2 Corinthians 7

kesí kwaási ísáaro. Áánútu kentááyávéna imáyáa éna mináímbá simái tarúmakaintaveta kesúrake-sawi-yantaare kentáásí imáyáavinke-sawi-yantaare sínaaemba umámeta kaweꞋá umáíya méta Áánútu aúrankaꞋa sááꞋa kwégaisata Áánútundei-iꞋa umái méta kaweré suꞋmaiya éta miráyá onó.

Póro arunkó aamoí uráin-kwasai.

kentááyávéꞋa íma kayoréꞋa kentáásí imáyáa úwoi oró. íma sáwíꞋa umátinkaawanasaya sáwí-amba kwakáawe. íma kampaꞋá simátiyuweta miwítí óísanta íma mémairaumne. mináímbó simátimunda íma aaivimbá kwémaitinkeꞋa súne. kentí imáyáa kwéundaya simátimeta ókwaraꞋa miráyá kwéune séta úwoimo máyaundaya kentí imáyáa kwéeta puwónaunda-kanaa tínímba úwoi kentí imáyáa kwéonanaya tíníye. áraiꞋa kaweꞋá umái máyáawe asiramái séꞋa kentúwíꞋa mósá kwémaraumne. anón-umbai-yantaaꞋa kentáásópaꞋa kwétimba mindáyaveꞋa íma imáyáa éꞋa kentí imáyáa únana kentááigo asiramásínkáísana sirunkó ávááraumai aamoí kwéiye.

Táróasi-naopaꞋa tuwéta Másétóniyaa-maravaꞋa tamáyaawanda íma kawe-kánáá úwata máyaawanasaya amápaꞋ-naopimpaꞋa kaeꞋnáéꞋa ésa aaisambá kwésuwana kentáásí mayáíyávéna kentáásirunko umbaí kwétowana Áánútu tirunkó umbaí kwétain-kwaasi tiráváyáiwai kwemá sirávayanintavena Táításimba aiꞋmarówana keinárawaꞋa tiyuwéna kentáásópaꞋa téna maaváꞋó túntaveta aamoí éta keinárawatemo máyon-kawer-aimba simásimuntavetaagwaraꞋa aamoí ówánanaya keinárawaꞋa kentáá suwánanae siráamba tasimásimenaya sáwíꞋo uráantavenamo kentirunkó umbaimó taráimba tasimásimenaya kentávésamo kampar-áímbó sen-kwáásí táái anondá simátímakaamba tasimásimenaya mirán-áíntómbá tasimásimuwata isááwánanaya kentáásirunko aamoí uráiye.

aúvái agaimái timéꞋa asiramái séꞋa óꞋa íma mirán-oro siráunda minaúváí awánowana sáwíyankaꞋa kentirunkó umbaí tówaꞋa mináímbá iséꞋa mináúváí agairáundayavena sirumbá umátinkeꞋa ívéꞋa sirunkó íma umbaí téna kaweꞋá kwéiye. kentirunkó umbaí tóntaveꞋa íma aamoí éꞋa kentirunkó umbaí tówaꞋa sáwíꞋo uráambo tínaaembo umámakaantaveꞋa aamoí kwéune. sáwíꞋo kwéontavena tirunkó umbaí taíno Áánútu kwésiye. mindáyaveꞋa mináúváí agaimái tímakaunda íma sáwíꞋa umátínkaraumne. 10 Áánútu tirumbá umbaí tamátinkaiwai sáwíꞋo kwéomba tínaaemba umámewana sáwíꞋo umáímo máyáampinkemba Áánútu tiréna kawepáꞋá mógwétinkaisana mindáyavena tirunkó íma sáwíꞋa kwéivo marapá-kwáásí Áánútuntavesa íma imáyáa kwéowai tirunkó umbaí tainkáꞋá sáwíꞋo kwéomba íma tínaaemba umámesa úwoi sáwíꞋa ésa Áánútuna némpaꞋa maíꞋmaiꞋa ónááowe. 11 sáwíꞋo uráantavena Áánútu kentirumbá umbaí tamátínkaraimba póꞋa kaweꞋá uráamba imáyáa oró. keinárawapinkemba moóráwai sáwíꞋa uráimba íma asiramái simámakeꞋa tímakaunda-auvai-aimba iséꞋa séꞋa arupí umátinketa kawer-ámbá kwáráano séꞋa sáwíꞋo uráantaveꞋa tigaeyávéꞋa éꞋa sáwí-meyambo kentópaꞋo tíníntaveꞋa táátaveꞋa éꞋa séꞋa arupí umátínkáanana Póromo ménamo éna súwaꞋnaa íníye séꞋa sáwíꞋo uráiwaimba ááéma sáwí-meyamba améꞋa keinárawapinke-sawi-imayaa arupí umátinkeꞋa mirá uráamba ánásaraiye-aimba ísaraumne.

12 mináúváí agaimái tímakaunda sáwíꞋo uráin-kwaasigontaveꞋa íma aivaꞋá imáyáa éꞋa sáwíꞋo umánkarain-ininkontaveꞋa íma aivaꞋá imáyáa éꞋa íma mirá uráumpo Áánútu aúrankaꞋa kentááyávéꞋa anón-imayaa éꞋa kentááyávéꞋa séꞋa miwíyávéta anón-imayaaya kwéune sénááontaveꞋa mináúváí agaimái tímakaumne. 13 mináúváímó tímakaundanteniꞋo uráamba kentáásí imáyáa kaweꞋá umásínkaraawe.

Táításimba aiꞋmarááwánanaya kentópaꞋa koména kwenarunkó umbaí kwétowana túwaꞋnaa úwaꞋa kaweꞋá uwaná aamoí éna kwenarunkó kaweꞋá úwana kentáásópaꞋa téna tasimásimuwata iséta mindáyavetaagwaraꞋa aamoiyá kwéune.
14 ááéma Táítási aúrankaꞋa kentúma maé iráunana simátímakaunda-aimbo árair-aimbo siráundantemba Táításimbo kentááimo simámakaunda-aimba árair-aimban-iye. Táítási keinárawate koména kemó kentááimo simámakaunda-aintavena árair-aimba siráiye siráimba mindáyaveꞋa íma sigaeyávéꞋa kwéune. 15 Táítási keinárawate komáyowaꞋa kwentávéꞋa aamoí éꞋa táátaveꞋa éꞋa tiyántámbá kwétowaꞋa kwenáái iséꞋa mirá uwaná mindáyavena Táítási imáyáa éna arumbá kwétimiye. 16 keinárawataveꞋa séꞋa amápaꞋ-mayaimo ésa kaweꞋá úmae iyónááowe kwésunana sirunkó kaweꞋá kwéiye.

Copyright information for `KZE