Titus 3

Ina alagepa kava'mo hiyo, huka hapa paiyo, huno ha pai'niya gemae

Kagaemo, Gamani vaya'ai ge'apimo afige ala vayatapimo yagai'a nelapataya vaya'ai ge'apimo afige hutapa akame nehutapae'mo muki alagepa kava'amo hisayafe'mo alo hutapa maiyo, huka hapa paiyo. Mani gemo ago afi'naya'monanafa halate hapa paiyo. Mago vaya'aife'mo huta faipa huta o'apatetapa kaveta hisaya agufa gemo osutapa yagu yaga kava'mo nehutapa muki vaya'e'mo alagepa hutapa magokepi lokaeta maiyo, huka hapa paiyo. Hogoteta apakaekana huta mai'neta negi kava huta ge o'afita aigofe ge'age'mo afita mai'none. Asole agufa hosu kavatimo hane'niyana lagufamo'mo hau'niya kavatimo'e laha'ye nehiya kava'mo'e'mo yagaino late'nigeta alagepa hu'a o'maisayafe'mo hosu laipamo kalita apatege laipa kafa hapaege huta mai'none. Apaini hu'a nelatagetae'mo lagae'e'mo laini huta apate'none. Ani agufa kava'mo hume hume ne'onageno'ae'mo lagufamo alino katino nelateya vekamo Goti'a alino ao ya'mo huteno ma mopafi vaya'aife'mo hau ayamopafi'mo hau'niya kava'amo laulagale'mo ago alino afole aino ate'nigeta age'none. Agaemo fatago kava'mo huta alagepa ali'ya'mo ali'nona kavatileti'mo lagufamo alino katino olate'nifa fiku hau huno nelateno lagufamo alino katino late'niye. Auneme'aleti'mo alino late'neno hosu kavatimo aeno kalo paeno late'nigetae'mo saufa vaya'mo hamale'none. Lagufamo alino katino nelateya vekatimo Yesu Kalaisiteti'mo lagaete'mo Auneme'amo ani'mo lakigekana huno alino lami'niye. Goti'a fiku laha maeno nelamino'ae'mo, naulagale'mo fatago vaya'mo mai'nae, huno hu'nigetae'mo fali'niya kavateti'mo Afotimotegati'mo maige maige huta maisuna yatimo alisunafe'mo agava mai'neta lamogaga ne'auna ya'mo ago alino lami'niye. Mani nehuna gemo lama gemo hane'niya'mofe'mo ani kavafe'mo lokiya gemo hapa paisanafe'mo nahau'niye. Hapa paige'apao Gotife'mo apakesa afi'a fatago hu'naya vaya'mogimo apayamukiki hu'a alagepa kava'mo hiyo. Ani kava'mo alagepa kava'mo hane'neno vaya'aina hapa ne'maeya kava'mo hane'niye. Hapa maegaiya'monanafa negi nagi gemo hute'a ge ne'vaiya gemo'agi apakinago vaya'mogi apaki'apilefe'mo nehaya gemo'agi hega ne'aya gemo'agi ke'aepa gelefe'mo ge ne'vaiya gemo'agi huno hapa maeno alino alagepa huno o'apategaiyanagi ataleka maika halove huka maiyo. 10 Kagaemo Goti mafa'nemo ali'a fako hu'a ne'apataya vaya'aife'mo magoke afina'mofi lole afina'mofi hukae'mo, hosu kava hae, huka hapa paiyo. O'afisayana maika halove huka apato. 11 Ago afi'nanana ani vaya'mogimo api ka'mo atale'a kayagi'niya kate'mo ne'u'apae'mo hosu kava'mo nehae. Apakai'api hosu kava'apimo'a agoti huno ne'apateno'ae'mo, hosu kava'mo nehae, huno nehiye.

Ge atupa gemo hu'niya gemae

12 Nagaemo yasimo ne'aliya afina'mo Nikopolisi taonifi'mo maiguve, hu'na nagesamo afi'nove. Nagaemo kagaetegamo Atemasi'a ali'na atesugeno visifi Tikikasi'a ali'na atesugeno visifi huno ava'yi hisigekae'mo malage huka he tika nagaetegamo eno. 13 Ke'aepa gemo afi'niya vekamo Sinasi'e Apolosi'e'mo umenitata hisa'agekae'mo hana maege'anao mago yafe'mo kafu osu'ana alagepa hu'ana vi'ao. 14 Vayatimogi muki afina'mo alagepa kava'mo nehu'a mago yafe'mo kafu nehaya vaya'mo hapa maesayafe'mo fiku yanage'a kafu hugayanagi apakeyo. 15 Nagae'e'mo muki ne'maiya ve a'nemogi ge kamamae'nae. Lagaefe'mo hapau'nige'apae'mo Gotife'mo apakesamo afi'a fatago nehaya vaya'aife'mo, Polo'e'mo ge lapamamae'nae, huka hapa paiyo. Goti'a muki'amogitapamo fiku lapa maeno lapamino. He, lama ge.

Copyright information for `KYG