James 4

marapá-tántáátávésa imáyáa kwéon-kwasai.

keinárawapimbo aaisambó séꞋo áwááꞋo séꞋo mirámó kwéomba miwáná ááimba maará kwéiye. sáwí-yantaakomo tirááímo taintávéꞋa imáyáa owaná minímáyáágómá tátoraisana aaisambó sií-áímbá kwévaariye. tirááímo tain-tántááꞋó makáawaꞋo ombá tuvúwónana puwínaꞋa kemá mayánáe-imayaa kwéowe. óꞋowiti náaindaamba túran-anda éꞋa íma kanaán-umai mayánááontaveꞋa aaisambá tiyéꞋa áwááꞋa kwésewe. tirááímo tain-tántáátávéꞋa ÁánútumpaꞋa íma áísaa owaná póna íma kwétimiye. ÁánútumpaꞋo áísaa ombá áísaa on-tántááꞋá íma kwétimiye. sirááímo tain-tántááꞋá kesáváí mayánáe séꞋa ÁánútumpaꞋa áísaa ombá misáwí-ímáyáá tokáantavena íma kwétimiye. aaraimó kwaairakémbó tiyuwésamo óꞋon-kwambo máyáantemba Áánútumbo auwéꞋo kwégon-kwaasiyono ísáaro. marapá-tántááꞋó imáyáamo eémeꞋo éꞋa Áánútuna namuro-kwáásíráámbá kwéovo mináímbá imáyáa oró. marapá-tántááꞋá mayánáe símae iyíyawai Áánútuna namuro-kwáásíráámbán-owe. Áánútun-aai aúváí-kwandaaivimba agaimaréna séna

  • Áánútu séna kesimambá kempímbá maráúnda
  • sáwíꞋan-ovo séꞋa asiramái kwégarakwiyune siráiye
agaimaréna siráimba mináímbá íma úwoi-aimban-ivo árair-aimban-ivo imáyáa oró.
ánivo Áánútuna imáyáa úndayavenaya súwaꞋnaa umáíya kwéasiramasinkaintaawe. Áánútun-aai aúváí-kwandaaivimba agaimaréna séna

  • Áánútu kentúmo maimaé kwéiyowai kwétuwentayuwaivo kwenaísamaivimba kwémaewai kwétiravayaiye
agaimaréna siráimba póna Áánútu súwaꞋnaa umáíya kwéasiramasinkaintaawe.

mindáyaveꞋa Áánútun-aai iséꞋa kwenaísamaivimba máyáaambanivo Sáátáánigon-aaiyaveꞋa aꞋáo síyanamo éna ááéma tiyuwéna kówinaꞋa Áánútuna egwaaꞋó méwanamo éna Áánútu kentí egwaaꞋá méniye. sáwíꞋo kwéowai kaweꞋó umáímo ménaaontaveꞋa imáyáa éꞋa misáwí-yántááꞋá túwáaro. Áánútuna imáyáawe marará-ímáyááwé tokáawai sáwí-imayaa tuwéꞋa kawer-ímáyáá oró. sáwíꞋo kwéontaveꞋa íma aamoí éꞋa kanagíꞋá kwéteꞋa máéro. sáwíꞋo kwéontaveꞋa íma kwírááima síyamba tóiꞋa matuwéꞋa máéro. sáwíꞋo kwéontaveꞋa tirunkó íma kaweꞋá éna sáwíꞋa kwéinaꞋa máéro. 10 Ísóigon-aai iséꞋa kwenaísamaivimba méwana kwemá mósá tinkáníye.

11 kesí kwaásiyono. kentí kwaásiyaveꞋa keíyái íma sáwí-aimba seró. Áánútu ámáán-aimpimba séna íma mirán-oro siráimba póꞋa mirámó kwéomba Áánútuna ámáámba simái sáwíꞋa umánkeꞋa séꞋa sáwí-amaamban-iye sembá mindá kampaꞋá kwésewe. Áánútuna ámáámbo taaínkaar-uréꞋo séꞋo sáwíyan-amaane anón-amaane kwéseꞋa minámáámbá íma kaweꞋá umái kwaréꞋa kwéaraaisuwaawe. 12 Áánútu kweyáá ámáámba siménaya kwaási kwétaainkaar-ena kanaán-umai kweyáá kawer-ámpáꞋá mégwétinkena kweyáá kwaási ánásasuwaniye. mindáyaveꞋa kwaási keyááríkaꞋa íma taainánááovo Áánútuna mayáímán-iye.

ímo túmo maimaé iyí-kwásáí.

13 keinárawaꞋa imáyáa éꞋa séꞋa ívéraꞋi. aaváyaawaꞋi. anón-daopaꞋa koméꞋa mayáí kwémaeꞋa moórá-ima maisuwéꞋa sáwívar-ontamba mayánaumne. mirán-áímbó kwésewai ísáaro. 14 aaváyaavimbo ainámbó sáwíyankaꞋo kwénamo ááémo turákwintemba keinárawaꞋo máyáamba miráráán-umai ááéma ánásanaaowe. aaváyaa kentópaꞋo tínín-tantaaꞋa íma ísaraawe. 15 mindáyaveꞋa kwésen-aimba íma ókwaraꞋa séꞋa maará seró. Ísóigomo owémó sínaꞋo éꞋa mirá ónaumpo ímo owémó sínaꞋo éꞋa íma mirá ónaumne seró. 16 mirán-áímbá kwéseꞋa kentí imáyáavinkemba kentúma maimaé kwéiyeꞋa anóniꞋa umái ménae kwésemba mirán-ímáyáá sáwí-imayaaman-iye. 17 miráumai ísáaro. kaweꞋó iígóná ááimba ísámai ivátuwesa mirámó ónááomba sáwíꞋa ónááowe.

Copyright information for `KZE