John 12

Máríyaa Ísu aísamairaꞋa áséi-kwiyum-basawemba pékain-kwasai.

Mátíyu 26:6-13, Mááka 14:3-9

tíyótaasa í-tánón-kánáámá sáwíyankaꞋa túwana avaꞋmoraé-kanaa úwoi kwáyowana Ísu Pétáni-naopaꞋa kwéna pukómpinkemba usásinankarowai áwíꞋa Árásárásina naaópaꞋa kúwasa Ísuna toómbá agaimarówana Ísuwe Árásárásiye toómbó naíváꞋá máyóyana Mááta mintómbá maimái tímaꞋmaena kúwana Máríyaa áséi-kwiyumba úm-basawemba anón-ontankakemba meéyámbakena Ísu aísamairaꞋa sáwívaꞋa atímarena kwenaꞋnóntáunei uwaúwana mimbásáwén-kwíyúnkó anónkaꞋa naaúmpaꞋa iyúwana moóráwai áwíꞋa Yútási Isakéríóti séna nóra sénawa mimbásáwémbá ivátuwena anón-ontamba 300 kina mairéna ímo óísambo makáan-kwaasi taaín-timiyo séna mináímbó siráimba Ísuna kuntaruꞋó mayáníwaima séna íma óísan-iyaain-kwaasiti imáyáa éna séna kwemá Ísuna kwaásiti óntankaꞋa kárákwirondaꞋa umóyándáꞋá póna minóntámpínkémbá mayánáe séna mináímbá súwana Ísu séna minínímbá aúwéwana úwoi máíno. púwónanamo pésinkanintavena mirá kwéiye. ímo óísambo máráán-kwaasi keséma maíꞋmaiꞋa kwéiyaꞋa túwaꞋnaa ónáe séꞋa túwaꞋnaa ónááombanivo kemá keséma marapáꞋá íma maíꞋmaiꞋa ónaumne Ísu siráiye.

Árásárásina ámááyu-aimba siráan-kwasai.

súwasa Pétáni-naopaꞋa Ísu máyáiye sumbá sáwíva-kwaasi Yútaa-kwaasi isésa Árásárási pukówana usásinankarowainte kotuwánanae sésa kuráa. 10 Árásárásimba usásinankarontavesa pósa Yútaa-kwaasima miwítí anón-kwaasi tiyuwésa Áánútunopakemba kunkáiwainopata kónáe sésa suntaváí mono-káwáá-kwáásí Árásárásina ámááyu-ainkwaraꞋa siráawe.

Ísu Yérúsaremu-naopaꞋa kuráin-kwasai.

Mátíyu 21:1-11, Mááka 11:1-11, Árúku 19:28-40

12 tíndauraamba áséi-masawemba pérankomba póna ívékaamba YérúsaremuvaꞋa Ísu kwétiyemo sumbá kwaásiyomba isésa 13 taayánáma ayáiresa aampakémbá kogwéairesa anónkar-anonkaꞋa sésa Ísóigo aiꞋmáráísana kunkáiwaimba Áánútu kaweꞋá kwéumankaiye. kwená Ísareri-kwaasiti kawáánáꞋán-iye kwenáwíꞋa mósá kwémaraumne suwaná 14 moórá-poima áwíꞋa tónkigo Ísumba ayááꞋmaena túmba 15 naaóváꞋá Áánútun-aai aúváívimba agaimaréna séna

  • Sáíyono-naopaken-kwaasi tááꞋa kaivó kentí kawáánáꞋá kwétiye. naanté-tónkígó ayááꞋmaena kwétiye
agaimarénamo siróntemba miráumai Ísu tiráiye.
16 mitáwai kwená kwayó-kwáásí íma imáyáama umái táákaꞋa makómba pósa Ísu pukómpinkemba kwíyómpaꞋa iyúnkaꞋa táákaꞋa marésa sésa aúváívimba kwáyáinkaꞋa póna mirán-iye siráawe. 17 Ísuma Árásárási pukómpinkemba usásinankomba awánésa évaka-kwaasi simátímúwasa 18 isésa mindáyavesa pósa aampakémbá koáírówasa 19 mono-káwáá-kwáásí iséise esa sésa amáparawai kentáámá siyuwésa kwenarááíye suꞋmai kwégwaraavo nóraya ónaumno siráawe.

