Hebrews 10

Mósesimo siráin-amaankona aambá íma aan-úramban-ivo Ísu Káráísiti kaweꞋá kwéumatinkaiwaina aankóná amaankóꞋnaankaan-amban-iye. miráumai moórá-mora-iraꞋa monoꞋ-máyáí-kwáásí póí tuvúꞋmái Áánútumba ámakaamba mirám-báyáígó ÁánútumpaꞋa tiráan-kwaasi íma arupí umátínkaraiye. póímo tuvúꞋmáímo Áánútumbo ámakaan-anko kaweꞋó umátínkarainkakai Áánútuna imáyáa mósá makáawai miwívímbá sáwí-aimba íma kwáyowasa sáwí-yantaatavesa íma umbaí tésa íma úwoi póí tuvúꞋmái Áánútumba ámaꞋmae iráasino. ánivo maará kwéowe. purumakankóná naaeówé mémeona naaeówé íma kanaán-umai sáwí-imayaa maitíyukaimba pósa moórá-mora-iraꞋa póí tuvúꞋmái Áánútumba ámakonkaꞋa miwítí sáwí-mayaigotavesa imáyáa uráawe.

miráumai Ísu Káráísiti marapáꞋá kumíndayavena kwéena Áánútuntavena séna

  • póímo tuvúꞋmáímo embó ámakaane toómbó ámakaane íma embá arááíma kwétaivo kemá embá arááíma táíndaiꞋa ónaundayavai súma toꞋmayaa umásínkaraane.
póímo agaisukáantavai íma aamoí kwéone. sáwíꞋo uráantavesamo póímo tuvúꞋmáímo ámakaamba mindáyavai íma aamoí kwéone simásuweꞋa séꞋa enáái aúváí-kwandaaivimba kentávéna simái agaimaréna séna Áánútuwo kemá méꞋa embá aráái táíndaiꞋa umái ménaumne simái agaimakáintemba kwéune kwésune Áánútuntavena Ísu siráiye. aivaꞋá Ísu Káráísiti séna ámáámbo siráinten-umai póíma tuvúꞋmái ámakaamba toómbá maimái ámakaamba póíma agaisukáamba sáwíꞋo uráantavesa póíma tuvúꞋmái ámakaambanivo minámbá íma arááíma kwétaisa aamoí íma kwéone simásuwena séna Áánútuwo kemá méꞋa embá aráái táíndaiꞋa umái ménaumne siráiye. mindáyavena Ísu Káráísiti póímo tuvúꞋmáímo Áánútumbo ámakaunda-anta ivátuwena aúná-amba Áánútumbo arááímo táínda-imayaamo kwaránaunda-anta agaráátínkaraiye. 10 Ísu Káráísiti Áánútuna imáyáa kwaréna Áánútumba kwenáúma aména mimbórá-táwai pukáimba póna sáwí-imayaaya maisiyuwénaya ÁánútundeiꞋia umásínkaraintaawe.

11 aasiyaasi-táwai monoꞋ-máyáí-kwáásí usásimbai mimbórá-máyáí maésa póí tuvúꞋmái Áánútumba ámakaamba mimbáyáígó íma kanaán-umai sáwí-imayaa maitíyukaimbanivo 12 Ísu Káráísiti mimbórá-táwai Áánútumba kwenáúma aména pukáiye. sáwíꞋo uráantavenawe sáwíꞋo ónaundayavenayaawe puwéna mimbáyáí ánásasuwena Áánútu ayáánúrapaꞋa asirayán-áyámpáꞋá maraꞋá uména 13 Áánútumo kwená namuro-kwáásímó tínkaminanamo kwemó usáyaaitanintavena amuꞋmaréna umáyáiye. 14 miráumai Áánútumba kwenáúma ámakaimba pósa Áánútundei-iꞋa kwéumatinkain-kwaasi kasenkuíꞋa úmae iyónááowe.

15 mináíntávéna Áánútun-amanko avoraꞋá simásimuwana Áánútun-aai aúváí-kwandaaivimba agaimaréna séna

16 
  • Ísóigo séna moórá-kanaa tínaꞋa aúná-aimba
  • simái tarútinkaandaraꞋa kesí ámáámba tirumpiné
  • imáyáavine timénaumne siráiye.
17 moórá-ainkwaraꞋa séna

  • miwítí sáwí-imayaawe ámááne káráraamba íma mindáyaveꞋa imáyáa úmae iyónaumne siráiye
agaimaréna siráiye.
18 Áánútu sáwí-imayaa maitiyuwéna íma imáyáa úmae íyísana póna sáwíꞋo uráantavesamo póímo tuvúꞋmáímo Áánútumbo ámakaan-amba ánásaiye.

Áánútunopata íyóno siráin-kwasai.

