Colossians 3

Áánútu keinárawaꞋa usásitinkena Ísu KáráísitinkaꞋa tarútinkena aúnáiꞋa umátínkaraimba póꞋa kwíyómpaken-tantaataveꞋa imáyáa éꞋa aamoí éꞋa Káráísiti Áánútu ayáánúrapaꞋa asirayán-áyámpáꞋá máyáin-ayampaken-tantaataveꞋa imáyáa éꞋa aamoí oro. púwón-kwaasimo imáyáamo ímo ontembá keinárawaꞋa miráumai marapákén-tántááꞋá íma imáyáa oro. Ísu Káráísitiyemo tarúmaimo máyáamba Áánútu miráumai kwentáváí asiramái maígwáe séna kwégarakwiyiye. mindáyaveꞋa marapákén-tántáátávéꞋa íma imáyáa éꞋa kwíyómpaken-tantaataveꞋa imáyáa úmae íyóro. Ísu Káráísiti aúnáiꞋa umái máyáawaina ááimba póꞋa kumíndaraꞋa kwesé méꞋa óꞋora-sagayan-ayampaꞋa ménaaowe.

aúnáiꞋa umátínkávaꞋa kwéiyiye siráin-kwasai.

mindáyaveꞋa ánásanintaveꞋa sáwí-yantaataveꞋo tirááíyaveꞋo kwéowanamo kwéyavisin-tantaaꞋa túwáaro. mindá maarán-tántááꞋán-iye. áwáyo-tantaaꞋo kwéowaine tigaeyávéꞋo kwéowaine sáwí-yantaataveꞋo tirááíyaveꞋo kwéowaine túran-andamo kwéowaine mirámó kwéomba túwáaro. túran-anda kwéowai marapá-tántáátávésa aamoí ésa íma Áánútuntavesa aamoí kwéomba túwáaro. Áánútun-aai íma ísámai kaweꞋá kwéesa mirá-sáwíꞋá kwéomba póna Áánútu áwááꞋa séna sáwí-meyamba timíníye. ááéma mirá-sáwí-ámbá kwaréꞋa miráumai méraawe.

miráumai máyómbanivo ívéꞋa tínaaemba umáméro. mindá maarán-tántááꞋán-iye. áwááꞋa kwésewaiye aaisambá kwésewaiye tíyámba kwéumatinkaawaiye simái sáwíꞋa kwéumatinkaawaiye sáwí-aimba kwésewaiye mirán-tántááꞋá tínaaemba umáméro. sáwí-kwaasi méꞋa mirá-sáwíꞋá uráambanivo áꞋa ivátuweꞋa aúnáiꞋa umái méꞋa Áánútumbo kaweꞋó umáímo awánanaaontavena kwenkááníꞋa umái aúnáiꞋa umátinkena miráumai aúnáiꞋa umátínkávaꞋa kwéiyivo keinárawapinkemba kampar-áímbá íma seró. 11 Áánútu mirá uráintavena maarán-áímbá íma aivar-áímbán-iye. évakarawai Yútaa-kwaasi owasá évakaꞋa óꞋonkaa-kwaasi owasá túraꞋo kárámaimo araaꞋénamo kwéowai owasá évakaꞋa ímo túraꞋo kárámaimo araaꞋénamo kwéowai owasá anón-umipaken-kwaasi owasá óꞋon-kwaasiti mayáíráꞋá meéyámbakaan-kwaasi owasá úwoimo máyáan-kwaasi owasá mirá kwéovo mináímbá íma aivar-áímbán-ivo Ísu Káráísiti aivaríꞋa umái ména kwená kwaási amáparawaivimba máyáiye-aimba aivar-áímbán-iye.

