1 John 1

Áánútuna imáyáama agaráásínkáiwaina kwaasái.

Ísu Káráísiti Áánútuna imáyáa agaráásínkáiwaiyaama póna kwaási aúnáiꞋa umái maíꞋmaiꞋa ónááowaina ááinkoman-iye. mináíntávéꞋa maanáúváí agaimái kentópaꞋa tuwáúnana kwégwiye. ááinkaꞋa maramá íma kwáyonkaꞋa kwemá maémáimba marapáꞋá kuména keséya máyowata súranta awánamai kaweꞋá éta kwenáái iséta siyáándei aneꞋá tátokaundayaawe. aúnáiꞋa umái maíꞋmaiꞋa ónááowaina ááinkoma avowánópaꞋa máyomba marapáꞋá kuména keséya máyowata awánareta póta mináímbá kwésimatimundayaawe. kesáá Áánútuwe ááninko Ísu Káráísitiye tarúmaiya máyaumne. awánaraunda ísaraunda keinárawakwaraꞋa kwésimatimunda póta Áánútuwe ááninkowe tarúmaiya máyaundantemba keinárawaꞋa mirá ónááowe. kentáásirumba kaweꞋá umái anómba umásinkanintaveꞋa maanáúváí agaimái kwétimune.

Áánútu sámo kaiwáíná ááinkona kwaasái.

Áánútu ááninko simásímakain-ainta simátimeta séta Áánútu sámo kaiwáíná ááimba póna túnín-tantaaꞋa kwempímbá íma kwáyáiye. miráumai túnín-ayampaꞋa máyáamba Áánútuwe tarúmaiya máyaumne kwésewai kampaꞋá kwésesa árair-ainkona ááimpimba íma máyáawe. ánivo Áánútu sámo kain-áyámpáꞋó máyáintemba miráumaimo sámo kain-áyámpáꞋó máyaundaya kwená kwaásiye tarúmaiya máyaumne. miráumai Áánútu ááninko Ísuma kentááyávéna imáyáa éna kumpuwúwana kwená naaegó kuména póna kentáásí sáwí-imayaa kwémaisiyuꞋmaenaya kwéiyiye. kempíntá sáwí-imayaa íma kwáyáiye súndaya kesirunkómbá kampar-áíntá simá-uwáúnanaya Áánútuna árair-aimba kesirumpintá íma kwáyáiye. avoraꞋó Áánútumpataamo sáwí-imayaayavetaamo simáménanayaamo éna Áánútu kentáásí sáwí-imayaa maisiyuwénaya amápa-sawi-imayaa arupí umásinkanintaawe. Áánútu kwemó siráiniꞋa mirá éna miráumai kaweré suꞋmai kwéena póna sáwí-imayaa maisiyuwénaya arupí kwéumasinkaiye. Áánútu séna amáparawai sáwíꞋa uráawe simbánivo kesáámá séta íma sáwíꞋa kwéune kwéseta Áánútu kampar-áímbá kwésiye súnana Áánútuna áséi-kwasaigo íma sirumpintá kwégwaiye.

10 

Káráísiti amáparawaiya siráváyáin-kwasai.

Copyright information for `KZE