Acts 15

YérúsaremuvaꞋa torupamái mésa siráan-kwasai.

Ántíoku-naopaꞋa máyóyasa évakarawai Yútiyaa-maravakemba Ántíoku-naopaꞋa komésa Ísun-aai ísówaiyavesa sésa Áánútumo Mósesimbo simámakon-amaambo ímo iséꞋo túraꞋo kárámaimo araaꞋénamo íyanamo éna Ísóigo sáwíꞋo umáímo máyáampinkemba kawer-ámpáꞋá íma métinkaniye suwasaráí Pórowe Páánápáasiye mináíntáváí áwááꞋa tiyésarai kwesimá kwesiman-esa Ántíokuvakewai Ísun-aai ísówai sésa YérúsaremuvaꞋa aantá-kwaasiye Ísóigona kwaásiti anón-kwaasiye mináíntáváí kotísaa oró sésa Póronte Páánápásinte évaka-kwaasiye tiꞋmárówasa kuráawe.

Ísóigona kwaási tiꞋmárówasa kweémesa Vínísiyaa-maravaꞋa Sámériyaa-maravaꞋa naaóꞋ-naoꞋa komáyówasa Ísun-aai ísówai torupamái máyówai simátimesa sésa óꞋonkaa-kwaasi Ísun-aai isésa áraire sésa kwempáꞋá tésa máyáawe suwasá isésa tirumbá kaweꞋá úwasa naaóꞋ-naoꞋa simátímatuwesa kweémesa Yérúsaremu-naopaꞋa komáyówasa aantá-kwaasiye Ísóigona kwaásiye miwítí anón-kwaasiye tiyáámba kwétimesa aamoí uwasá Áánútumo mayáímó tímakaim-bayaimo mairáan-aimba másimatimuwasa isésa évakarawai Ísun-aaiyavai áraire sumbánivo ámáán-kawaa-kwaasiti aampaꞋá kwéguwai usásinesa sésa óꞋonkaa-kwaasi Ísun-aaiyavai áraire kwésewai Mósesi simátímakon-amaamba isésa túraꞋa kárámai araaꞋéna orómá kosimátíméro suwasá aantá-kwaasiye anón-kwaasiye sésa mináímbá torupamái méta imáyáa umáíya senó siráawe.

suwasá torupamái mésa ayáátáákaꞋa mináímbá suwaná Pítaa usásinena séna kesí kwaásiyono. óꞋonkaa-kwaasi áséi-kwasai isésa Ísun-aaiyavai áraire sígwáe séna ááéma Áánútu keinárawapinkemba usásisinkena siꞋmarówaꞋa kosimátimewanasa isésa áraire siráawe. kemá mináímbá áꞋa ísaraawe. Áánútu amápa-kwaasiti imáyáa tuwánéna óꞋonkaa-kwaasiyavena séna kesí kwaásiman-owe séna kwenamambó símakonten-umai miwímó tímakomba awánaraumne. Áánútu Yútaa-kwaasiya ór-amba íma agaráásinkenaya óꞋonkaa-kwaasi íma ór-amba agaráátinkena kwéivo Áánútu amápa-kwaasiya mimbórá-ámbá kwéagaraasinkaiye. miwí Ísun-aaiyavai áraire sunkákémbá miwítí sáwí-imayaa maitiyuwéna kawer-ímáyáá umátínkaraiye. 10 Mósesin-aaigo kentáá síkwáꞋnáya umbaí tiyówasa íma kanaán-umai kwakáawe. kentáágwáráꞋá miráumai umbaí taisatá íya kanaán-umai kwakáumne. mindáyavai óꞋonkaa-kwaasi Ísuna aampaꞋá kowáíyáváímó Mósesin-aai kwáráaro síyasamo ésa umbai-ámbá kwaránááowe. mirámó íyanamo éna Áánútu áwááꞋa sínaꞋa póꞋa íma mirá ónááowe. 11 Ísóigo Ísu úwoi súwaꞋnaa enaya sáwíꞋo umáímo máyaundavinkenta kawer-ámpáꞋá mégwésinkaintaawe. mináíntáváíyá áraireya sénáisae mirámó kwéintenta óꞋonkaa-kwaasigwaraꞋa mirá kwéiye Pítaa siráiye.