Kíríki-ayampaken-kwaasi Ísumba awánanae siráan-kwasai.

20 Yérúsaremu-naopaꞋa monor-áímbá isánáe sésa Yútaa-kwaasi kuwasá Kíríki-kwaasiye kwésa 21 Vírípima Káríri-ayampaꞋa Pétésáítaa-naopaken-kwaasigonopaꞋa tésa sésa Ísumba awánanaeta túne suwaná 22 Vírípima Éndarumba kosimái áíꞋmaesarai Ísumba kosimámúyana 23 Ísu séna kemá kwaási úrandaꞋa kumpaáruraundawaimba póna kesúwíko anómbo índayavena ívéꞋa kwévaariye. 24 áraiꞋa simátimeꞋa séꞋa ánáyumbo úwoimo kwaíndamo éna íma arambá iyánívo ayumbá uꞋmáráawana aáyánkarena áruma kwiréna sáwívar-aramba imái ávu káníye. 25 mirámó ontembá tirááímo táíndaiꞋo ésa íma kaweꞋá umái ménaaovo maambárárákén-ímáyáámó tuwáíyawai aúnáiꞋa umái maíꞋmaiꞋa ónááowe. 26 kentávésa ená mayáímá mayánáe síyawai kesínaaemba kwáráaro. mirámó íyawai kesé ménaaowe. kesí mayáímó mayáíyawaima kesivo kentúwíꞋa mósá maráníye Ísu siráiye.

Ísu kwemó puwúntavena siráin-kwasai.

27 Ísu simásuwena séna kesirunkómá umbaiyé taimbá póꞋa nóra sénaumno. kesivoó maanúmbáí-yántááꞋó kesópaꞋo tínímba maisiyuwaaó íma mirá sénaumpo kemá mindáyaveꞋa kunkáumne. 28 kesivoó enáwíko anómba íníye súwana kwíyómpakemba aaí séna áꞋa kesúwíꞋa anómba uráunda póꞋa moórágwaraꞋa ónaumne súwasa 29 máyón-kwaasiyomba isésa évakarawai sésa kwíyónaai siyé suwasá évakarawai sésa Áánútuna kwayóꞋnáꞋá kwíyómpakewai aaí kwésimamiye suwaná 30 Ísu simátimena séna mináímbó isáámba íma kembá kwésuwaꞋnaa-ivo kembá kwétuwaꞋnaa-iye. 31 marapá-kwáásímó aaivimbó maitinkáín-kánáámá kwétiye. marapá-kwáásítí sáwí-kawaanaꞋa kwatiyuwánín-kanaama kwétiye. 32 taairaꞋá mói sinkánááon-tawaima amáparawaima imáyáama tíménasa kesópata ténááowe Ísu séna 33 mirámó siráimba taairaꞋá inkamíyana puwíníntavena súwasa 34 kwaásiyomba isésa sésa Áánútun-aai aúváívimba agaimaréna séna Áánútumo usásinankaiwaima aasiyaasí maíꞋmaiꞋa íníye siráivo emó sénda kemá kwaási úrandaꞋa kumpaáruraundawaimba pósa taairaꞋá mói sínkamiyaꞋa puwónaumne sémpo emá nááwa se ewá seénó suwaná 35 Ísu séna kwaási sáma kamátinkainaꞋa úndanivo sáwíyankaꞋa kesé ménaumne. kwaásimo túnín-ayampaꞋo kombá náávaraꞋi kwégowasa pósa íma kwéawanaawe. túnín-tantaako kesópaꞋa tivó séꞋa sáma kamátinkaipaꞋa máéro. 36 sáma kaimbá póꞋa kentávéꞋa séꞋa kentáásí ságayandaꞋa óne sembá póꞋa ságayanko árááꞋmaaꞋa aúꞋmái ménaaowe Ísu siráiye.

