Galatians 3

ámáán-aimba kwarésa Ísun-aaiyavai áraire sésa kwéon-kwasai.

Kárésiyaa-maravaken-kwaasi sáwí-imayaa kwéowai ísáaro. Ísu Káráísitimba tuvúwúwana pukáin-aimba avoraꞋá simátímakaunda ísómba túrandeiraaniꞋa umái awánéꞋa kaweꞋá umái ísaraambanivo évakarawai tésa kentí imáyáa tavisewaꞋá uwoꞋaór-ímáyáá kwéowe. moórá-aimba tísaa ónaumne. ámáámbo kwakáantavaiyaꞋi. áséi-kwasaiyaveꞋa áraire siráantavaiyaꞋiyo. Áánútun-amanko kentirumpimbá máyáiya imáyáa oro. áséi-kwasaiyaveꞋa áraire siráantavena Áánútun-amanko tirumpimbá máyáiye kwésundanivo íma kawer-ímáyáá kwéowe. Áánútun-amanko kentirumpimbá máyáísaꞋa póꞋa aúnáiꞋa iígómbá ááimba ásáreꞋa ívéꞋa imáyáa kwéomba Yútaa-kwaasiti ámáánko arupí umásinkaniye-imayaa kwéeꞋa íma kawer-ímáyaá kwéowe. kawer-ámbó kwakáamba kentópaꞋa tiráin-tantaaꞋa íma úwoisan-tantaaꞋan-iye. Áánútu kwenamankómbá aiꞋmarówana kentirumpimbá kumbáyáísana Áánútu keinárawapimba óꞋon-oꞋom-bayaimo ímo awánaraam-bayai mairáiye. ámáámbo kwakáantavena íma mirá éna áséi-kwasai iséꞋa áraire siráantavena mirá uráiye.

naaóváꞋá Áánútun-aai aúváí-kwandaaivimba agaimaréna séna Ááváramu Áánútun-aaiyavena áraire siráintavena Áánútu séna arupí umái máyaane siráimba miráumai Ááváramu siráintemba Áánútun-aaiyavesa áraire kwésewai Ááváramu árááꞋmaaꞋan-owe. naaóváꞋá Áánútu imáyáa éna séna naaémba óꞋonkaa-kwaasi kesááiyavesa áraire sénááowaiyaveꞋa séꞋa arupí umái máyáawain-owe sénaumne. Áánútumo ímo mirámó uráinkaꞋa moóráwai aúváívimba áséi-kwasai agaimaréna séna Áánútu Ááváramuntavena séna ená imáyáa éꞋa amápaꞋ-maravaken-kwaasi kaweꞋá umátinkanaumne siráiye agaimaréna siráiye. mindáyavena naaóváꞋá Áánútu Ááváramumba kaweꞋá umánkaraintemba kwenááiyavesamo árairemo kwésewai kaweꞋá kwéumatinkaiye.

10 naaóváꞋá Áánútun-aai aúváívimba agaimaréna séna

agaimakáin-amaampinkemba amápar-amaamba ímo kwaꞋmaé iyónááowai Áánútumpakemba miwítí
sáwí-meyamba mayánááowe
agaimaréna siráiye. mindáyavena ámáámba kaweꞋá umái kwáráanana Áánútu aamoí íníye kwésewai miwítí sáwí-meyamba kwáyáiye.
11 naaóváꞋá aúváívimba agaimaréna séna

Áánútu arupí umái máyáawai owémó siráiwai kwenááiyavesa árairemo siráantavesa pósa
aúnáiꞋa umái máyáawe
agaimaréna siráiye. mindáyavena Áánútuma ámáámbo kwaránáemo sewáíyávéna íma arupí umái máyáawain-owe séna kwenááiyavesa árairemo sewáíyávéna arupí umái máyáawain-owe kwésiye.
12 moórávaꞋa agaimaréna séna

ámáámba amápar-amaambo kwaránááowai
miwímá ménaaowe
agaimaréna siráiye. mindáyavesa ámáámbo kwarésamo Áánútun-aaiyavesa áraire sésamo kwéomba íma mimbórá-yántááꞋán-ivo kae-tántááꞋán-iye.

13 moórávaꞋa agaimaréna séna

taairaꞋó tínkamowasamo púwón-kwaasi Áánútumpakemba sáwí-meyamba maésa kwévuwowe
agaimaréna siráiye. mináíntávéna amápar-amaambo ímo kanaán-umai kwakáundayavenaya Áánútumpakemba kentáásópaꞋa sáwí-meyamba tivó séna Ísu Káráísiti iyásinkenaya misáwí-méyámbá maéna pukáiye.
14 Áánútu Ááváramuntavena séna amápaꞋ-maravaken-kwaasi kaweꞋá umátinkanaumnemo siráintemba óꞋonkaa-kwaasi kaweꞋá umátinkanintavena Ísu Káráísiti kentáásí sáwí-meyamba maéna pukáiye. kwenááiyaveta árairemo kwésundawaiya Áánútumo siráintemba kwenamankó kentáásirumpimba ménintavena Ísu Káráísiti iyásinkowana Áánútu kentáásí sáwí-meyamba íma siménaya kwembá amúwana pukáiye.

Áánútu simái tarúmakain-aine Mósesimbo simámakain-amaane minkáé-kwásáí.