19 miráumai kesí kwaásiyono. Ísu Káráísiti puwúwana kwená naaemá kumúwana kentáásí aambá kwikáimba póta íma sáátaveta éta Áánútuna aokaꞋ-náúmpátá kwéiyune. 20 puwéna Áánútumba kwenáúma ámakaintavena aúná-amba kwaíkwaiꞋa ínín-amba agaráásinkena Áánútuna aokaꞋ-náúmpáꞋá mósá arátukon-ampaanta awásámai aambá kwiꞋmái Áánútunopata iyónaunda-amba agaráásínkaraimba mindáyavetaawe 21 kwemá anóm-bonoꞋ-mayai-kwaasigo Áánútuna kwaásiraꞋa kárákwiraimba mindáyavetaawe 22 Áánútunopata íyóno. kentáásí sáwí-imayaaya maisiyúwáísanaya kentáásirumpinta íma aaí kwáyáísata kaweꞋ-nóntá peréta kwenááigonta sirumpintá tátoreta Áánútuwe aráápamai asiramái méta Áánútunopata íyóno. 23 Áánútun-aai árair-aimban-iye séta póta asiramáíya tátoreta íya ivátuweta Áánútumo kaweꞋá umátinkanaumne siráintemba mirá ínímba póta kwenáái asiramáíya tátoreta amuꞋmaréta méta miráyá onó. 24 kesáá imáyáaya kwéeta moórá-morawai túwaꞋnaa umai asirayáné imáyáawe timéta kaweꞋ-máyáíyá kwémaeta miráyá onó. 25 Áánútuntaveta imáyáa éta torupamái maíꞋmaiꞋa úmae iyéta évakarawaimo torupamáímo maivár-íyúmbo ivátukaantemba kesáá íma mirá éta torupamái maíꞋmaiꞋa úmae iyéta moórá-morawaiya asiramátinkanaumne. Ísu Káráísitimo kumínímba sáwíyan-kanaa kwáyáintaveta moórá-morawaiya asiramátinketa miráyá onó.

26 maísáaro. Áánútuna árair-aimba iséta tátoketa kentáásí imáyáavinkembo kwembó sínaaembo umámetaamo sáwíꞋo úmaetaamo íyónanayaamo éna Áánútu sáwí-imayaaya maisiyuwáníntavena óꞋon-amba íma kwáyáivo 27 sáátaveta kwéonanamo Áánútumbo tínaaembo umámiyantavenamo sáwí-meyambo timínasa anón-iravimbo káúgonaaontaveta amuꞋmaréta ménaumne. 28 Mósesi timún-amaambo arááíraawai aaivimbá usásintinkaresa kaumbo-káé-kwaasimo tuwánésamo sésamo áraiꞋa mirá kwéowe sésamo ésa íma tirumbá umátinkaiyamba tínkamiyasa puwónááomba 29 mindá umbai-yántááꞋán-ivo Áánútu ááninkomba tínaaemba umámémba mindá anón-umbai-yantaaꞋan-ivo Áánútu simái tarúmakonkaꞋa Ísu Káráísitina naaemá kumúwasa sáwíꞋo umbá maitíyukaimba mindáyavesa sésa úwoisan-tantaaꞋan-iye síyawai anómba sáwí-meyamba mayánááowe. Áánútun-amanko úwoimo súwaꞋnaa iwáíntávésa simái sáwíꞋa umánkaraawai anómba sáwí-meyamba mayánááowe. 30 maarán-áímbó siráimba mindá Áánútuma póna maará séna

  • anondá meéyámbá timénaunda mindá kendéímán-iye. sáwí-mayaiyaveꞋa meéyámbá timénaumne
séna moórá-ainkwaraꞋa séna

  • Ísóigo kwená kwaási tísaa umai iséna
  • taaínkaaꞋa umái-meyamba timíníye
siráiye.
31 Áánútu asirayánkwáráwáí póna tíkena sáwí-meyambo timínímba mindá anómba táátavesa ónááovo ÁánútuntaveꞋa imáyáa éꞋa torupamái maíꞋmaiꞋa úmae iyéꞋa moórá-morawai asiramátinkanaaowe.

32 ááéma Áánútu keinárawatavena sáma kamátinkonkaꞋa umbai-yántááríꞋa umátinkowaꞋa íma ivátuweꞋa asiramái méraavo mindáyaveꞋa imáyáa oró. 33 moórá-mora-tawai amáparawai túrankaꞋa sáwíꞋa umátinkesa simái sáwíꞋa umátínkómbanivo asiramái méꞋa moórá-mora-tawai kentí kwaásimo sáwíꞋo umátínkómba túwaꞋnaa úmae íyúwasa keinárawakwaraꞋa sáwíꞋo umátínkómba asiramái méraawe. 34 Áánútuna kwaási-iꞋo unkákémbá keinárawapinkemba évakarawai ándávaꞋo mótínkómba tiruntávéꞋa umátínkówasa kentí náaindaambo tavíyááví umbá íma imáyáa éꞋa séꞋa usáyaaitarain-tantaaꞋa kwíyómpaꞋa kwáyáimba póta maíꞋmaita ónaumne suwaná tirunkó kaweꞋá uráiye.

35 mirá uráavo ÁánútuntaveꞋa asiramái méꞋa kaweꞋ-méyámbá kwémayaawe. 36 Áánútuna imáyáavinkeniꞋa éꞋa kwemó mirá umátinkanaumnemo siráin-tantaaꞋo mayánááontaveꞋa asiramái maíꞋmaiꞋa úmae iyíyana íma tívón-kaíno. 37 mindáyavena Ísu Káráísitimo kumínímba amuꞋmaréna ména Áánútun-aai aúváí-kwandaaivimba agaimaréna séna

  • sáwíyan-kanaa kwáyáimba póna
  • tíníwai íma úwoi ména tíníye.
agaimaréna siráiye. moórávaꞋa agaimaréna séna

38 
  • kesí kwaásigo arupí umái máyáiwai kesé
  • aráápamai máyáimba póna inkaisénamo siyuwénamo
  • kówínaꞋo éꞋa íma aamoí umánkanaumne siráiye
agaimaréna siráiye.

39 mináímbá siráimbanivo kesáámá inkaisésamo auwésamo kówésamo ánásanaaon-kwaasiraanta íya éta Áánútun-aaiyaveta áraire séta kwenkáꞋá agevamáíya méta kaweꞋá umáíya maíꞋmaita ónaumne.

Copyright information for `KZE