Yútaa-anon-kwaasi Ísuntavesa íma áraire siráan-kwasai.

Ísu simásuwena tiyuwéna aúpáꞋá méraiye.
37 túrankaꞋa kaweꞋ-máyáí íma awánaraan-awaameꞋa uráimbanivo kwentávésa íma áraiꞋa Áánútunopakemba kunkáiye siráawe. 38 mindáyavena naaóváꞋá Áánútun-aai simátímakowaima áwíꞋa Áísáya siráin-aimba áraiꞋa súmba

  • Ísóigoo kawer-áímbá kosimátimunasaya mináíntávésa íma áraire kwésewe. ená asirayámbá agaráátinkaandamanivo íma kwéawanaawe
Áísáya agaimaréna siráiye.
39 Ísun-aaiyavesa íma áraire suntavéna naaóváꞋá Áísáya agaimaréna séna

40 
  • Áánútuma túramba kavítúwáísasa
  • pósa túramba íma kwéawanaawe.
  • Áánútuma tááꞋa kaúntinkaisasa
  • pósa íma kwéisaawe.
  • Áánútumo simbá mirá uráunda
  • pósa kesópaꞋa íma tíyaꞋa sáwí-imayaa
  • maitiyuwéꞋa kaweꞋá umátinkanaumne
Áánútu siráiye Áísáya agaimaréna séna
41 Ísuna ságayamba awánomba póna mináímbá agaimaréna siráiye.

42 Yútaa-anon-kwaasi évakaꞋa Ísuntavesa áraiꞋa Áánútunopakemba kunkáiye sésa ámáán-kawaa-kwaasi monoꞋ-náúmpáꞋá íyóvo sésa aambá áúmbaraavainiye sésa íma avoraꞋá sumbá 43 Áánútuma kesúwíꞋa mósá maráínkwáe-imayaama ímanovo kwaási évakarawai kesúwíta mósá maráígwáe-imayaama ésa mirán-ímáyáámá umbá pósa Ísuntavesa áraire íma avoraꞋá siráawe.

Ísu simátimuwasa taaínkaaꞋa uráan-kwasai.

44 íma avoraꞋá suwaná Ísu anónkaꞋa séna kesááiyavesa áraire sésa kenkáꞋá agevamái máyáawai íma kentáváíyé suꞋmai kwésevo siꞋmákaiwaintavaigwaraꞋa áraire kwésewe. 45 kesí ááimbo suwánaawaimo ombá íma kené suꞋmai kwésuwanaavo siꞋmákaiwainkwaraꞋa kwéawanaawe. 46 marapáꞋó kumúnda kwaási sáma kamátinkainaꞋa únda pósa kenkáꞋá agevamái máyáawai íma túnín-ayampaꞋa ménaaowe. 47 kesááima ísámai íma kaweꞋá kwéowai aaivimbó maitinkáima íma kemá úne. marapá-kwáásí íma aaivimbá maitínkáandayaveꞋa kumúndanivo sáwíꞋo umáímo máyáampinkemba kawer-ámpáꞋá métinkanaeꞋa kunkáumne. 48 naaén-kanaaraꞋa kesáái isésa tínaaemba umásinkaiyawai sésa kawer-áímbá sínaaemba umámakaundaniye sénááowe. 49 íma kesí imáyáavinkemba súnda póꞋa kesivo siꞋmákaiwaima simásímakain-aimba súnda póꞋa naaén-kanaama tínasa sésa kawer-áímbá sínaaemba umámakaunda ímo oráámbá uráundaniye sénááowe. 50 kesivon-ááima aúnáiꞋa umái maíꞋmaiꞋa ónááon-aimban-iye. súnda-aimba kesivo simásímakain-aimba kwésimatimune Ísu siráiye.

Copyright information for `KZE