya'mo muki taoni'afi taoni'afi'mo lekana paika apato. Ina kava'mo nehisaya vaya'mo lekana paika apato, hu'na ago kaha pai'nove. Vai'mo o'ali'a magoke a'mo ali'nisaya vaya'mo vayatama ali'yate'mo maigae. Apakesa afi'a fatago hu'nisaya mafa'ne'ai afo'apimogige'mo ani ali'yate'mo maigae. Gemo o'afi'a negi malete'a hosu kava'mo nehae, hu'a apava gemo nosisage'a alagepa kava'mo hu'a ne'maisaya mafa'ne'ai afo'apimogige'mo maigae. Yagai'a apatesaya vayatama vaya'mogi Goti no'ale'mo yagaigaya'mofe'mo vai'mo o'apamisage'a afa'a ne'maisaya vaya'mo maigae. Himu'namu kava'mo huge malage huno apaipamo lege ani'mo ne'ne'a negi nagi kava'mo huge kaveta huge monie'mo hapa'ye huge hu'a mai'nisaya vaya'mo o'maigae. O'maigaya'monanafa nata vaya'aite'mo alagepa hu'a yagai'a apatege alagepa kavafe'mo hapauge alagepa apaipa apakesale'mo yagai'a atege fatago kava'mo huge apaote kava'mo huge hapau'niya kavate'mo yagai'a atege hu'a mai'nisaya vaya'mogige'mo maigae. Apakaemo lama gemo ali'a apaya male'naya gemo afite'a atafau'a alagi hu'a mai'nisayana lokiya vaino ne'apateya geleti'mo alagepa hu'a ali'a apaya malege ge'apile'mo hu'a ae'a ati nekaya vaya'ai ge'apimo hu'a ae'a agasege hu'a maigae.

Kiliti kotega mai'naya vaya'aife'mo apava gemo hu'niya gemae

10 Na agufa kava'mo hu'naya'mofe'mae. Asole vaya'mogi ge o'afi'a afa'a mai'ne'a fiku gemo huge humi apatege hu'a mai'naya'mofe'mae. Asole vaya'mogi apakufamo lagau'a apate'naya vaya'mo ani agufa kava'mo hu'a mai'nae. 11 Ani agufa vaya'mogi monimo alisayafe'mo afa'a osisaya agufa gemo ali'a apaya ne'male'apae'mo muki anaga vaya'ae vaya'ae'mo ali'a hosu hu'a ne'apatae. Ge osisayafe'mo apavayale'mo huka apatafauka apato. 12 Mago Kiliti kotega vayapati vekamo'a gemo aeno hakalo huno hapa nepaiya vekamo'a huno'ae'mo, Muki afina'mo Kiliti kotega vaya'mogi aigofe gemo huge afela afugana hu'a maige ali'ya'mo o'ali'a mai'ne'a alopa ne'ya'mo nesayafeke'mo apakesamo afige hu'a mai'nae, huno hu'niye. 13 Ani vekamo'a lama gemo hu'niya'mofe'mo kagaemo lokiya ge huka hapa paige'apao apakesa afi'a fatago kava'apimo kaita haugekana huno ohaneno alagepa huno lokiya vaino haneno. 14 Apakaemo Yu kaitene gemo o'afige lama gemo amagi'a ne'atalaya vaya'mogi, ina kava hiyo, hu'a nehaya ge'apimo o'afige hisayafe'mo lokiya gemo hapa paiyo. 15 Yaveyave apaipa vaya'mogimo muki ali'nisaya ya'amo apakai'apilefe'mo yaveyave ya'mo hane'niya'monanafa hosu kava'mo'a alino o'ani'ya faino apate'nisiya vaya'mogimo muki ali'nisaya ya'amo apakai'apilefe'mo o'ani'ya ya'mo hane'niye. Apakesamo ne'afiya ya'apifi'e apakupi mafa'nefi'e'mo o'ani'ya ya'mo havai te'niya'mofe'mae. 16 Apakaemo apavayaleti'mo, Goti'a age'none, hu'a nehaya'monanafa nehaya kava'apimo'a, o'age'nae, huno alino apave neliye. Goti'a apakaefe'mo ohau'nigeno'ae'mo ge'amo o'afi'a alagi hosu kava'mo nehaya vaya'mo mai'nayanage'a alagi alagepa kava'mo afa'a osugae, huno nehiye.

Copyright information for `KYG