Acts 3

Pítaa aísamaima kaweꞋá umánkarain-kwasai.

moórá-kwaasi anówa maránkarompinkemba aísamaima pukurón-kwaasi máyowasa aasiyaasi-táwai áíꞋmaesa anóm-bonoꞋ-nankona ontaráꞋá áwíꞋa kawer-óntáráꞋá móankarowana ména anóm-bonoꞋ-naumpaꞋo íyún-kwaasiyavena óntantavai inaainaaí sún-kwaasi máyonkaꞋa anóm-bonoꞋ-naumpaꞋa Pítaae Yóniye íyúyana aaváúmá toraétáápaꞋa kúwasa námúnaa kwésen-kanaaraꞋa íyúyana tuwánéna séna óntamba símékaiyo súwasarai túramba kararésarai Pítaa séna kenkáí suwánaao suyaná siméyááoiye-imayaa éna tuwánówana Pítaa séna íma óntamba makáumpo Ísuna asirayándéí kaweꞋá umánkanaumne. Ísu Káráísitima Násáretivakewaina asirayámbá kwáyáintaveꞋa séꞋa usásine naauwó súne Pítaa séna ayáánúrapaꞋa tátoꞋmai usásinankowana aísaumba aísána kaweꞋá úwana usásinkwena tokávara taúvaraaꞋa éna aamoí éna Áánútu áwíꞋa mósá kwémarena mindáraiye anóm-bonoꞋ-naumpaꞋa kweyááríkaꞋa marapáꞋá iyéna Áánútu áwíꞋa mósá marówasa amáparawai awánésa 10 sésa miwá aasiyaasi-táwai anóm-bonoꞋ-nankona kawer-óntáráꞋá ména óntan-inaai síma-simaꞋa indáꞋán-iye sésa táátavai ésa kweyááríkaꞋa marapáꞋá kwéiyuntavesa tiyáámba tuvimpín-ésa táátavai uráawe.

Pítaa simátímakain-kwasai.

11 kweyááríkaꞋa kwéiyena aamoí éna Pítaante Yóninte tineꞋá tátorowasa amáparawai táátavai ésa miwítópaꞋa tóyo ésa anóm-bonoꞋ-naumpaꞋa Sórómoni áúgwimai úmakopaꞋa tóyo uwaná 12 Pítaa tuwánéna séna Ísareri-kwaasiyono. mintántáátáváí íma tááꞋa kaíno. íma túramba kenkáí arááꞋa sivuwóro. íma kenkáísí asirayánkó kaweꞋá umái arupí umái mékai kwéuvo 13 Áánútuna asirayánkó mirá kwéisana minkwáásí kweyááríkaꞋa kwénaaiye. mirá uráintavai Áánútu Ísu áwíꞋa mósá maréna kentáá síkwáꞋná Ááváramu Áísákaa Yákópo miwítí Ísóigoma kwená kwayóꞋnákó áwíꞋa Ísumba póna mósá makáiye. ánivo Ísumba áíꞋmaeꞋa Árómáani-kamaani-kawaanako áwíꞋa PáírátinopaꞋa máánkarowana Páíráti séna ayúrankanae súwaꞋa aꞋáo siráawe. 14 kawe-kwáásí arupí umái máyon-kwaasiyaveꞋa aꞋáo séꞋa moórá-kwaasi inkamúwana puwúwasa ándávaꞋa áúkon-kwaasiyaveꞋa ayúrankaao siráawe. 15 mirá uráantaveꞋa aúnáiꞋa umái maíꞋmaiꞋa ónááowaina ááin-kwaasi kemá tuvúwana pukáimpinkemba Áánútu usásinankowakai awánarauye. 16 awánarauyawai Ísuna asirayánkó aísamaima pukón-kwaasi kaweꞋá umánkaraiye. Ísuna asirayántávéna áraire siráimba isaná minkwáásí kaweꞋá umái kwénaaisaꞋa kwéawanaawe Pítaa siráiye.

17 Pítaa mináímbá simásuwena séna keinárawate kentí kawáánárawate íma awánamai Ísumba kawer-uréꞋa tuvukáawe. 18 naaóváꞋá Áánútu kwenáái simátímakowaiyavena séna simátimeꞋa séꞋa kemó usásinankaundawaimba sáwíꞋa umánkanaaowe Áánútu siráinkaꞋa póna keinárawaꞋo Ísumbo uráamba mináímbá paáruraiye. 19 mindáyaveꞋa kentí sáwí-imayaa tínaaemba umásuweꞋa ÁánútunopaꞋa tíyana póna Áánútu kentí sáwí-imayaa maitiyuwáníye. 20 moórá-mora-tawai Ísóigo kwená asirayámbá timínaꞋa kwesé ménaaontaveꞋa kentí sáwí-imayaa tuwéꞋa ÁánútunopaꞋa teró. Áánútuma túwaꞋnaa ínkwáe séna usásinankaiwaimba Ísumba aiꞋmaráínana kumíníntaveꞋa kentí sáwí-imayaa tuwéꞋa ÁánútunopaꞋa teró. 21 Ísu kwíyómpaꞋa umáyáimba póna naaén-kanaamo éna amápa-tantaaꞋa aúnáiꞋo índa-tawai ókwaraꞋa marapáꞋá kumíníye. naaóváꞋá Áánútu mináímbá simátimuwasa Áánútun-aai ísón-kwaasi kawe-kwáásí isésa simátímakaawe. 22 Áánútun-aai simátímakowai áwíꞋa Mósesi séna Áánútu kentí Ísóigo kembá kesí mayáí mayaaó séna siꞋmákainten-umai Áánútun-aaimo simátiminiwaimba keándárakemba moóráwaimba aiꞋmaráínana kwenáái simátiminasa isánááowe. 23 ímo isáíyawaimo éna Áánútu kwená kwaásivinkemba tíꞋmaena moórávaꞋo tinkáindawai ánásanaaowe Mósesi siráiye. 24 Áánútun-aai simátímakowai áwíꞋa Sámúwéri kwemá simátímakonkaꞋa naaén-kwaasi simátímíntemba mai-simátímaꞋmaesa iyémáyáamba kwévaariye. 25 naaóváꞋá Áánútu kentáá síkwáꞋná áwíꞋa Ááváramuntavena séna enándáraken-kwaasiyavena amápaꞋ-marava-kwaasi kaweꞋá umátinkanaumne Áánútu asiramái siráiye. Ááváramun-andaraken-kwaasi owaná póna keinárawatavena Áánútu mináímbá asiramái siráiye. 26 miráumai Áánútu Ísuntavena kesí mayáí mayaaó séna aiꞋmarówana keinárawapimba kunkáiye. amáparawai kentí sáwí-imayaa tínaaemba umásuwaiyana aivaꞋá keinárawaꞋa kaweꞋá umátinkanintavena keinárawapimba kunkáiye Pítaa Ísareri-kwaasiyavena simátímakaiye.

Copyright information for `KZE