12 Pítaa súwasa isésa amáparawai áraiꞋa siyé sésa íma aaí suwasaráí Pórowe Páánápáasiye Áánútu tímakaim-bayai óꞋonkaa-kwaasivimba mimbáyáí mairááyan-aimba simátimesarai Áánútuna mayáí ímo awánaraam-bayai kaweꞋ-máyáí mairááyan-aimba 13 simátímatuwoyana Yémési séna kesí kwaásiyono. kesáái ísáaro. 14 ááéma Áánútu óꞋonkaa-kwaasiyavena imáyáa éna minkwáásívínkémbá évakarawai usásintinkena séna kesí kwaásiman-owe siráin-aimba Pítaa ívéꞋa simásímakaiye. 15 Áánútun-aai simátímakowai mináímbá aúváí-kwandaaivimba agaimarésa sésa

16 Ísóigo séna naaémba kuméꞋa Tévítina naambá tawísíyukaan-damba kunumásuwanaumne. sáwí-yantaakwaraꞋa kaweꞋá kunumásuwanaunda pósa 17 óꞋonkaa-kwaasi kesópaꞋa ténááowe. kesí kwaásiman-owe sendawáí kesópaꞋa ténááowe séna
18 Ísóigo mináímbá naaóváꞋá sirómba póna ívékwaraꞋa mirá kwésiye Yémési siráiye.

19 Yémési simásuwena séna Ísóigo siráin-aintaveꞋa imáyáa éꞋa séꞋa óꞋonkaa-kwaasi ÁánútumpaꞋa kwéten-kwaasi umbai-máyáí íma timénaumpo 20 aúváíma agaimái timéta séta kampar-ísóígóntáváí imáyáa ésa póíꞋo umándaamba mimpóí íma naaró. aarai-úmóyámbá kwaai-úmóyámbá íma oró. póíma tuvúꞋnewana kwená naaemá ímo kumíndamo úwoimo kwáyáinaꞋa mimpóí íma naaró. naaegwáráꞋá íma naaró. mináímbá aúváí-kwandaaivimba agaimaráúmpo awánaaro. 21 ááémo maémáén-kwaasiye ívéꞋo máyáan-kwaasiye ayáátáákaꞋa aasiyaasí monor-áímbá kwéisaan-kanaaraꞋa mináímbá Mósesin-aai simátímaꞋmaesa kuráawe. mindáyaveta aúváí-kwandaaivimba agaimaráúmpo awánaaro Yémési siráiye.

aúvái agaimái óꞋonkaa-kwaasi tímakaan-kwasai.

