Acts 25

Póro aiva-káwáánákónópaꞋa kónaumne siráin-kwasai.

Póro ándávaꞋa máyowana Vésétasi mináyámpáꞋá Sísáriyaa-naopaꞋa taména kaumbo-nóꞋwáámbá tagwaimái tuwéna YérúsaremuvaꞋa umáyowasa Yútaa-anon-kwaasiye mono-káwáá-kwáásíyé kwenópaꞋa tésa sésa Pórombo simánkaraundantenta óta simánkanae sésa súwaꞋnaa e Póromba kunaiꞋmárénana YérúsaremuvaꞋa iyíno. mináímbá sumbá évakarawai aampaꞋá kárákwiresa inkamíyanesa-imayaa ésa mináímbá suwaná Vésétasi séna Póro Sísáriyaa-naopaꞋa ándávaꞋa máyáiye. kemá sáwíyankaꞋa kumónaumpo keinárawapinkemba anón-kwaasi kesé kwégumesa Póro sáwíꞋo uráinda-aimba síyaꞋa ísáano simásuwena Vésétasi avakaumboé-noꞋwaanaꞋi. siyáánkai-noꞋwaanaꞋiyo. kwaéna Sísáriyaa-naopaꞋa kumbéna usá aaváyaavimba aaimó ísón-daumpaꞋa uména Póromba koáíꞋmae teró súwasa koáíꞋmaesa tuwasá Yútaa-kwaasi Yérúsaremuvakemba kúmúwai Póromba kunúkúmare mésa áúiyaain-aimba simánkówana Póro miwí táái anondá simátimena séna kemá íma Yútaa-kwaasiti ámáámba káráreꞋa anóm-bonoꞋ-namba íma sáwíꞋa éꞋa Árómáani-kamaani-kwaasiti ámáámba íma káráraumne Póro súwana Vésétasi Yútaa-kwaasi tirumbá kaweꞋá ínkwáe séna Póromba áísaa ena séna Yérúsaremuvara íyínara simánkaraan-aimba ísámai kawer-ónaumno súwana 10 Póro séna ímaniye. Árómáani-kamaani-aiva-kawaanakona kwaási ómpo kesáái ísámai kaweꞋán-uwo. Yútaa-kwaasiti ámáámba ímo káráraunda áꞋa suwánaraane. 11 ámáámbo káráreꞋo sáwíꞋo uráundarakai tuvuwónáemo sembá íma aꞋáo súsino. úwoi sínkamosino. simásínkáan-aimba íma árair-aimba póꞋa íma iyónaumpo Árómáani-kamaani-aiva-kawaanakonopaꞋa konaná kesáái ísámai kaweꞋá íníye Póro súwana 12 Vésétasi iséna kwená kawer-ímáyáágwárá-kwáásíyé aaí simásuwena Pórontavena séna Árómáani-kamaani-aiva-kawaanakonopaꞋa kónáe sénda póꞋa aiꞋmáráana kwíníyone Vésétasi siráiye.

Póro Ágárípante Pénáisinte simátímakain-kwasai.

13 Vésétasi simásuwena máyowana naaémba moóráwai Yútaa-anon-kwaasi áwíꞋa Ágárípa úwana ámánaanko áwíꞋa Pénáisi úwana mindárai Sísáriyaa-naopaꞋa kumésarai Vésétasi kámááni-kawaa-mayai mairóntavesarai kwenópaꞋa kumésarai ayáámba kwéamesarai 14 évakaꞋ-noꞋwaamba kwáúyana Vésétasi Ágárípaamba Póron-aai simámena séna Vírísíki moóráwaimba íma ayúnránkáimba úwoi ándávaꞋa ánkáísana máyáiye. 15 YérúsaremuvaꞋa umáyaawandaraꞋa Yútaa-kwaasiti anón-kwaasiye mono-káwáá-kwáásíyé kesópaꞋa tésa kwembó simánkaraan-aimba sésa tuvuwó suwaꞋá 16 simátimeꞋa séꞋa moórá aosaambá kwáyáinasa mináósáámbá ísáíyuwesa tínkamonaaovo Árómáani-kwaasi íma úwoi tínkamonaaowe. moóráwaimba aaivimbó mayánkéwana túrankaꞋa ména miwí anondá aaí simátiminasa Árómáani-kwaasi mirámó sínda-aimba kaweꞋá umái isánááowe. Árómáani-kwaasiti ááimba mirán-áímbán-iye. simátimewanasa 17 kúmúwaꞋa íma úwoi méꞋa usá aaváyaavimba aaimó sií-náúmpáꞋá uméꞋa Póromba ááyaawanasa áíꞋmae íyúwasa 18 kwembó simánkaraan-kwaasi usásinowaꞋa sáwíꞋo uráinda-aimba sénááowe-imayaa ówánasa 19 kentááiye suꞋmai sésa moóráwai áwíꞋa Ísu pukáiwaintavai sésa Póro séna kwemá usásinena úwoi máyáiye siráin-aintavai aaisambá siráawe. 20 kemá séꞋa nóraumai mináínkóná ááimba isánaumno séꞋa Póromba áísaa eꞋa séꞋa Yérúsaremuvara íyínara simánkaraan-aimba ísámai kawer-ónaumno séwánana 21 Póro séna ímaniye. ándávaꞋa máyaunasa kárákwiraamba póꞋa Árómáani-kamaani-aiva-kawaanakonopaꞋa konaná kesáái ísámai kaweꞋá íníye súwaꞋa kárákwiraan-kwaasiyavai séꞋa kárákwimai kaweꞋá uréwana aambá paárínaꞋa aiꞋmáráanana kwíníye siráumne 22 Vésétasi súwana Ágárípa séna mindákón-áái isánáe súwana séna ánivo aaváyaa isáníyone Vésétasi siráiye.

23 súwasarai Ágárípaawe Pénáisiye kwairóyamba usá aaváyaavimba usásinesarai kawer-únánkwátói úmaesarai i-kwáásítí anón-kwaasiye mindáópaken-anon-kwaasiye aánoumai íyúyasa amáparawai kwétuwanowasarai aaimó sií-náúmpáꞋá íyúyana Vésétasi Póromba ááyowasa áíꞋmae íyúwana 24 Vésétasi séna anóndako Ágárípaemo máyáan-kwaasiye ísáaro. Yérúsaremu-naopakewaiye maankákéwáíyé Yútaa-kwaasimo aaimó maankwáásímó simánkaraamba awánaaro. tuvuwíyana puwínomo anónkaꞋo símae iráamba 25 avakáá úmaeꞋa iyúnda íma sáwíꞋa uráimba póna íma puwíníye. Árómáani-kamaani-aiva-kawaanakonopaꞋa kónaumne siráintaveꞋa aiꞋmáráanana kwínímba 26 kemó aúváímo agaimáímo aménaunda íma kwáyáiye. mindáyavai mamáyáan-kwaasivimba Ágárípa aúrankaꞋa máankaunda po kwemó sínda-aimba isé simásímínaꞋa aúvái agayánaumne. 27 ándávaꞋo máyáin-kwaasimo úwoimo aiꞋmaréꞋo simánkaraan-aimbo ímo aúváívimbo agaimáímo aménaunda uwóvíꞋa ónaumne Vésétasi siráiye.

Copyright information for `KZE