15 kesí kwaásiyono. kwaásimo kwéomba imáyáa oro. kaeꞋnárai mimbórá-áímbá simái tarúmaresarai agaimakááyamba moóráwai mináímbá íma karéna óꞋon-aimba áúgwimai síníye. 16 miráumai naaóváꞋá Áánútu Ááváramuntavena simái asirámakain-aimba siráinkaꞋa Ááváramuntavaiye aísaavutantamba éna naaémba paáriniwaintavaiye siráiye. aúváívimba agaimaréna séna aísaavutantambo ónááowaiyavena íma siráivo aísaavutantambo íníwaintavena siráiye. aísaavutantambo íníyemo siráiwai Ísu Káráísitiman-iye. 17 agaimaráúnda-ainkona ááimba maarán-iye. aivaꞋá Áánútu Ááváramuntavena simái tarúmarena séna asirámakaunda-aimba mirá ónaumne séna sáwívar-ima 430 ima maisuwéna Mósesimba ámáámba ámakaiye. ánivo mirámó uráinkaꞋa Áánútu Ááváramuntavenamo simáímo tarúmakain-ainko íma ánásena kwaíkwaiꞋa kwéiye. 18 Áánútumo Mósesimbo simámakain-amaambo kwaráúndayavenaya ímanivo Áánútu kaweꞋá umátinkanaumnemo ááémo asiramáímo siráintavena kaweꞋá kwéumasinkaiye. Áánútu Ááváramuntavena kaweꞋá umánkanaumne asiramái siráintavena kaweꞋá umánkarena póna kentáá kaweꞋá kwéumasinkaiye.

19 maarán-áíntávéna Áánútu Mósesimba ámáámba ámakaiye. sáwíꞋo owáímá Áánútuna ámáámba isésa sésa sáwíꞋo kwéunda ívéꞋa isáúmne sénááontavena Áánútu Mósesimba ámáámba ámakaiye. minámáámbá kwáyainana Ááváramu aísaavutantamba íníwai kwentávénamo Áánútumo simáímo asiramánkaraiwai paáréna minámáámbá ánásasuwaniye. kwíyómpaken-kwayoꞋnarawaꞋa Áánútuna ámáámba avumpin-kwáásí Mósesimba simámúwana simátímakaiye. 20 ánivo Áánútu Ááváramuntavenamo siráimba kweyáá siráiye. kaeꞋnáraimo kwéseyamba avumpin-kwáásí ména kwésimatimimbanivo Áánútu Ááváramuntavenamo siráimba kweyáá siráiye.

21 Áánútuna ámáánko Áánútumo simáímo asirámakain-ainko íma kwéavararaiye. Áánútu Mósesimba simámakain-amaankomo asiramáímo kwénamo kwaásimo aúnáiꞋo umátínkáinkakai minámáámbá kwégwaraawaiyavena Áánútu séna arupí umái máyáawain-owe sisinó. 22 ánivo Áánútun-aai aúváí-kwandaaivimba agaimaréna séna sáwí-imayaao amápa-kwaasi tátokaiye siráiye. Áánútu séna Ísu Káráísitin-aaiyavesa áraire kwésiyawaima kaweꞋá umátinkanaumne simáímo asirámakain-aimba siráintemba Ísu Káráísitin-aaiyaveta áraiꞋa kentáásí sáwí-imayaao tátokaimpinkemba iyásinkaiye kwésundawainta kaweꞋá kwéumasinkaiye.

23 Ísu Káráísiti ímo kunkówata ímo kwenááiyaveta áraire kwésewandarata Áánútu Mósesimbo simámakain-amaanko kentáá tátokowana Káráísiti kunkáinkaꞋa kwenááiyaveta áraire kwésunda-amba Áánútu kwégwisinkena ámáánko kentáá tátokain-amba ánásasinkaraintaawe. 24 Áánútu séna Ísu Káráísitin-aaiyavesa áraire síyawaiyavena arupí umái máyáawain-owe sénaumne súmba póna Ísu Káráísiti ímo kunkónkaꞋa Áánútu Mósesimbo simámakain-amaanko kentáá tátokaiye. 25 ívéꞋa Ísu Káráísiti áꞋa kunkáimba kwenááiyaveta áraire kwésunanaya póna Áánútu Mósesimbo simámakain-amaanko kentáá óꞋomba íma kwétatoraiye.

26 Ísu Káráísitin-aaiyaveꞋa áraire kwéseꞋa kwesé tarúmai máyáantaveꞋa Áánútuna iyámpóín-owe. 27 keinárawaꞋa nombá péráamba Ísu Káráísitiye tarúmai máyáawai kwenkááníꞋa kwéowe. 28 Ísu Káráísitiye tarúmai máyáantaveꞋa mimbóráíꞋa umái máyáamba póna maarán-áímbá íma anón-aimban-iye. évakarawai Yútaa-kwaasi owaꞋá évakarawai óꞋonkaa-kwaasi owaꞋá évakarawai meéyámbakaawasa miwítí mayáí úwoi kwémayaawai owaꞋá évakarawai úwoimo máyáawai owaꞋá kwaaimá owaꞋá aaraimá owaꞋá kwéovo amáparawai mimbóráíꞋa umái máyáawe. 29 Ísu Káráísitina kwaásimo éꞋo éꞋa Ááváramumo uráintemba Áánútun-aaiyaveꞋa áraire kwésemba póꞋa Ááváramu aísaavutantamba uráawai ombá póna Áánútu Ááváramuwe aísaaavutantamba ónááowaiye kaweꞋá umátinkanin-aimba simáímo asirámakaintemba kaweꞋá umátinkaniye.

Copyright information for `KZE