22 súwasa aantá-kwaasiye Ísóigona kwaásiye miwítí anón-kwaasiye sésa kanaám-pota kentáávímbá évakarawaiye tiꞋmáráanasaya Pórowe Páánápáasiye ÁntíokuvaꞋa kwíyapaꞋa miwísé kónááowe sésa miwítí avumpinkémbá kae-kwáásí túwíꞋa mósá makáan-kwaasirai túwíꞋa tombá moóráwai áwíꞋa Sáírási úwana moóráwai kaer-áwíꞋá Yútásiye Paasapasíyé umái 23 aúvái timésa tiꞋmárówasa kurá. mináúváívímbá agaimarésa maará sésa kesáá kentí kwaásiya úne. aantá-kwaasiye anón-kwaasiye moórá-aimba sénaumpo kentáásí kwaási ísáaro. óꞋonkaa-kwaasi Ántíoku-naopaꞋa Síriyaa-maravaꞋa Sírísiyaa-maravaꞋa máyáan-kwaasi ísáaro. 24 kentáávínkémbá évakarawai kentópaꞋa kwésa ímo simátímakaunda-aimba miwítí imáyáavinkemba kosimátímúwaꞋa iséꞋa tirumbá sáwíꞋa úwaꞋa umbaí taráanta iséta 25 torupamái méta imáyáa éta mimbórá-áímbá simái kae-kwáásí usásintinketa tiꞋmaráúnasaya Páánápáasiye Póroe migóiye. mindárai kesí kwaásiya siruntá tímakaundanaraiye sínkamiyakai puwúyavo-imayaa íma ésarai Ísóigo Ísu Káráísitina mayáí kwémayauye-imayaa ésarai asiramái kwémayaaiye. 27 Yútásinte Sáírásinte tiꞋmaráúnasarai migóíyamba pósarai aúváívinken-ainkwara simátimeyaaoi-ainkwaraꞋa mimbórá-áímbá pósarai kosimátimeyaaoiye. 28 Áánútun-amankowe kesááwé mimbórá-áímbá simáíya íma umbai-áímbá simátimumpo maanáúváívínkén-áímbá simátimundaya ísáaro. 29 kampar-ísóígóntáváí imáyáa ésa póíꞋo umándaamba mimpóí íma naaró. naaemá íma naaró. póímo tuvúꞋnewana kwená naaemó ímo kumíndamo úwoimo kwáyáinaꞋa mimpóí íma naaró. aarai-úmóyámbá kwaai-úmóyámbá íma oró. kesáámó súnda-aimbo éꞋo éꞋa kaweꞋá ónááowe. mináímbá ánásaiye. aúváíma agaimái timésa siráawe.

30 suwasá mináúváímá timésa tiꞋmárówasa maimaésa kweémesa Ántíoku-naopaꞋa kuwasá Ísóigona kwaási torupamái máyówasa mátímúwasa 31 mináúváí-kwándááívínkémbá táápamai simátímúwasa kawer-áímbá isésa tirumbá kaweꞋá úwasarai 32 Yútásiye Sáírásiye Áánútun-aai simátímakoyan-kwaasi ayáátáákaꞋa simátimesarai miwítí imáyáa arupí umátímúyasa isésa asiramái máyówasarai 33 miwísé évakaꞋ-noꞋwaamba máyóyasa Ísun-aai ísówai sésa áꞋa kanaán-ivo tiꞋmákaan-kwaasitopaꞋa kawer-áímbá kosimátímékaiyo suwaná 34 Sáírási óꞋon-imayaa éna mindáópaꞋa máyowasarai 35 Pórowe Páánápáasiye ayáátáákaꞋa ÁntíokuvaꞋa mésarai mindáraiye évakarawaiye mésa Ísóigon-aai simátímaꞋmaesa kuráawe.

Pórowe Páánápáasiye tarákaaꞋa urááyan-kwasai.

36 naaémba Póro Páánápáasintavena séna naaóꞋ-naoꞋa Ísóigon-aaimo simátímakauyamba Ísun-aaimo ísaraawai kawerá umáíya máyáawa tuwánámaekai kóyauye Póro súwana 37 Páánápáasi séna Yóni Máákaamba áíꞋmekai kóyáe súwana 38 Póro séna kweséya téwáyana Pámpíriyaa-maravaꞋa kenkáí másiyuwena kwená naaópaꞋa tayauweréna kuráimba pókai íma áíꞋmekai kóyauye Póro súwasarai 39 mináíntáváí kayorésarai aaisambá simásuwesarai mindárai tarákaar-uyaná Páánápáasi Yóni Máákaamba áíꞋmaena nompí-sípí tátoꞋmai usáatesarai kweémesarai Sáíparasi-maravaꞋa kuyaná 40 Póro séna ke Sáírásimba airánaumne súwasa Ísun-aai ísówai námúnaa simásuwesa sésa Ísóigo úwoi kaweꞋá umátinkanivo kokaiyó suwaná Sáírásimba áíꞋmaena kúmba 41 Síriyaa-maravaꞋa Sírísiyaa-maravaꞋa naaóꞋ-naoꞋa kwénaaesarai Ísóigona kwaási túwaꞋnaa úmaesarai kuyasá kaweꞋá umái méraawe.

Copyright information for `KZE