1 John 5

marapá-sáwí-máyáígómbá kwéusayaaitaan-kwasai.

Ísuntavesa sésa Áánútu usásinankaraiwai iyémó sen-áíntávésa áraire kwésewai Áánútuna iyámpóíman-owe. avowámbá tirumbá améwai ésa kwená iyámpóígwaraꞋa tirumbá kwéamewe. Áánútumba siruntá améta kwenáái taagwiyavéta póta mirá kwéundayaveta séta Áánútuna iyámpóígwaraꞋa siruntá kwétimune. Áánútun-aai taagwiyavúndaya mindá Áánútumba siruntá kwéamunanaya kwenááigoya íya umbaiyá kwésiyaisata póta kwétaagwiyavune. ÍsumpaꞋa asiramái agevamái máyaundaya póta marapá-sáwí-máyáígómbá kwéusayaaitaundayaawe. Áánútuna iyámpói amápaꞋa kanaán-umai marapá-sáwí-máyáígómbá kwéusayaaitaamba póna Áánútun-aaigoma íma umbaí kwétaiye. maarán-kwáásí marapá-sáwí-máyáígómbá kwéusayaaitaawe. Ísuntavesa Áánútu ááninkoman-iye kwésewai marapá-sáwí-máyáígómbá kwéusayaaitaawe.

Áánútu Ísu Káráísitimba agaráátínkarain-kwasai.

Ísu Káráísiti marapáꞋá kuména nombá peréna puwúwana kwená naaemá kunkáiye. nombá peráníntavenawe suꞋmai íma kunkáiye. nombá peréna puwínana kwená naaemá kuníníntavena kunkáiye. Áánútun-amanko árair-ainkona ááimba póna séna áraire Ísuma Áánútu ááninkoman-iye kwésiye. Áánútun-amanko siráin-aintaveta nombá pékaintaveta puwúwana kwená naaemá kunkáintaveta séta Ísuma Áánútu ááninkoman-iye kwésune. minkáúmbó-yántááꞋá paáruraintaveta mimbórá-áímbá séta Ísuma Áánútu ááninkoman-iye kwésune. kwaásimo simátímén-aimba sewatá iséta áraire kwésundayaanivo Áánútun-aaigo kwaási tááigomba usáyaaitaimba póta Áánútu ááninkontavena siráin-ainta ísáano. 10 Áánútu ááninkontavesa asiramái agevamái máyáawai sésa Áánútu siráintemba áraire Ísuma Áánútu ááninkoman-iye kwésewe. Áánútuntavesa íma asiramái máyáawai sésa Áánútu kampar-áímbá siráiye kwésewe. kwemá Áánútu ááninkontavena siráin-aintavesa íma áraire senkákémbá Áánútu kampar-áímbá siráiye kwésewe. 11 Áánútu ááninkoma aúnáiꞋa umái maíꞋmaiꞋa kwéowaina ááimban-iye. Áánútu imáyáaya símísata aúnáiꞋa umái maíꞋmaiꞋa kwéundayaawe. mináíntá Áánútu simásímakaiye. 12 Áánútu ááninkoe tarúmai máyáawai aúnáiꞋa umái maíꞋmaiꞋa kwéovo Áánútu ááninkoe íma tarúmai máyáawai íma aúnáiꞋa umái maíꞋmaiꞋa kwéowe.

aúnáiꞋa umái maíꞋmaiꞋa kwéon-kwasai.

13 Áánútu ááninkontaveꞋa asiramái agevamái máyáan-kwaasi keinárawaꞋa maanáúváí agaimái timúne. aúnáiꞋa umái maíꞋmaiꞋa kwéon-aintaveꞋa áraire sígwáe séꞋa maanáúváí agaimái timúne. 14 Áánútumbo arááímo tainíꞋo kwéetaamo námúnaavinkembo áísaa úndaya kesááiya kwéisaiye. mindáyaveta kwenaúrankaꞋa asiramáíya máyaumne. 15 námúnaa súndaya kwéisain-aintaveta árair-aimban-iye kwésundaya maarán-áíntáváígwáráꞋá árair-aimba námúnaavinkemba súnda-yantaaꞋa úwoiya kwésimiye kwésune.

16 kentí kwaásimo sáwíꞋo kwéiyaꞋo tuwánéꞋo éꞋa ÁánútumpaꞋa áísaa íyana túwaꞋnaa ínasa Áánútuna némpaꞋa sáwí-ayampaꞋa maíꞋmaiꞋa ónááopaꞋa íma kónááowe. évaka-sawiꞋo kwéowaina anondá-meyamba Áánútuna némpaꞋa sáwí-ayampaꞋa maíꞋmaiꞋa ónááopaꞋa kónááomba mindáyaveꞋa ÁánútumpaꞋa áísaa oro íma kwésune. évaka-sawiꞋo kwéowaina anondá-meyamba íma Áánútuna némpaꞋa kónááomba mindáyaveꞋa séꞋa ÁánútumpaꞋa áísaa oro kwésune. 17 amápa-sawiꞋo kwéowaina anondá-meyamba kwáyáivo évaka-sawiꞋo kwéowaina anondá-meyamba Áánútu maitiyuwáínasa kwená némpaꞋa sáwí-ayampaꞋa maíꞋmaiꞋa ónááopaꞋa íma mirá-sáwíꞋó kwéiyaꞋo tuwánéꞋo éꞋa ÁánútumpaꞋa áísaa íyana túwaꞋnaa ínasa Áánútuna némpaꞋa sáwí-ayampaꞋa maíꞋmaiꞋa ónááopaꞋa íma kónááowe.

18 Áánútuna iyámpói ésa íma sáwíꞋa úmae kwéiyowe. Áánútu ááninko kárákwiraisana póna Sáátáánigo íma kwétatoraisasa pósa íma sáwíꞋa úmae kwéiyowata mináíntá kwéisaumne.

19 Sáátáánigo marapá-kwáásítí anóndakoman-ivo kesáá Áánútuna kwaási éta mináíntá kwéisaumne.

20 Áánútu ááninko kuména imáyáa símísata árair-Isoigo-uramba isatá kwéawanaumne. Áánútu ááninko Ísu Káráísitiye tarúmaiya máyaundayaveta árair-Isoigo-uranteya tarúmaiya méta kwéisaumne. árair-Isoigo-uranko éna kwaásiya aúnáiꞋa umáíya maíꞋmaiꞋa kwéundawai ááninkoman-iye. 21 kesí iyámpóíyono. kwaántá-kwaasi kampar-ísóígómbá tínaaemba umátíméro.

kemá Yóni kesáái ánásaiye.

Copyright information for `KZE