Hebrews 9

naaóváꞋá aivaꞋ-mónó-káwáánákó purumakaná naaemá Áánútumba ámaꞋmae iyúwana Ísu kwená naaemá ámakain-kwasai.

naaóváꞋá Áánútu aivaꞋá simái tarúmakain-aimba kwáyompinkemba Áánútuna imáyáa mósá kwémaraan-aimba kwáyowasa Áánútuna imáyáa mósá kwémaraan-damba úmakaawe. ampaanta-námbá úmakesa moórá-ampaantama avumpimbá ítámakesa mósá arátukopatavesa Áánútuna aokaꞋ-náúmpáré sésa móruna arátukopatavesa kawer-úran-ayampare sésa mimpímbá oómbá kúraꞋmai marésa taareí úmakesa mintááréíráꞋá Áánútuna péréti-tomba marésa mósá arátukon-daumpatavesa Áánútuna aokaꞋ-náúmpáré sésa mimpímbá kóri-ontandei úmakaan-taarei marésa mintááréíráꞋá áséi-kwiyumba ún-kanama kwéagayesa kawer-ánáveumba úmaresa kóri-ontan-kwandaainei minánáveumba ánáan-kwimaresa mimpímbá kóri-ontandei úmakaan-anaveumpimba naaóváꞋá kwíyómpakembo marapáꞋó kunkáin-tonko áwíꞋa máána-tomba minánáveumpimba maꞋmái minkáwé-ánáveumpimba marésa naaóváꞋá Áánútu kwená mayáíráꞋá Érónimba usásinankowana kwená tááúnkakemba áruma kwíkáin-taumba minánáveumpimba marésa naaóváꞋá Áánútumo Mósesimbo simámakain-amaambo siyáánkai-amaambo óntan-kwandaairaꞋo agaimakón-kwandaai kae-kwándááí minánáveumpimba marésa kae-tántááꞋá ayóígwárá-tántáákáí anón-kaweꞋa úmaresa sésa Áánútuna ááimba óꞋoran-aainko póna sáma kaiyé kwésuwana mintántáákáígó ayóígóráámbá minánáveumba káátena Áánútumo miwítí sáwí-imayaamo maitiyúwáin-anaveumba káátaraiye. mindáyaveꞋa ívéꞋa íma ayáátáár-aimba agayáúmne.

mirá úmakesa aasiyaasi-táwai monoꞋ-máyáí-kwáásí mimbónóꞋ-nánkómbá móruna arátukon-ayampaꞋa irésa mayáí kwémayombanivo moórá-mora-iraꞋa moórá-tawai morá-tawai Áánútu aokaꞋ-náúmpáꞋá aivaꞋ-mónó-káwáánákó iréna póígona naaemá maimaéna iréna kwemó sáwíꞋo úntavenawe kwaásimo ímo tááꞋo isésamo sáwíꞋo untávénawe mirá-sáwíꞋó kwéomba maitiyuwáníntavena mindááémá Áánútumba ámakaiye. mirá éna Áánútun-amanko maarán-umai kwéagaraasinkaiye. monoꞋ-nánkómbó móruna arátukaapaꞋo kwáyomba Áánútuna aokaꞋ-náúmpáꞋá kwenópaꞋa iyónááon-amba íma avoraꞋá kwéraiye. mintántááꞋá umásítaiꞋa umái ívétaamo máyaunda-kwaasiya kwéagaraasinkaiye. Áánútuna imáyáa mósá makón-kwaasi póí tuvuwésa toómbá maimaésa umái Áánútumba ámakaambanivo miwí tirumpinkén-ímáyáá íma kasenkuíꞋa umátínkaraiye. 10 miráumai minámpáꞋá toóné noné kwénesa nombá kwéveresa kwéomba túyavesawe sésa mirá kwéuwana Áánútu aúná-amba agaráátinkowana ááéraan-amba ánásaraiye.

11 mirá uráambanivo Ísu Káráísiti aivaꞋ-mónó-káwáánákó ívéꞋa kwáyáin-amba kawer-ámbá agaráásinkena monoꞋ-máyáí kwémayain-daumpaꞋa mindámbá íma marapáꞋá kwaási úmakaan-damban-ivo usáyaaitarain-damba kasenku-námbán-iye. 12 mimbórá-táwai Ísu Káráísiti Áánútuna aokaꞋ-náúmpáꞋá kwíyómpaꞋa Áánútu máyopaꞋa iyúmba monoꞋ-máyáí-kwáásígómó mémeona naaewé purumakan-áráákóná naaewé maimaénamo iráintemba íma mirá éna kwená naaemá maimaéna iyéna sáwíꞋo umáíyaamo máyaundavinkenta siráínata aúnáiꞋa umáíya maíꞋmaiꞋa ónaundayavenaya mirán-umai pukáiye. 13 mémeona naaewé purumakankóná naaewé anááé-árááꞋá purumakan-árááꞋó agaisukáampinken-kanaowe Áánútu aúrankaꞋo sáwíꞋo uráan-kwaasi tinepimpáꞋá ayáútinkavaꞋa kwéesa miwí túma kaweꞋá umátínkówana Áánútu tuwánéna séna kaweꞋán-iye siráiye. 14 mémeona naaenéíyé purumakankóná naaenéíyé mirá uráambanivo Ísu Káráísitina naaeómá usáyaaitaraiye. kwempímbá íma sáwí-aimba kwáyáiwai Áánútun-amanko maíꞋmaiꞋa kwéiwai kwesé máyáintavena kwená naaemá kumúwana kwenáúma Áánútumba ámakaiye. sáwíꞋo kwéowaina ááinko tátokaimpinkemba iyásinkainanaya kentáásirumpimba íma aaí kwáyainata Áánútuna mayáí mayánaundayavenaya kwená naaemá kumúwana kwenáúma Áánútumba ámakaiye.

