2 Peter 3

Ísu ókwaraꞋa kumíníye-kwasai.

kesí kwaási arupí-imayaa ígwáe séꞋa moórá-auvai agaimái tímakeꞋa maanáúváígwáráꞋá kwéagayaumne. naaóváꞋá Áánútun-aai simátímakowai sirón-aimba iséꞋa Ísóigo sáwí-imayaavinkemba iyásínkáiwaiya siráin-aimba kwená aantá-kwaasiya simátímakaunda-aimba imáyáa oró. simátíménda imáyáa oró. naaén-kanaa tínímba sáwí-imayaayavesamo tirááíyavesamo ésa aamoí íyan-kwaasi tésa kentuwíráái sésa Ísumo sénamo marapáꞋá kumónaumnemo siráimba náávara máyáiyo. naaóváꞋá kwíyómba maramá taróruronkaꞋa kwáyáin-tantaaꞋa íma óꞋon-tantaaꞋa paárisata kwéawanaumpo kesivoísáíya áꞋa pukuráawana íma óꞋon-tantaaꞋa kwévaariye sénááowe. miwí maarán-ímáyáá ónáe íma kwésewe. naaóváꞋá Áánútu súwana kwíyómba maramá paárúwana nompínkémbá maramá iyéna non-avumpimbá maramá kwéraiye. naaémba Áánútu nonkóntávéna súwana marapá-kwáásí ánásasukaiye. Áánútu sisaná kwíyóne marawémó kwáyáimba póna kwaásimo máyáawaina ááimba tísaa ínín-kanaamo tíndaraꞋa Áánútu kwentávésamo ímo aamoimó ésamo sáwíꞋo kwéowai sáwí-meyamba tiména kwíyóne marawé iravímbá agaisuwáníye.

kesí kwaásiyono. maarán-ímáyáá oró. imó kwétaamba táámpamaiya kwéawanaumpo Áánútu íma mirá imbá amápa-kanaa mimbórá-kánááráámbá aamun-úmarena sáwívar-ima 1,000 ima maréna mimbórá-kánáámán-iye siráivo kwemó marapáꞋó kumónaumnemo siráin-aimba íma tukáisasa évakarawai mináímbá iváꞋá tukáiye-imayaa kwéowe. Ísóigo séna kesí némpaꞋa maíꞋmaiꞋa ésa sáwí-ayampaꞋa kovo séna sáwí-imayaa tuwésa kesópaꞋa tíyantavaiye séna timuꞋmaréna ména íma ááéma marapáꞋá kunkáiye. 10 umóyán-kwáásígómó anompintumáívimbo tintenkáán-umai Ísóigo miráráán-umai kumíníye. minkánáá anónkaꞋa awairái kwésindavinkemba kwíyómba áúyokwinana kwíyómba oꞋá aaváúmá iravímbá agaisuwáínana marapáꞋá amápa-tantaaꞋa kwáyáine marawé iravímbá agaisuwáníye. 11 miráumai amápa-tantaaꞋa ánásanintaveta kesáámó máyaundayaveta imáyáa éta Áánútuntaveta aamoí kwéeta arupí umái méta 12 Ísumo marapáꞋó kumíníntavena siráái kwétaisata amuꞋmaréta méta ááémo kumíndawe séta siyáántán-kwimai Áánútuna mayáí kwémayaundaya póna minkánáá paárinana kwíyómba iravímbá agaisuwáínana oꞋá kwíyómba aaváúmá anón-iravimba agaisuwáínana nonkáámbá umágwiniye. 13 ánivo Áánútu asiramái séna aúná-kwiyone aúná-marawe tarórumaraanana arupí-yantaare suꞋmai kwéniye siráinta amuꞋmaréta máyaumne.

14 kesí kwaásiyono. mirán-kánááyávéꞋa amuꞋmaréꞋa máyáamba Áánútu aúrankaꞋa kaweré suꞋmai umái méꞋa kempímbá íma sáwí-aimba kwáyainaꞋa paru umái ménaaontaveꞋa tiyáántán-kwimai mayáímá máyáaro. 15 kentáásí Ísóigo séna sáwíꞋo umáímo máyáampinkemba iyátinkanaumne séna kwempáꞋá ténááontavena timuꞋmaréna ména ímo kunkáimba imáyáa oró. kentáásí kwaási áwíꞋa Póro Áánútu kawer-ímáyáá kwembá ámakaimpinkemba keinárawatavena imáyáa éna mináímbá agaimakáiye. 16 Póro mináímbó agaimakáimba amápar-auvaivimba mirán-áímbó simáímo agaimakáin-aintompimba évakar-aimba umbaí taisasá ímo ísámaimo kaweꞋó ésamo ímo asiramáímo máyáawai mináínkóná ááimba kwaéꞋmai kampar-áímbá kwésewe. Áánútun-aai aúváí-kwandaaivinkemba amápar-aintavesa mirá ésa mirámó kwésentavesa ávááraumai sáwíꞋa umái ménaaowe.

17 miwí mirá kwéombanivo ímo kunkáinkaꞋa simátimumpo kárákwiyoro. sáwíꞋo kwéowai keinárawaꞋa Áánútuwe asiramái máyáampinkembo tavisíyanesa kwéovo kárákwiyoro. kentáásí Ísóigo Ísu Káráísiti kentáásí sáwí-imayaavinkemba iyásínkáiwai úwoi túwaꞋnaa úmae iyínaꞋa kwenópaꞋa anón-imayaa éꞋa máéro. kwenáwíꞋo aasiyaasimó anómbo umáímo kwaíkwaiꞋo úmaenamo iyínímba árair-aimban-iye.

kemá Pítaamo súnda-aimba kwéanasaiye.

18 

Copyright information for `KZE