12 Áánútuna kwaási-iꞋa owaná arumbá kwétimena ítámarena séna kendéín-owe siráimba póꞋa maará íyasa tuwánanaaowe. tiruntavéꞋa éꞋa kaweꞋá umátinkeꞋa kentúma íma maé iyéꞋa paru umátinkeꞋa umbai-yántááꞋó kwáyáimpimba asiramái máyáamba íma ivátuweꞋa 13 íma ááéma áwááꞋa séꞋa évakarawaimo sáwíꞋo umátínkémba íma imáyáa éꞋa anondá mirán-oro. Ísóigo kentí sáwí-imayaamo maitiyuwéna ímo anondámo sáwí-meyambo tímíntemba keinárawaꞋa mirán-oro. 14 mirámó kwéomba keinárawapimba amáparawaivimba tirumbá kwétimeꞋa mirámó éꞋo éꞋa mimbórá-ímáyáá kwéeꞋa minámápár-áíntávéꞋa kaweꞋá umái ménaaowe. 15 mimbórá-ákúníꞋa umái méꞋa paru umái ménaaontavena Áánútu ítámakaimba póꞋa Ísu Káráísitimo parumó umátínkáimba kentáásirumpimba kwaíkwaiꞋa ínkwáe-imayaa éꞋa súwi seró. 16 Ísu Káráísitina óꞋoran-kawer-ainko kentirumpimbá anómba íno. keinárawapimba kawer-ímáyáávínkémbá kwenáái mósimam-besimamba úmae kwéiyeꞋa arupí umátinkeꞋa ÁánútumpaꞋa súwi kwéseꞋa Áánútun-aai aúváívimba agaimakáan-aimba séꞋa monor-ímá séꞋa Áánútun-amanko simátímakain-ima séꞋa ÁánútuntaveꞋa tirumpimbá aamoí kwéeꞋa imá seró. 17 mayáímó kwémaeꞋo aaimó kwésemba Ísóigo Ísuna asirayándéí mirá kwéeꞋa kwemá keinárawate máyáintaveꞋa Áánútu kentáásivompaꞋa súwi seró.

aarakwáré tírááꞋmaare miwítí kwaasái.

18 aaraiyómbá ísáaro. Ísóigondeiman-ovo kentuwaiꞋmáá táái ísáaro. 19 kwaaí ísáaro. kentuwainímbááꞋa tirumbá kwétimeꞋa íma sáwíꞋa umátinkeꞋa kaweꞋá umátínkáaro. 20 iyámpóí-inaamaru ísááro. amápa-tantaataveꞋa kentinóvowi táái ísáaro. mirámó íyanamo éna Ísóigo aamoí íníye. 21 iyámpóí tivoísái ísáaro. kentí iyámpóímo arupí umátinkanaemo kwésemba kentí iyámpói íma kaweꞋá úmaesa íyóvo-imayaamo éꞋa úwoisan-aimpinkemba simái kaénáaro.

22 évakarawai miwítí mayáí mayáígwáe sésa meéyámbakaawai ísáaro. amápa-tantaataveꞋa kentí anón-kwaasi táái ísáaro. miwí túrankaꞋa aamoí umásinkaigwae suꞋmaiyaveꞋa íma mirán-káwéꞋá éꞋa úwoi-kanaagwaraꞋa mirán-káwéꞋá éꞋa ÍsóigontaveꞋa táátavai-imayaa kwéeꞋa kentí anón-kwaasiti mayáíyávéꞋa íma kaer-ímáyáá éꞋa kaweꞋ-máyáí máyáaro. 23 mayáímá kwémaeꞋa séꞋa kesí anón-kwaasiti mayáíyé suꞋmai ímanivo Ísóigona mayáí-kwáásíyá úne séꞋa kaweꞋ-máyáí kwémaeꞋa karuwaaꞋá oro. 24 mirámó kwéomba maarán-áímbá imáyáa oro. Ísóigo kwená kwaásiyavena toꞋmayaa úmakaimba mimbéyámbá timíníye. Ísóigo Káráísiti kentí anóndako úramba ména kentí meéyámbá tiména 25 sáwíꞋo uráawai sáwí-meyamba timíníye. íma taaínkaar-umai-meyamba timínívo arupí umai-meyamba timíníye.

Copyright information for `KZE