15 mindáyavena ááéraan-aimba simái tarúmakonkaꞋa sáwíꞋo uráampinkemba iyátinkaindayavena Ísu Káráísiti pukáiye. mindáyavena Ísu Káráísiti aúná-aimba simái tarúmakomba póna Áánútumo asiramáímo séna kaweꞋó umátínkáandamo kwaíkwaiꞋa íníye siráimba Áánútumo kwétaayain-kwaasi mayánááowe.

16 kwévuwesamo ombá kwaaróꞋá tumái tarúmaresa kwévuwowe. moóráwai puwíndayavena kwéena kwená náaindaamba mayánááon-aimba kwésivo úwoi máyaindaraꞋa íma mayánááovo puwínasa áraiꞋa púwiye sésa mayánááowe. 18 miráumai naaóváꞋá Áánútu aivar-áímbá simái tarúmakonkaꞋa Mósesi póí tuvuwúwana puwúwana mimpóígóná naaemá kunkáintavena Áánútu simái tarúmakonkaꞋa 19 aivaꞋá Mósesi amápa-kwaasivimba Áánútuna ámáámba amápaꞋa simátímatuwena purumakan-áráákóná naaevímbá non-úramba atímakena méme-ayauma tamayókaꞋa úsúmarena mindááévímbá tuꞋmái Áánútun-aai agaimái makáan-auvai-kwandaairaꞋa tuvimpín-úmarena kwaási tinepimpáꞋá mirá umásuwena 20 séna maandááémá umásítaiꞋa umái agaráátinkaumpo Áánútumo simáímo tarúmakain-aimba asirayán-áímbá kwáyáivo ísámai kaweꞋá oró séna 21 miráumai mindááémá Áánútuna imáyáa mósá kwémaron-dankaꞋa tuvimpín-úmarena mindáúmpáꞋó kwáyon-tantaakaꞋa mirá úmakaiye. 22 áraiꞋa Áánútuna ámáánkona ááimpaꞋa naaeómá amápa-tantaaꞋa kaweꞋá umátínkáísana moóráwaiyaꞋi. póíyaꞋi. ímo púwísanamo kwená naaemó ímo kúmínkakai Áánútu sáwí-imayaa íma maisiyúwáísino. naaemá kunkáimba póna Áánútu kentáásí sáwí-imayaaya kwémaisiyuwaintaawe.

Ísu sáwí-imayaaya maisiyuwáníntavai pukáin-kwasai.

23 Áánútuna imáyáa mósá makáan-dane mindáúmpáꞋá kwáyon-tantaare maarámán-iye. kwíyómpaꞋo kwáyáin-dane mindáúmpáꞋó kwáyáin-tantaare miwá amankóꞋnaankaan-damban-iye. mintántááꞋó marapáꞋó kwáyon-tantaakaꞋa póígona naaenéí kaweꞋá umátínkówana mindá kaweꞋá uráambanivo kwíyómpaken-tantaakaꞋa íma póígona naaenéín-ivo usáyaaitaraiwaina naaenéí kaweꞋá kwéumatinkaiye. 24 miráumai Ísu Káráísiti kwíyómpaꞋa iyéna Áánútu aúrankaꞋa uména kentááyávénaya imáyáa éna Áánútumba kwéaisaa-iye. úmakaan-damba naan-úrankona amaankóꞋnaankaan-damba ímanivo kwíyómpaꞋa uména kentááyávénaya imáyáa éna Áánútumba kwéaisaa-iye. 25 moórá-mora-iraꞋa moórá-tawai Áánútuna aokaꞋ-náúmpáꞋá aivaꞋ-mónó-káwáánákó póígona naaemá maimaéna íyóiyo uráintemba Ísu Káráísiti íma mirá éna mimbórá-táwai kwená naaemá maimaéna móamakaiye. 26 Ísu Káráísitimo miráumaimo maimaé íyóiyo urénaraankasi kwíyóne marawé taróruronkakemba moórá-mora-iraꞋa moórá-tawai morá-tawai puwípuwiꞋa úmae íyísino. íma mirá éna ááéraan-kanaa sáwíyankaꞋa ánásonkaꞋa marapáꞋá kuména sáwí-imayaaya maisiyuwáníntavenaya mimbórá-táwai pukáiye. 27 kentáásí kanaamó tínataamo puwónaundaya kesáámó máyaundawaina ááintavenaya sísaa íníntaawe. 28 miráumai sáwívarawaiti sáwí-imayaa maitiyuwáníntavena mimbórá-táwai Ísu Káráísiti puwéna Áánútumba kwenáúma aména ókwaraꞋa kuména íma sáwí-imayaa maitiyuwáíndayavena kumínívo kwéamuꞋmaraan-kwaasimo kuntiráíndayavena kumíníye.

Copyright information for `KZE